PRESS RELEASE

No.38/2020

Puhpa N.Zakhai, Hon’ble CEM ta râhri liata khih VLTF thokhazy tly

SIAHA, 2 Patô, 2020, Pachynoh – Puhpa N. Zakhai, Hon’ble Chief Executive Member (CEM), Mara Autonomous District Council (MADC) ta Siaha District ôna chhôh liata Village Level Task Force (VLTF) thokhazy a tly.

Siaha tawhta zâhnia târi 1 Patô, 2020, Chutynoh ta athaopa châ ta, Ahmypi, Laki, Lôpu nata Khaikhy khih zy tlypa châ ta, India râhri chhâna, Ralie (Myanmar) khih ria-ai (opposite) liata Ralie (India) Check Post (E & F Dep’t, MADC) chhao tlypa châ ta, Laki khih liata ariepa ta atanoh kha apalâ kawpa ta Siaha kaw tlôpa a châ.

A noh 1-na noh liata Ahmyhpi liata my pati vaw taopa ei ta, he liata VLTF nata khitlâh nôpawpazy apakyhna hneipa châ ta, my pati chhao ama vaw taopa hra. Lôpu VLTF zy ta zâ pati avaw chhuanoh ei ta, a noh 2-na noh kaw sie my liata Laki VLTF zy ta my pati amâ chhuanohpa hra.

He khitlyna liata a chapiapa VLTF zy cha tly laihpa châ ta, baona sôh nata Facemask zy chhao, âryhpaohna hawh ta pie laihpa a châ hra. Ahmypi, Laki, Lôpu nata Khaikhy khih liazy ta biereina chyupa hneipa châ ta, biereipa cha khitlâh zawpi thei thei awpa ta VLTF zy ta ryhraona pha kawpa vaw tao ei ta, loudspeaker hmâ lymâpa a châ.

Official lâ tawhta Puhpa Beirokhu Beita, I & PO, Puhpa Syuhlô Beichakhei Mara, PS to CEM, Puhpa Lalnunfela, PSO to CEM, Puhpa L. Khai-U (I&P Dep’t) zy ta zi ei ta, Tipa ‘V’ tawhta Puhpa T. Seido, MDC, Laki biatuhpa nata Puhpa K. Sachai zy ta CEM zachhihpa he ama zi hra.

Puhpa N. Zakhai bierei peimawhpa thokhazy:-

1. Ahmiatua ta, MADC vyuhpa ta anaohna Samaw ei cha hlâ chyu ei. He hawhta daihti phapa nata hnatlâna pha kawpa nâ pie tuhpa eima Khazohpa hnoh ta alynabie reih na ta, biereina daihti khochhih kawpa nâ patohpatia tuhpa VLTF Committee zy hnoh ta alynabie ei reih. 

2. COVID-19 pasana hri chichhih kawpa he China râh tawhta â vaw thao tawhta thla 2 chhao ryu leipa ta khizaw râh peimawh viapa zydua cha tlai/chahryh khai ha ta, keimo India râh nata Mizoram chhao thata eima vaw tao haw. He pasana hri tawhta eimâ vaw boh thei nawpa ta sawhkhâ biepiepazy azyh tuhpa VLTF nata zawpizy hnoh ta alynabie reih na ta, a eih pachaipa ta Mararâh, international border liata apahrâpa khih liata tiama kawpa ta duty pa zydua hnoh ta alynabie ei reih hmeiseih.

3. Marapazy pi he eima mahnô mahpaw chhâ daihti liata cha ativypa chyhsa, pachhyu-mahrâpa, chariah luh alapa chyhsa eima châ; khizaw hmah vaw sie laih ta, atanoh liata deikua keimo sasyh ta ativy thei leipa zyzua eima y pathao haw; he vâta eima Mararâh pôpalôhpa ta tao pi ta, ativyna kyh liata hmahsie awpa hluhpi eima hnei haw. Eimâ vaw tivy thei nawpa ta eima hria pasa awpa apeimawh hmeiseih bâ.

4. Atahmâ COVID-19 vâta eima râh ta rairuna eimâ tyh haino he ta khokhei pa-eihpa tly ma, party mo nata sa saihei viapa tlyma tao daihti châ leipa ta, he hawhpa eima tao awpa châ hra vei. Eima khih/vaih nata tlâ liata nôhmei hârâ riethei, sipasapa nata niebaw liata rairuna atyh awpa ta eima pahnopazy cha biatuhpa MDC/MLA zy chho thlâh leipa ta VLTF zy liata tlao report pa ta âmo ta abyuhna hawh ta biehnei tuhpa nata ryureih tuhpazy siepahliepa ta hmah ama la awpa a châ. 

