(5 July, 2018, Thursday)

Atanoh dawh 11 Am liana khata Puhpa N. Zakhai, CEM, MADC ta MSO General Headquarters pachhuahpanohpa “achuhaipa ataophapazy alykheina nata palyupalihna” Programme liata Khichhai Laipa châpa ta alykheina a hnei.

Puhpa N. Zakhai chata, he Programme liata biereina hnei awpa hruapa a châna hawh ta biereina dyuhpa hnei ta, a bie reipa thokhazy ary liata palâsapa a châ:-

1. Atanoh liata achuhaipa ataophapa manôh 12 zy alykheina Programme ahlao awpa ta avypa zydua, châ naoh ei na ta, MSO Headquarters nôpawpazy, Siaha College Principal nata a hrialâhpazy hleikhô ta Media lâta chyhsa zy, anaoh-na Samaw ei cha hlâ ei.

2. Atanoh he Mara ei châpa avaw ly kaw na ta, he hawh ta eima râh liata College eima hnei chhôhpa Siaha College tawhta Topper zy amâ vaw hlao theipa he arônah tah na ta, ei vaw ly ngaita. Hlotlohna maniah pietuhpa Abeipa hnoh ta eimâ lynazy y mawh sy.

3. Achu haipa eima châ khiahta la Achhuah-na sianô kawpa eima hnei awpa  châ.

4. Achuhaipazy ta châ thaithei kaw hra ei sala, ama tiama tlôh vei khiata cha hlaotloh-na hmeiseihpa to thei rimâpa châ vei. Chavâta tiama lyh-lia awpa he eimâ pasyu khoh kaw.

5. Atanoh he, Class-X liata 3rd Division liata pass pa ta, BA MA liata 1st Class lâ a pass syulyu hapa ama y chielie. He nahzy he ama tiamana vâta a châ tah leitheipa châ vei. He hawhpanahzy he amopâ chyu apha kaw aw. Class-X liata 1st Division liata pass tlôh ta, aphathipa ta BA MA apatlô khao leipazy ama y tyh hra; he nahzy he thai thei kaw tlôh ta, âmo liata hripasana nata tiamana a y lei vâta hlaotloh-na hmeiseihpa hmô vei ei. Chavâta tiamapa ta hriapasa awpa eima châ tahpa my khah ei suh u.

6.  Eima Thyutliana daihti liata khitlâh nata Awnanopa liata ahmâ awpa he apakhâ chacheita mapi, anodeikua achuhaipa eima châna hawh ta eimâ chuna he diathlâ lei awpa ta daihti eima hmâ thai awpa apeimawh kaw aw.

7. Atanoh liata achuhaipazy he hmialâ daihti liata eima râh chhihthatuh awpazy nama châ; chavâta y chakhyh leipa ta daihti phapa nama hnei chhôh he ta tiamapa nata hriapasa ngaitapa ta namâ chuna pachâ peimawh awpa ta ei châ haw ei.

8. Tiama nata tao hnolona liata hlaotloh-na a y tahpa my leipa ei si la, hmialâ daihti liata eima chhôkha nata sanawh rinô châ ngâlâh dei châ leipa ta mo hropazy châta byhnâ châ awpa he eima Krizyhna chhao ta maniah â hnawpa hawh ta châ thei achhuah awpa ta ei mâ pasyu.

9. He hawh ta eima râh liata hmô tlô beih leipa – manôh 12 zy ta kô kha liata hlaotloh ngâlâh châ leipa ta ataopha patluapa nama y theipa he eima râ ta eima châ palaikhei hmeiseih. Hmialâ nama sie lymâna awpa liata, diathlâ leipa ta taopha via lymâ awpa ta khokheina sâh chaipa ei cha hlâ ei.

10.  Atakô liata Mizoram pôpalôhpa ta pahno thei awpa ta Siaha College tawhta Topper avaw hlao thei pi ta, he he Principal nata ahrialâhpazy hleikhô ta O lâ liata nô nata paw zy – nama zydua hriapasana vâta a châ tah leithei vana; nama zydua chô liata alynabie ei cha hlâ ei.

11. Marasaw hluhpi achu ngâhaipazy hry liata he hawh ta taopha patluapa eima vaw y theipa he Khazohpa byhnâ a châ tah leithei vana; keimo daihti liata cha 2nd Division laita pass awpa he hmo rairu ngaitapa châ ta, keima chhochhi cha MA lia ngâlâh 2nd Division liata ei pass thei chyuchyuhpa a châ. 

12. Hmialâ daihti liata Officer hmâtlâh châpa, Contractor rônahpa nata sawhkhâ rai nano nanopa hriatuhpa avaw châ laih awpa châ ei chi ta, râh luhpazy dei ngâlâh he eima râh châta rai hriatuhpa châ leipa ei ta, sawhkhâ rai nata contractor nahzy he eima râh châta rai hriapazy he ta taotheina hluhpi ama hnei tahpa my leipa ta achuna he kyh totie liata Mararâh hmahsiena apatlôsatuhpa a châ tahpa my leipa ta nâmo pa 12 pazy ngâlâh châ leipa ta eima râh achungâhaipa zydua, tiama papua rili awpa ta khokheina sâh chaipa ei châ hlâ ei.

13. Programme pha kawpa apachhuahpanohtuhpa MSO General Headquarters nôpapazy hnoh ta alynabie reih chanei na ta, MSO he tlâh parei mawh sy.

Puhpa Zakhai ta he ataopha patluapa manôh 12 zy hnoh ta alykheina châta phusâ Rs.1,000/- chyua hlâ ei. 

(Written by BeiRôkhu Beitâ, AITO, MADC).