PRESS RELEASE 

NO. 107/2025

Siaha, Târi 8 September, 2025, Hriatuanoh - Atanoh dawh 11:00 AM ta MADC Golden Jubilee Hall liata 58th International Literacy Day cha Adult Education Department, MADC pachhuahpanohpa ta hmâhpa a châ. Puhpa S. Lalremthanga, Hon'ble Deputy Chief Executive Member, MADC cha Khichhai Laipa (Chief Guest) châpa ta a hmâkhei ei. 58th International Literacy Day Theme:" Promoting Literacy in the Digital Era" tahpa hmâpa a châ. MADC liata ei 31 a hmâna a châ hra.

He Programme he Puhpa L.Lalduhkima, Adult Education Officer, Adult Education Department, MADC ta chhihtha ta, Rev. H. Beikhosa ta Biehrai; Hmotaopazy 22: 2,3 reina hneita, Abeipa hnohta daihti pavaosana thlah a chhâ.

Khichhai Laipa Puhpa S. Lalremthanga, Dy CEM chata biereina hnei ta, "Atanoh International Literacy Day eima hmâh theipa he alypah a châ ngaita. 8th, September noh liata international literacy day a hmâh tyh awpa ta kô 1966 liata UNESCO ta ryhraona vaw tao ta, he hawhna heta India lia chhaota a ei 1 khana châta 1967 liata hmâpa a châ hra. Achuna palaiseihsana kyh liata International Literacy Day he peimawh kawpa ta pahno na ta, Khizaw liata ahy hmahta thai chiehpa ta a pihpa ylei pita, achu lymâ ta sie lymâ awpa eimá châ." a tah.

Dy CEM chata, "Athaipazy ta rei tyh ei ta, achuna heta khatitaih ma a pahly?, ahluvia ta cha eima za pih tawh ta eima thina taih ta a chu awpa a châ tah ei ta, âdo ei tah kaw. Viahnazy cha kô 80 khôla taih ta râhchhihthatuhpazy ama y ngâthlâh ha, he he khâzia ma eima tah khiahla achuna ama pachâ peimawh vâta a châ. Reikah ngialeipa châhrao leipa sala, eima râh liata cha Achuna eima pachâ peimawh leipa vâta kô uhthei viapazy he chyhsa ta mâchâ maohpa hawhta hmôpa ta tlâ eima pachâ bâ.", tahpa ta a chuna a peimawzie a reih.

Khizaw a sosâh zie reipa ta, Dy CEM chata, "atahmâ cha khizaw he a sosâh ha bâ ta, khizaw he eima kupazah tawhta hmothei bâ pita, keimozy châ eimâ chu no cha Tipa tawhta Siaha liata hmo tlôpa khâpa hmah pahno thei mapi. He vâta khizawh â sosah lymâ pa hawhta keimo chhao eimâ chu lymâ awpa a peimawh kaw, eima education zy chhao he a quality a pha nata phalei zy he eima râh nahta pho a bohna a châpa pahno na chota eima pacha peimawh pa a byuh kaw", tahpa ta a rei hra.

Khichhailaipa chata, "daihti a vao phata eima raihriana liata ngâchhih ta adona he palaiseihsa a peimawh ngaita , atahnoh ta programme âhlaotheipa zydua tih nata râh hmasiena liata lôhrao kawpa ta hriakho awpata ei cha hrua hra ei," a tah.

Puhpa S. Lalremthanga ta," âchuhaipa, Literacy Day âvawhlao theipazy chi  Zisu Krista hneituhpa nama châ khiah namâ chuna liata hlaotloh leipa ta y bei aw v'ei chi, achhâpa cha; Krista hneituhpazy cha ama hmotaona nata hriana liata Zisu hawhta ngâ âchhihpa ama châ vâta a châ. Zisu Krista chakao tah, Awnanopa lia apahlao tah, ahmâh lymâ awpa ta ei cha haw ei," tahpa ta a biereipa a pachhâ.

Puhpa MH Tiabi, Hon'ble Executive Member i/c Education (M/S) chhao ta biereina hnei ta, "Mara Autonomos District Council he Mara reih eima cheihpa vâta hneipa châ pita. Mara chi nahta pho a laiseih  via lyma n'awpa châ ta hmahla awpa he eimâ báhpa a châ. Tahmâ tawhta Adult Education Department heta Digital lâchhâh a heihpa ta hmahlana eima siekhei awpa châ bâ ta, he hawhpa lâ he eimâ chu lymâ awpa a byuh", tahpa ta a reih.

Executive Member i/c Education chata, "International Literacy Day eima hmâpa heta â chhuapa hluhpi hnei ta, cha hry liata peimawh viapazy cha; Sâkhana liata Literacy a peimawhzie pahno na châ ta. Sânona liata Zawpi nata Sawhkha ta Literacy papeimawhsa ta, ahrana hnei n'awpa châ ta. Sâthôhna liata, Illiterate (rei nata ro thaileipa) adyuhna châ ta. Sâpalihna liata cha Roh thai ta, Reih thaipa (Literate) châ awpa he chyhsa to 'Fundamental Rights' achâpa hawhta athaileipazy pathaisa awpa he moto eima maophaohna a châ. A chhâna liata cha, he literacy day he ro nata rei thaina promote na a châ hleikhô ta Chi nahta Râh promote na a châ hra. Châ eima roh thai leipa nata eima reih thai leipa a châ khiah tala Mara chi nata pho aduah papuana liata byhnâ châ thei aw mapi," a tah.

Puhpa MH. Tiabi India ta Literacy Census a vaw y heih awpa liata Siaha District ta Literacy rate 100% a tloh thei cheingei n'awpa châta âvy pakhypa zydua chhao Adult Education Department hmahlanazy baokhâ awpa ta a hrua hra ei.

Atanoh tah programme liata âhlaotheipazy; HODs MADC, Head Master PS & MS Siaha Town, Puhpa J Jeffrey Khara,Editor Moonlight, Laihsa B. Priskily nata Laihsa Clara K. Melita, Class V, VI & VII Students NCCS nata ama Teachers zy ama châ.

Laihsa B. Priskily nata Laihsa Clara K. Melita zy ta pahnie kawpa ta hlasapa ta programme âhlaopazy ama palôhpahawh.

Pihnô Z. Hnaiki, LDC, Adult Education Department, MADC ta vote of thanks reih ta, Rev. H. Beikhosa ta Thâchhâna hneipa ta daihti pachhâpa a châ.

ISSUED BY:

Information & Publicity Department 

Mara Autonomous District Council,

Siaha.