5. Kô a sie hapa liata lyu tao eimâ vaw pahâsai chy hapa chhao ta atakô cha, atheipa maih lyu tao chyu si la, lyu ava hmâ leipazy ta kâ-u phaih/pathaipa ta ataona dâh pachâ chyu suh u. Khih thokha liata cha atahmâ he lyu vapa ta sâh/chhâmeih nata chichei bialo hropazy chei amâ chhuah tahpa vaw pahno pi ta, aly’pa a châ hmeiseih. He nahzy he âmo kyh amâ pachâpa dei châ leipa ta, eima chhôhkha, khitlâh nata ti nata râh leilôsawzy kyhpachâna vâta a châ tah leithei vana, ama hriapasana vâta zana ei hlâ ei.

6. Sahdô ahneipazy ta eima sahdô liata chichei/theilâpa chhei nawpa ta aruapa ta a châ khiah niethei bawthei awpa a châpa maih chhei/chei chyu awpa ta eimâ haw hmeiseih; bia chi nano nanopa, bâhla etc. zy he eima sahdô tawhta hria papua achhuah chyu suh u.

7. Leipalie ahneipazy ta, atakô cha su parua rai rai leipa ta azydua ta palie achhuah chyu awpa ta ahaw pi ta, biatuhpa MDC nata MLA zy ryhraona hawh ta leipalie apalie ryhpaoh thei lei awpazy châta ryhpaohna tluakhei awpa ta hmah la ngâhaipa châ ta, he kyh liata hmah lana a y ti ta khitlâh nôpaw VC nahzy nahta apha kawpa ta hrialâh awpa ta eimâ haw hmeiseih hra.

8. MADC sawhkhâ he ta tao theipa hnei chyh kaw hra sala Mizoram sawhkhâ nata India sawhkhâ phana zawhzi ta eima District liata ahy hmahta nie chaheih patluapa ama y awpa pasaih aw mapi; eima theina rakha hawhta Mara zawpizy eimâ deichhy lymâ aw.

9. Eima MADC ry liata sawhkhâ rai hriapazy apasaih ngaita ei ta, thlakha hlao tawhta 3% (basic pay) cha CEM’s Relief Fund châta vaw hlâ ei ta, eimâ ly ngaita; eima sawhkhâ rai hriapazy he ta Mararâh liata niebaw phahla thei awpazy miah ama mokhei lymâ tahpa pahno si la, abyuhna hawhta miah ama bao via lymâ nahta eima hnabeiseih hra. He sô ama vaw thyupa tawhta sahphâ Bag 1300 (Quintal 700 daihmâ) chaleipa ta atahmâ he biatuhpa MDC zy siepahliepa ta rai papua ngâ haipa a châ.

10. Lockdown pathao tuana daihti liata MDC bia 25 liata bia chyu liata maluh mopâpa ta tlaw 80,000/- & tlaw 1,00,000/- chyu rai hapa a châ hra; he dei châ leipa ta biatuhpazy ta ama biazy chahlô cha-eipa ta nodi dâhphipa ama y lei nawpa ta ama hnei rakha chyu hawh ta deichhyna rai ama hria lymâ hra.

11. Biatuhpa MDC zy pi ta, eima bia chyuzy, atahmâ tahpa hlâta hluhvia chahlô awpa eima khoh kaw tarawpa ta, sawhkhâ ta Lockdown a phuah hapa vâta VLTF zy siepahliepa ta khô pua byuh ta, he kyh liata dâh parao awpa ahy hmahta eima khoh lei vâta eima bia lâ zy chhao, thokha cha, zawpi hnabeiseihpa nata keimo tlai chhao ta eima khona dâh hawhta alâ thei mapi; anodeikua vâhnei chhih kawpa ta Social Media zawhzi nata Mobile phone zy eima vaw hnei ryhpaoh chho laih khai vâta eima bia chyu liata rairunazy cha phone hmâpa ta eima vaw pahno thei lymâ hra. Sawhkhâ ahawna hawhta apeimawh tu leina liata khi tlyh lei awpa tahpa a châna hawh ta bia lâ liata zawpizy nata a keimo bawlawpa chhao khitly he eima vaw tao hluh tu leipa a châ. He kyh liata kho akhi leina zydua liata pachâthaina eimâ haw hmeiseih.

