PRESS RELEASE

NO.37/2025

SIAHA, 4 Pachawh, 2025, Chutynoh - Atanoh dawh 12:00 Noon khata MLA Siaha District Open Volleyball Tournament Final Programme cha Siaha District Volleyball Court New Siaha E-II liata ahmâhpa châ ta, Puhpa S. Lalremthanga, Deputy CEM, MADC chata khichhai laipa châpa ta a hmâkhei ei.

Programme he F. Remlalnghaka, Secretary, SDVA ta chhihtha ta, Sangzuala taokheina (one minute of silence) chhao hneipa a châ.

Puhpa S. Lalremthanga, Dy. CEM, MADC chata, atanoh he Puhpa M. Laikaw, CEM, MADC ahmâ leipa vâta ano vyuhpa ta nama hry liata ei vaw hlao theipa he ei ly hmeiseih, a tah. Siaha District he chakichakao liata ypa châ hra ei sih la, Khazohpa ngiachhiena vâta Sports lia heta dua ma pi, a tah.

"Siaha District tawh heta Sports liata state, national, nata international levels liata Khazoh ngiachhiena vâta eima pua thei lymâ tahpa pahnona chôta, dua leipa ta, tiama papuapa ta hmahsie lymâ achhuahna chôta, thyutliazy ta tiama nama papua lymâ awpa he a peimawh ngaita kaw," tahpa ta khichhai laipa ta a reih.

Dy. CEM chata, achuna he peimawh kaw ta, charaohpa ta, khizaw arâpasuana lia heta Sports he peimawh tlôh ta, Sports lâta chhihthatuhpazy, he hawhta thyutliapazy châta tournament zy ama pachhuahpanoh thei tyhpa he aly achhih ta, ama tao pha hmeiseih, a tah.

"Sports lâta apahâh kawpazy chhaota, pahnothai ta, palôh zydua pie khaipa ta, tiama kawpa ta akhaih ta, nietluana khi taihta thai ta, hmâh thei awpa namâ chhuah chyu awpa a byuh," tahpa ta khichhai laipa ta a reih.

"Sports tao n’awpa su nata chhaichhizy hnei pha tu lei y hr’ei sih la, eima theina rakha ta, hmahla lymâ eimâ chhuah. 16th Finance Commission zy kaw hmâh pi ta, project zy pangia lymâ’ pi ta, Khazoh ngiachhiena vâta hmahsiena lâ eima pangai lymâ aw," tahpa ta Dy.CEM ta a reih.

"Dr. K. Beichhua, MLA, Siaha Biatuhpa nata Puhpa K. Hrahmo, MLA, 40-Palak (ST) A/C Biatupa zy ta thyutliapazy châta he hawhpa tournament ama vaw pachhuahpanohpa he, ama chô lâ liata alynabie ei reih hmeiseih. Atanoh final akhaihpazy chhao, Sports liata la, a tlô viapa nata tlôlei viapa a y tyhpa pahno thlâh hana chôta, a tlô viapa ta tlô dâh thai ta, a tlôlei viapa ta tlôlei dâh nama thai kaw awpa a byuh," tahpa ta Dy. CEM ta a reih.

Khichhai laipa chata, aly kawpa ta final akhaih chyu awpa ta khokheina a hlâ chyu ei.

Reuben Hlychho, Technical chairman, SDVA ta technical report piena hnei ta, PC. Lalhmingthanga, President, SDVA ta vote of thanks reina hnei ta, Dr. K. Beichhua, MLA, Siaha Biatuhpa nata Puhpa K. Hrahmo, MLA, 40-Palak (ST) A/C Biatuhpa hnohta alynabie a reih.

Puhpa S. Lalremthanga, Dy. CEM, MADC he Puhpa TT. Kholaw, Sr. EO (P/S), MADC, Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.

ISSUED BY:-

Information & Publicity Department

Mara Autonomous District Council

Siaha.