PRESS RELEASE

NO.66/2023

SIAHA, 21 Pachawh, 2023, Chutynoh - Atanoh my dawh 11:00 Am pa ta Board of School Education, Mara Autonomous District Council, Siaha pachhuahpanohpa cha Puhpa S. Lalremthanga, EM (Edn) i/c Board of School Education, MADC cha khichhai laipa (chief guest) châpa ta Forest Hall, MADC, Siaha liata Model Students Scholarship 2023 Cash Award rai papuana a hnei.

Kô 2022-2023 Model Students Scholarship Cash Award rai papuana programme he Puhpa HC. Beikhai, Secretary, Board of School Education, MADC ta chhihtha ta, Pihnô Ngôbu, Office Superintendent, Board of School Education, MADC ta Abeipa lâ pavaosana daihti â hmâh.

Puhpa HC. Lalawmpuia, Controller of Examination, Board of School Education, MADC ta report piena a hnei. 

BP. Shebby Hlychho ta pahnie kawpa ta hlasapa ta zawpi a palôhpahawh ei.

Model Students Scholarship he Class IV to VII zy châta pachhuahpanohpa a châ.

Model Students Scholarship 2022-2023 châta a exam theipa zydua cha:

Class - IV : 647

Class - V : 568

Class - VI : 492

Class - VII : 466

Total : 2173.

Students 97 ta Scholarship ama hmô. Ama Constituency chhôh liata taopha chaipa piepa ama cha vâta, Class to tawhta pakha lyma ta hmô eita, kô kha Rs. 6,000 /- ( Thlakha ta Rs. 500/- ) piepa ama châ.

Puhpa S. Lalremthanga, EM, MADC chata siku hawti zy ta châ nama chu nota competitive liata aro patlo awpa palôru hneina chôta tiama kawpa ta châ achu awpa ta a pasyu ei.

Student zy ei chi ta exam lia ngâlâ taopha achhuah leipa ta, thai kawpa (quality) kawpa nata nama chuna thaipasia kawpa ta nama chu awpa he apeimawh ngaita kaw tahpa ta student zy hnota EM heta pasyunabie a hlâ ei.

"He Model Students Scholarship heta pachutuhpa (Teacher) nata achuhaipa (Student) zyta achuna apeimawzie a thiehpa ta nama vaw pahno chanei hei awpa ta ei cha haw ei," tahpa ta EM ta a reih.

"Teacher zy ta nama student zy he kyhpachâna palâsana chôta nata tiama kawpa ta nama pachu awpa ta ei cha haw ei," EM ta a tah.

"KC Zalena chhao Siaha District liata ypa nata thotlâh khihpa cha hrasala Mawrâh liata a taopha chaipa a châ. Student zy ta ano hawhta tiama ta taopha nama chhuah chyu awpa ta ei cha haw ei," EM ta a tah.

EM chata, "student zy hnota achuna liata hlaotlona he namo mo pakha châta apha hleikhô ta, khitlâh châ, râh châ nata chipho cheichalona chhao a cha e tahpa he a thiehpa ta nama vaw pahno chanei hei awpa ta ei reih khoh kawpa a châ," a tah.

EM chata Model Students Scholarship a hmôpa zydua hnota pathipalô hmeiseih ta âlykheizie a reih.

Pihnô Nazee Khailah, President, Board of School Education & Sr. Education Officer, MADC nata Puhpa FC. Chhuasa, Text Book Committee member zyta pasyunabie pha kawpa reina ama hnei.

Puhpa John VT. Hniehu, Academic Officer, Board of School Education, MADC ta vote of thanks reina a hnei khai tawhta Abeipa thlahchhâna reihparaohpa ta daihti pachhâsapa a châ.

ISSUED BY:-

Information & Publicity Department

Mara Autonomous District Council

Siaha.