PRESS RELEASE 

NO.118/2025

Siaha, Târi 1 Phiata, 2025 (Pakhynoh) - Atanoh dawh 11:00 AM khata DMS Hall, District Hospital,Siaha liata Mizoram State AIDS Control Society, Association for Voluntary Blood Donation, Siaha & Blood Bank, Siaha zy ta ama pachhuahpanohpa National Voluntary Blood Donation Day, 2025 Programme hmâpa châta, Puhpa S. Lalremthanga, Hon'ble Deputy Chief Executive Member, MADC cha Khichhai Laipa (Chief Guest) châpa ta he programme he a hmâkhei.

National Blood Volountary Donation Day,2025 he District hrolâ liata chhaota atanoh liata ama hmâh hra.

He Programme he Puhpa CL Hranga, President AVBD, Siaha ta chhihtha ta, Pro Pastor Robert Ngurnunzuala, LIKBK ta Biehrai 1 Zahawna 3: 16-18 reina hneipa ta, Abeipa hnohta daihti pavaosana thlah a chhâ. 

Khichhai Laipa Puhpa S. Lalremthanga, Dy CEM chata biereina hnei ta, "Atanoh liata National Volountary Blood Donation Day Programme âvawhlaopa zydua chô liata nata AVBD Chhihthatuhpazy chô liata alynabie reih na ta, he programme ahlao thei awpa ta tlâhna phapa na pie tuhpa eima Beipa Khazohpa hnoh chhaota alynabie ei rei hra. Krizyhpazy cha mo hropazy châ ta loh papua ta ama châ ta byhnâ eima châ awpa a châ. Sôh nah thih, hneinazy ta mo hropazy châ ta byhnâ eima châpa he rônah vei ei tahna châleipa ta eima chhôh liata thisai, Khazohpa miah a piepa cheingei la papuapa ta mo hropazy hrona pachha n'awpa ta thisai eima piepa tluta a sôhpa byhnâ he y thai khao vei." tahpa ta biehmia a reih.

Chief Guest ta AVBD Siaha Chhihthatuhpazy, District Hospital Siaha liata Dawtyh, ahriatuhpazy nata Blood bank liata ahriatuhpazy hnohta alynabie reipa ta, "School, College nata Khitlâh liata zy thisai pie awpa a peimawhna nata mo hropazy hrona pachhâna a châzie zy ahluh viapa ta awareness hnei awpa he a byuh ngaita. Thisai piepa heta apietuhpazy châta kyna y leipa ta, thisai he thlaita âtaopathi heihpa a châpa vâta, pahnopasia leina vâta thisai pie awpa angiarohpazy hnohta ama pahnopasia theina awpa ta pachuna nata pasyuna phapa eima hneihluh awpa ângiah kaw. Students, programme âvawhlaopazy chhao ei chi thisai piepa ta mo hropazy châ ta byhnâ châ a chhuah chyu u la, nama viasa nahzy chhao nama pasyu awpa a byuh. Thisai pie thei awpa ta hri-ia pathaihna pachâ peimawh tah, paritheipa nata adaihti leipa ta chanô chapaw châna a hmâna kyh liata khâchâ a vaih awpa ta ei châ haw ei." tahpa ta a biereipa a pachhâsa sa.

Dr. C.Lalrohsanga, DMS & Patron AVBD Siaha chhao bie reina hnei hrapa ta,"eima Thisai 1 unit la papuapa heta 650 calories eima thy tahna a châ. Thisai pie awpa ta kô bitaipa kô 18 - kô 65 a châ. Thisai pie thei awpa ta cha; Body temperature, BP, Vain zy apha awpa byuh ta, HB chhao 12.5 g % chôla a byuh hra. Pasana vâta chiehleipa, pasana khiakhipa ahneipa, Drug abuser nata Jail liata âtâhpazy cha thisai ama pie awpa ta pasaipa châvei. Nawh ahneipa kô 1 khô hlâta, Nawh araopa thla 6 khô hlâta, Typhoid aveipa ama tlâ tawhta kô 1 khô hlâta nata TB aveipa ama tlâ tawhta kô 5 khô hlâta zy thisai ama pie papua awpa pasaipa châvei. Atonoh he programme âvawhlaopa Students zy nama hrozie asohsi ta, hri-ia pathaihna pachâ peimawh awpa ta cha pasyu ei na ta, ei châ haw chyu ei", a tah.

Puhpa Lalnunkima Pisa, Vice President AVBD, Siaha  ta Siaha District liata Chanô hry tawhta thisai apiehluhpazy;  (1) Laihsa S.Biakremmawii, National Awardee , Council Vaih, (2) Laihsa V. Remruatsangi , New Siaha West- I nata (3) Laihsa H.Lalchhanhimmi, Siaha Vaihpi, Siaha, zy hnohta palyupalihna hmo hlâna a hnei. Laihsa S. Biakremmawii heta thisai ei 26 pie ha ta, Laihsa V. Remruatsangi heta ei 26 nata Laihsa H.Lalchhanhimi heta ei 20 a pie ha hra.

Laihsa Fc. Laltlankimi , Data Operator, Blood Bank Siaha ta, " April tawhta September, 2025 chhôh liata Thisai 652 units daopa châta, Voluntary Blood Doners nah tawhta 591 units nata Thisai pie awpa ta ahawpazy tawhta 61 units daopa a châ hra. Blood donation Camps he su nanonanopa liata ei 24 hneipa a châ. Tlâhleipa manôh 279 ta thisai he dao ei ta, MGCH lâ liata 50 units pie papuapa a châ hra. Atakô April tawhta September taihta thisai lapakhypa cha 92.7 % châta, overall liata deikua 90.64% a châ. Zâkô lâ liata thisai lapakhypa cha 96.88% a châ ", tahpa ta Blood Bank, Siaha duasu report a pie.

Laihsa S.Biaremmawii, National Awardee, Chanô hryta Voluntary ta thisai a pie hluhpa, "Young Woman Champion Award" adaopa chhaota, "Thisai pie la hrona pachha mah y" tahpa bie atlychaka pa ta pasyuna bie pha khawpa a reih hra.

Laihsa B.Priskily, Laihsa S.Lalchansangi, Laihsa Dinai C.Lalruatdiki   nata Laihsa Rovina Khaimeichho zy ta hlasapa ta programme âhlaopazy ama palôhpahawh. Atanoh ta Hlasathaipazy(Artists) lymâ daoh awpa y leipa ta ama veiseihna ta programme a palôhpahawhpazy hnohta Chief Guest ta amâ piepasana liata alynabie reina châta hmo piepa chyhta sai a hlâ ei.

Atanoh ta programme he Little Diamond Higher Secondary School Students ; class XI & XII (Arts & Science) zy nata MTP Banch: Siaha Chhihthatuhpazy hruapa ama châna hawhta amâ hlao hra. MADC official tawhta Puhpa LM Beingalai, I&PO, Puhpa T Pabua nata Puhpa K Nehemia, Cameramen zy ta Puhpa S. Lalremthanga, Dy. CEM, MADC ama zi.

Puhpa NT. Hrasia, Secretary,AVBD Siaha ta alynabie(vote of thanks) reina hneita, daihti pachhâsapa a châ.

ISSUED BY:

Information & Publicity Department 

Mara Autonomous District Council

Siaha.