PRESS RELEASE 

NO.71/2026

Siaha, târi 28 Thlazoh (Chutyhnoh) - Atanoh dawh 11: 00AM khata District Education Office, Siaha in collaboration with SCERT, Mizoram ta a pachhuahpanohpa District Level Science Seminar, 2026 (Theme - India Energy Basket 2047: Prospects and Challenges) - Forest Hall, MADC liata Puhpa S. Lalremthanga, Hon'ble Deputy CEM, MADC cha Khichhai Laipa (Chief Guest) châpa ta programme a hmâkhei.

Puhpa T. Chatlua, Addl.,DPC, Samagra Shiksha, Siaha District cha he programme liata Moderator châpa ta welcome speech reina hneipa ta , Programme a chhihtha . He Seminar liata Judges zy cha:-

1) Puhpa T. Behronga, Soil Conservation Officer, MADC.Siaha.

2) Pihnô Ellen Zathang, Lecturer, Gov't Higher Secondary School, Siaha.

3) Puhpa Lalropuia Chinzah, Teacher, Gov't High School, New Siaha zy ama châ.

Khichhai Laipa ta biereina hneipa ta, "Moderator, Judges, Organizing Committee nata atanoh liata Students âvypazy anaohna ei cha hlâ ei. He Programme liata Khichhai Laipa châ awpa ta khokheina na patosa tuh penawh DEO, Siaha nata Organizing Committee hnohta alynabie ei rei.

Atanoh District Level Science Seminar, 2026 eima hmâ ngâpa liana heta India ti nata râh chyhsa eima chana hawhta biepipa 'India energy basket 2047' tahpa hmâpa a châpa he a pha ngaita. India ta Khotalaina a hmô tawhta kô 100 na cha kô 2047 he a kaw châ aw, he liata India râh cha râh hmahsiepa (Developed Country) châ awpa â chhhuahna siekhei lymâ pa a châ.

He achhhuahna pi patlohsa awpa ta a peimawh ngaitapa miakha cha energy (electricity) liata ativy awpa he a châ. He he moto ta hmahsiena lâtlô eimâ chhihna atanoh liata eima peimawh chyupa miakha a châ hra.

India râh he bypi nata tlâh yna râh a châpa vâta environmentally friendly energy taopapua awpa ta asu hmohmâh âry kawpa châta, India Sawhkhâ chhaota  eima environment parao leipa ta energy hluhvia eima hnei theina awpa ta hmahlana a siekhei lymâ hra. He vâna heta atanoh, he su liata âvypa Students zy chhaota he hawhpa kyh liata palôh pathieh chyu awpa ta ei châ haw ei.

"Innovation in Science & technology leipa ta atanoh lia cha hmahsiena tlaitlohpa y thei vei. He he eima râh chyhtapa chhaota hmahsie awpa ta eimâ ngiah ngaita pa a châ hra. Atanoh Students âvypakhypazy  pachâna nata palôhru thiehpa hneipa ta Science subject he pachâ peimawh awpa ta ei châ haw ei. He District Level Science Seminar heta eima Râh nata Students zy châta hmahsiena vaw tlôkhei mawh sy, ei châ ly kaw ei." tahpa ta Dy.CEM ta a biereipa a pachhâsa.

Atakô,2026 District Level Science Seminar Biepipa châta "Indian Energy Basket 2047: Prospects and Challenges" tahpa hmâpa chá ta, He seminar liana heta Siaha District chhôh High School 6 tawhta Students 6 zy ta amâ taopasua. Atanoh ataopasuana liata Thelma Z. Ngohnezi, Class IX, Maraland Academy, Siaha cha sâkhana (Ist Position) a châ. Ano he State Level Science Seminar,2026 liata Siaha District vyuhpa ta âhlao awpa a chá aw.

Govt. High School, New Siaha Student  Angelina Lalchhanhimi, Class-X ta hlasa hnei ta, Pinó Jenny Lalthanpuii, Head Assistant, District Education Office, Siaha ta, alynabie (vote of thanks) reina a hnei.

ISSUED BY :

Information & Publicity Department,

Mara Autonomous District Council,

Siaha.