PRESS RELEASE

NO.46/2025

SIAHA, 24 Pachawh, 2025, Pobienoh - Atanoh my dawh 10:00 AM khata Puhpa S. Lalremthanga, Hon'ble Deputy Chief Executive Member i/c Education (P/S), MADC ta Thosai P/S (UPS) nata Vaihpi Comprehensive School zy a tly.

Puhpa S. Lalremthanga, Dy. CEM, MADC chata, "Siku hawtizy heta ama nô nata pawzy hlâta ama pachutuhpazy he chiza via ei ta, ama rei chhao amâ ngiah via hra. Chavâta, pachutuhpazy ta hawti pachuna kyh liata tiama kawpa nata kyhpachâ kawna chôta nama pachu lymâ awpa a byuh. Chyhsa pitlohpa, hmâhtlâh châ awpa ta nama pachu awpa a byuh. Pachutuhpa rai he rai rônah kawpa Khazohpa ta a cha piepa ei a châ tahpa nama pahno’pa a byuh," a tah.

"School liata Class lapa ngâlâh châ leipa ta, siku hawti kiapâh liata y dâhzy achado kaw’pa byuh ta, nama y dâh, hrozie nôchâ ama cha mopâ (copy) lymâ tahpa pahno ngâthlâhna chôta, zachhih kawpa nata mopâtlâh châpa ta nama y lymâ awpa a byuh," Dy. CEM ta a tah.

Dy. CEM chata, "achuna lâta pasyunabie pha kawpa a reih hleikhô ta, schools châta ama peimawhpa nata amâ ngiahpazy reikhei chyu ei ta, a byuh â ngiahna hawhta taotheina rakha liata bao chyu awpa â chhuahzie," a reih.

"Paritheipa (Drugs) he adyuh lymâ pi ta, Achuhaipazy paritheipa tao chi âchhihzie siku hawtizy hnohta reih hluh ta, tao rai rai lei awpa ta nama chho hluh awpa a byuh. Hro dopa lâthlôh amâ kaw chhih lymâ n’awpa kyh he, nâmo pachutuhpa ku liata apahnieh ta, hawti hro chhihtha padopa he Khazohpa khozie chhao a châ, tahpa pahnona chôta, tiama kawpa nata kyhpachâ kawna chôta nama pachu lymâ awpa a byuh," Dy. CEM ta a tah.

Puhpa TT. Kholaw, Sr. EO (P/S) chhaota pasyuna bie pha kawpa reina a hnei hra.

Dy. CEM he Official lâ tawhta Puhpa K. Machhua, E.O, MADC, Puhpa Herbertson Syuhlo, AEO, MADC, Puhpa Pawsa Lava, AITO, MADC, Puhpa R. Beilochai Khithie, Inspector of Statistics, Puhpa Zosa Khaila, LDC, MADC nata Puhpa Martin L. Hlychho, Cameraman MADC zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.