PRESS RELEASE

NO.43/2025

SIAHA, 22 Pachawh, 2025, Hriaheinoh - Atanoh my dawh 9:00 AM khata Puhpa S. Lalremthanga, Hon'ble Deputy Chief Executive Member i/c Education (P/S), MADC ta New Siaha P/S - 1, New Siaha P/S - 11 nata Siahatlâh P/S - 1 (UPS) zy a tly.

Puhpa S. Lalremthanga, Dy. CEM, MADC chata, "Siku hawtizy he nô nata paw kiah lia hlâta ama pachutuhpazy kiah liata y hluh via ei ta, chavâta, pachutuhpa rai he sawhkhâ rai thlâhthlipa hawhta pachâ leipa ta chakaona hawhta pachâpa ta kyhpachâna chô nata tiama kawpa ta pachu awpa a châ," a tah.

"Khihpi lai viapa Aizawl, etc liata ypazy hmo hropa liata la eima compete thei leina chhao a y ngyu aw. Châhrasala, achuna liata la eimâ zaoh (compete) thei tahpa palôhru nama hnei awpa ei khoh. Cha cha eima chi nah pho apahniehna chhao a châ. He pachutuhpa rai he Khazohpa tawhta byhnâ nama daopa chakaona rai hawhta nama pachâ chyu awpa a byuh," Dy. CEM ta a tah.

Dy. CEM chata, "Tiama kawpa nata kyhpachâna chôta hawtizy nama pachuna theilâpa cha eima râh nata Awnanopazy ta a theilâ phapa eima hmô cheingei aw," a tah.

"Siku hawtizy he ama hawtino tawhta paritheipa (Drugs) phaleizie nata chi âchhihzie chho hluh u la, ama kaw lai ti chhaota paritheipa (drugs) taopa chi âchhihzie pahno aw ei ta, lâthlôh dopa achhih aw ei ta, chyhsa hmâtlâh châpa ama kaw châ thlâh ha aw," Dy. CEM ta a tah. 

Dy. CEM chata, "He tawhta cha education department liata Officers zy ta surprise visit vaw hnei tyh aw ei ta, he surprise visit he hmo nama taochheipa abyhpa ta visit pa châ leipa ta, eima zydua ta hriaparaohna phapa eima hnei thei n’awpa ta surprise visit vaw hnei tyh awpa ama châ hri tahpa nama pahno awpa a châ," a tah.

"Hawtizy ama hro pado ta chyhsa hmâtlâhpa ta ama kaw pua thei n’awpa he nâmo pachutuhpa ku liata â pahnieh. Chavâta, pachuna dei châ leipa ta nama nôchâ hrozie chhao namâ chado kaw awpa a byuh," Dy. CEM ta a tah.

Dy. CEM chata, "Râh asosâhpa liata ypazy ta cha school liata hawti pachutuhpazy he ama pasâhsa kaw. A chhâpa cha hawti hro padotuh awpa nata chhâ vaw y awpa châta chyhsa hmâtlâhpa ama kaw châ awpa vâta ama pasâhsa kaw ei. Châ ei chu daihti liata eima Sociology liata eima Head of Department biereipa ei my thei leipa cha 'Ei students zy heta IAS châ awpa he khoh kaw ei ta, pasâhsa kaw ei ta, IAS ama pasâhsa kaw vâta he hawhta ei reih e, a tah, IAS cha khoh sala khatino raita ei châ thei, anodeikua cha, IAS châ h’aw sala, Office liata file liata achyhta châroh ta, daihti pachhâ awpa hlâta cha, ei thaina he students hluhpizy hnohta piepachhuah/chhopachhuah he ei khoh via na, atahmâ ei rai he na pabâh ei sala, a hro lâ liata hria awpa na chho chhieliepa ama hluh kaw na,' tahpa  ta a reih e," a tah.

Puhpa TT. Kholaw, Sr. EO (P/S) chhaota biereina hnei ta, "Pachutuhpazy ta tiama kawpa nata kyhpachâna hneina chôta siku hawti châ nama pachu khiahta la, nama siku liata siku hawti nama hnei hluh lymâ thlâh ha aw. Khataih lia rai pachutuhpa rai hria u la, Siku he kei eih na a châ, tahpa ta azipa palôhrupa nama hnei lymâ awpa he a peimawh ngaita kaw," a tah.

Dy. CEM he Official lâ tawhta Puhpa K. Machhua, E.O, MADC, Puhpa Herbertson Syuhlo, AEO, MADC, Puhpa Pawsa Lava, AITO, MADC, Puhpa R. Beilochai Khithie, Inspector of Statistics, Puhpa Zosa Khaila, LDC, MADC nata Puhpa Martin L. Hlychho, Cameraman MADC zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.