PRESS RELEASE

NO.141/2022

SIAHA, 7 Phiata, 2022, Chutynoh - Atanoh dawh 10:30 Am khata Forest Hall, MADC, Siaha liata Samagra Shiksha, Siaha District nata STAM, Mizoram pachhuahpanohpa District Level Children Science Congress 2022 (A programme of National Council for Science & Technology Communication, GOI) liata Puhpa S. Lalremthanga, EM (PWD), MADC cha khichhai laipa (chief guest) ta a hmâkhei ei. He programme liata ama local theme cha "Understanding Ecosystem for health and well-being" tahpa a châ.

Programme he Miss Florence T. Azyu, Academic Coordinator ta a chhihtha. Puhpa T. Chatlua, Addl. DPC, Samagra Shiksha, Siaha District ta keynote speech hnei ta, Puhpa Lalropuia Chinzah, District Coordinator & State Teacher Awardee ta report piena hnei ta, Miss Monalisa, 2007 NCSC participant nata Diana J. Thatiphangiarili, 2021 NCSC participant zy ta short speech reina amâ hnei. Nancy Lalhunmawii ta hlasapa ta zawpi a palôhpahawh ei.

Puhpa S. Lalremthanga, EM (PWD), MADC ta biereina chyupa hnei ta, a ry liata palâsapa he a bierei tlâhpi viapazy a châ:-

Kô 2021 khata State Level Children Science Congress ei 28-na Education Centre Hall, Treasury Square, Aizawl liata ama hneipa lia khata Siaha District vyuhpa ta student ahlao leipa ei ta, atakô deikua amâ hlao thei nahta pangiasa â chhih. State Level Children Science Congress liata participants zy hry liata atlohpa (select) pazy he National Children Science Congress liata ama participate heih aw. National Children Science Congress liata atlohpazy cha rai pha kawpa a hmôpa ama hluh kaw.

National Children Science Congress he kô 1993 khata New Delhi liata hneipa châ ta, he kô tawh heta Science Teachers Association Mizoram (STAM) chata achuhaipa (student) atuah papua ha hra ei. Kô 2016 tawh khata RMSA atahmâ ta Samagra Shiksha zy chhaota hriaparaohpa ta District Level tawhta pachhuahpanohpa tyhpa a châ. National Level liata a participate awpa ta a tlohleipazy chhao North East tour zy hneikhei tyhpa ama châ. National Level Children Science Congress lia heta Child Scientist 2016 rachhôh tuahpapua hapa ama châ.   

District vyuhpa ta a siepazy heta Guide teacher zy nata Project ama taopa cha District Level Children Science Congress liata ama present tyh. Kô hmiatuapa lia khata Aizawl liata St. Paul student pano (2) zy cha Virtual International Science Fair Mexico liata India vyuhpa ta amâ hlao ha hra.

Science subject lâta tiama kawpa ta â kaw chu patlôpazy cha rai pha kawpa ama kaw hmô lymâ ty. Chavâta, Khazohpa pahnona chôta tiama kawpa ta namâ chu lymâ awpa ta khokheina ei cha hlâ ei. Pachutuhpazy chhaota tiama papuapa ta student kyhpachâ kawna chôta nama pachu via lymâ awpa he ei châ haw khoh kaw ei. 

Education liata eima sôh via lymâ thei nawpa ta tiama papuapa ta, hmahla via lymâ achhuah chyu suh vy. Aizawl khihpi he hmohropa lâ liata eima compete thei lei awpa hluhpi a y thei aw, anodeikua cha achuna education liata la eima compete thei na, eima tiama khiahta la âmo hlâta hma eimâ sâh via theina tahpa palôhru hneina chôta tiama papuapa ta hmahsie via lymâ achhuah chyu suh vy. A tliata liata MCS result puapa liata Mawrâh pôhpalôhpa liata MCS topper kha Marapa saw Chhaolô khihpa a châ. Aizawl mozy hneirôh kaw hra ei sala, achuna liata la miah atlu hlei veih ei. Cha cha tlyutliazy chhaota nama pahno awpa a byuh. Âmo kha keimo hlâta âsâh viapa liata soh lei awpa.

Aizawl nata Lôlei liata a ypazy eima tlybai ta eima mohnao aw tahna lâta rei ei chhuapa châ leipa ta, ei reih chhuana deikua cha, âmo hawhta chyhsapa mokhaoh kuphei akipa ta ahneipa châ hra pita eima tiama khiah âmo hlâ hmahta achuna liana heta eimâ sâh via theina tahpa ei reih khoh. Âmo hawh pyly ta Khazohpa ta miah tao ta eimâ nai viana y leipa ta, Khazoh pahnona chôta tiama eima papua khiah âmo hlâta eimâ sâh via theina tahpa palôh liata pahnona chôta tiama kawpa ta namâ chu lymâ awpa ta khokheina sâh chaipa ei châ hlâ ei. He Children Science Congress he ahlao vaw tloh via lymâ mawh sy.

Ei châ ly kaw ei.

Puhpa S. Lalremthanga, EM (PWD), MADC he Official lâ tawhta Puhpa Syuhlo Beichakhei Mara, PS to CEM, Puhpa Pawsa Lava, AITO nata Puhpa K. Nehemia, Cameraman ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.