PRESS RELEASE

NO.45/2025

SIAHA, 23 Pachawh, 2025, Pakhynoh - Atanoh my dawh 9:00 AM khata Puhpa S. Lalremthanga, Hon'ble Deputy Chief Executive Member i/c Education (P/S), MADC ta Meisavaih P/S-1, Meisatlâh P/S - 1 nata Meisatlâh P/S - 11 zy a tly.

Puhpa S. Lalremthanga, Dy. CEM, MADC chata, "School a tly laihna liata a reipa cha, he tawhta la information apie chhieliena y khao leip’aw ta, keima chhao, education department liata hriapa Officers nah chhao, surprise visit vaw hnei tyh aw pi ta, he surprise visit he nama hmotaopa adoleipa pahnopapua achhuah vâta surprise visit châ leip’aw ta, hriaparaohna phapa eima hnei thei n’awpa a châ hri aw," a tah.

"Primary School he achuna athaona a châpa hawhta peimawh kaw ta, siku hawtizy he ama nô nata paw hlâta ama pachutuhpazy rei angiah via ei ta, ama chiza via hra. Chavâta, siku o chhôh liata class lapa ngâlâh châ leipa ta School Compound chhôh lia taihta pachutuhpazy y dâh asohsi kaw awpa byuh ta, reikah hmâh dâh chhao achado kaw awpa a byuh," Dy. CEM ta a tah.

Dy. CEM chata, "Siku hawtizy kô tloh leipa ta paritheipa ama tao tlamaw awpa he chi achhih kaw ta, chavâta, paritheipa chi âchhihzie nata ama tao tlamaw lei n’awpa ta a phata ta, ama hawti no tawh heta chho hluh awpa he a peimawh ngaita kaw," a tah.

"Kei chhao Siaha College liata pachutuhpa rai ei hria nota ECM School liata viasa zy châta hriapakaoh’pa byuh ta, mydi dawh 5:00AM pa ta thyu na ta, zâlâ dawh 5:00PM pa ta o ei tlô tyh. Thina vâ nata tlâhleina vâ tah leipa ta la, Khazoh ngiachhiena vâta absent beih leipa na ta hawh beih hra va na," Dy. CEM ta a tah.

"Pachutuhpa rai he chakaona hawhta nama pachâ chyu awpa a byuh. Tiama kawpa nata kyhpachâna chôta siku hawti châ nama pachu awpa a byuh. Hawtizy ama hro padotuhpa, ama kaw sie laih lymâ n’awpa liata pachuna dopa pie ta, hmâh tlâh pachâsa namâ chhuah chyu awpa a byuh," Dy. CEM ta a tah.

Puhpa TT. Kholaw, Sr. E.O (P/S), MADC, Puhpa K. Machhua, E.O, MADC nata Puhpa Pawsa Lava, AITO, MADC zy chhao ta pasyuna bie pha kawpa reina ama hnei hra.

Dy. CEM he Official lâ tawhta Puhpa Herbertson Syuhlo, AEO, MADC,   Puhpa R. Beilochai Khithie, Inspector of Statistics, Puhpa Zosa Khaila, LDC, MADC nata Puhpa Martin L. Hlychho, Cameraman MADC zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.