PRESS RELEASE 

No.17/2022

SIAHA, 15 Hmypi, 2022, Hriaheihnoh - Atanoh dawh 11:00Am khata CEM’s Conference Hall, MADC  Complex, Siaha liata Puhpa Pheiki Solo, Sr. Revenue & Settlement Officer, MADC ta Siaha Town chhôh liata VCPs, NGOs nata MJAs zy joint meeting a hneikhei ei.

Meeting he Puhpa Pheiki Solo, Sr.RSO, MADC ta chhihtha ta, Pihnô P. Chaki, President, MCHP (H) ta thlahchhâna ta daihti a pathao. 

Atanoh joint meeting hneina lia heta Agenda sâthôh (3) pachiapa châ ta, chazy cha:-

1. Lâlai kiah liata O sana chôchâh: Atahmâ tawhta cha Lâlai/Lâthlôh kiah liata O asa khohpa ta cha, O sa hlâ, Otôh bô hlâta Land Revenue & Settlement Department, MADC asaohiah tua leipa nata pahnosa, pasaina (permission) la tua leipa ta O sa/Otôh bô pasaipa châ khao aw vei. He hmahlana tha patlô awpa nata hlaopatloh awpa ta VCPs, NGOs nata MJAs zy miah nama hrialâh awpa ta eima chahrua ei, Puhpa Pheiki Solo, Sr.RSO, MADC ta  a tah. Lathlôh chadie leipa ta O sa ta, lathlôh kawhpa eima hnei thei n'awpa ta hmah eima la chyu awpa ta atanoh ta meeting avaw hlaopa zydua a hrua ei. Vaih to VCPs lâ tawhta Development Works nata Retaining Wall, etc taona kyh lia chhaota, tao hlâta Land Revenue & Settlement Department, MADC asaohiah tua lymâ awpa ta ahawna a tao pâ hra.

2. Building Tax: Kô 2013 Mizoram Gazzete a puapa liata Autonomous District Council (ADC) ta Building Tax (chhie) ama khei thei aw, tahpa bie vaw pua ha ta. Cha hnaihta, atakô April thla 2022 pa tawhta Siaha nata Tipa khihpi (Town Area) liata Building Tax khei bâ awpa ta bie pathlupa a châ. He Building Tax (Chhie) khei awpa  heta Surveyor zy ta Spot verification vaw tao/hnei aw ei ta, vaih to VCPs, NGOs nata MJAs zy ta miah nama hrialâh/bao awpa ta eimâ châ haw hmeiseih ei, Puhpa Pheiki Solo, Sr.RSO, MADC ta  a tah. Building Tax khei n'awpa Land Revenue & Settlement Department, MADC tawhta NOTIFICATION  February 7, 2022 pa ta châ a papuapa cha he post raohpa ta chathih (attach) pâpa a châ.

3. Trading chôchâh: Daoh taopa Trade Licence pie chôchâh lia heta Non-Tribal zy licence pie pasaipa châ leipa ta, atahmâ tawhta cha Trade Licence piena kyh liata vaih to VCPs, NGOs nata MJAs zy ta miah nama bao/hrialâh lymâ awpa ta eimâ châ haw hmeiseih, tahpa ta Puhpa Pheiki Solo, Sr.RSO, MADC ta ahawna a tao pâ hra.

Puhpa Pheiki Solo ta atanoh ta meeting avaw hlaopazy ama daihti sôh kawpazy paruapa ta meeting avaw hlaopazy hnohta alynabie reina a hnei khai tawhta Machâ S. Ngôhei, VCP, New Siaha West - II, ta thlahchhâna ta meeting a pachhâ.

ISSUED BY:

Information & Publicity Department

Mara Autonomous District Council

Siaha.