12. Khazoh ngiachhiena vâta Marasawzy chhao atahmâ cha Mararâh lia ngâlâh dei châ leipa ta Mawrâh nata India State su nano nanopazy liata eima vaw y laih lymâ haw; eima nawhta nawh, phai lâ liata châ chupa nata rai hriapa hluhpi ama y tahpachhao eima pahno. Atahmâ daihti rairu kawpa liata eima vânazy pasa pachai ta, eima hnoh ta y thei chyu ei sala tahpa eima khoh kaw.   Anodeikua, hri chi chhihpa tawhta eimâ vaw boh thei nawpa ta ama yna chyu liata y chy awpa tahpa Sawhkhâ bie a châ. India maw nochhi (North East) State liata a ypazy deikua atahmâ he, sawhkhâ pasaina hawhta ama kaw tlô thei nawpa ta sawhkhâ pyly ta hmah a la ngâ hai. Thokha cha atahmâ he Siaha akaw ngia pathao haw ei ta, mo hropazy chhao ryhraona taopa ta thlai ama kaw tlô thei nawpa ta thlahchhâ eima bao hai. 

13. India maw nochhi achâ leipa State liata a y ngâhaipazy deikua sawhkhâ ta ryhraona a tao mâh lei vâta ama yna su chyu liata ama y awpa byuh chy ta. Thokha cha rairuna amâ tyh hleikhô ta no-ai chhao ama tah kaw sai bâ tahpa bie daopa a châ. Keimo, ama chhôhkha, nô nata paw zy ta ama kyh eima pachâ kawpa hawhta sawhkhâ chhao ta âmo kyh pachâ kaw ta, State to ta ama mo nata sa zy cha ama buakhei chyu. Mizoram chhao, phai lâta a y ngâhaipazy mohôhna kyh liata hmah thata la ta, sôh nata thih chhao deichhyna ama pie tahpa bie daopa a châ. Chavâta eima pachâ chhie leipa sa la, thlahchhâ bao hri awpa ta eimâ pasyu.

14. Khazohpa ypâna vâta Mararâh liata a y ngâhaipazy pi ta COVID-19 akiahpa eima y lei vâta eima District cha Green Zone (aveipa y leina su) ta phuahpa vaw châ ta, vâhnei â chhih hmeiseih. He hawhta a châ no ta, he hri chi chhihpa he eima râh liata â vaw ngia lei nawpa ta eima râhri he apeimawh kawpa tahpa eima pahno chyu vâta atahmâ he VLTF zy ta riah vaihtuhpa hawh ta râhri liata ariepa ta eima theina hawh ta eima râh ôna chyu eima vaih lymâpa a châ. 

15. Khaizaw adaohpi ei 2-na liata cha G-Force zy kha chariah adyuhtuhpa châ ei ta, keimo daihti lia deikua Village Level Task Force zy cha chariah adyuh tuhpa ama vaw châ haw; Khazohpa Biehrai Pathaihpa liata eima hmôpa potlana he, atahmâ tahpa he châ vei tah thei rimâ’pa châ vei. 

16. Puhpa Donald Trump, US President ta cha China râh liata COVID-19 hri ama veipa a vaw pahno thaoh no ta kahrao hriabu chi kha hawhta pachâ ta, la serious vei tahpa ama reih; atahmâ deikua cha USA liata aveipa hluh chai bâ ei ta, atanoh taihta chyhsa 65,000 hlei ama thikhei hapa vâta a pachârôh kaw tahpa pahnopa châ ta, China maochhiena reikah a papua pathao haw. He hri chichhihpa he ta Khizaw liata râh hneirôpa nata eima ngâ viapa râh USA, Great Britain, France, Italy etc. zy â nua khiah ma tah thei awpa ta he râh zy liata thata vei ei ta, ama thikhei hluh kaw bâ tahpa eima pahno. Chavâta COVID-19 he saiso nawpa ta hmâ awpa châ leipa ta, avei hapazy mohôhna he India phusâ achyh chai ta Rs.8.00 Lakhs abyuh tahpa a châ. Eima râ liata ahy tly ma vaw vei pathlei ha sa la, sôh lâta pachâpa ta eimâ mohôh thei tlâ nahta pangiasa achhih vei. Chavâta, eima vei lei nawpa ta eimâ vai awpa he eima peimawh hmeiseihpa a châ.

17. NGO zy nata sawhkhâ hriaparaohna chhao apha tahpa reikah dei châ leipa ta ei mo tlai ta ei vaw hmô hra vâta ei ly kaw; Râhri liata VLTF nahzy, tiama kawpa ta duty pazao lymâ awpa ta châ haw ei na ta, duty kyh liata rairuna nama hnei pathlei khiah bie hneituhpazy lâ thlai tlôkhei u la, MADC chhao ta eima theina rakha hawhta eima cha deichhy lymâ aw tahpa miah pahno khei awpa ta ei châ haw ei.

18. Eima mo pakha, chhôhkha, khitlâh nata Awnanopazy ta he pasana hri chhichhihpa tawhta eimâ vaw boh thei nawpa ta thlahchhâ chyu ei si la, Khazohpa ta ryureih tuh awpa ta miah a piepa sawhkhâ biezy zyh pazao lymâ awpa ta apasyu pi ta, Border area liata VLTF zy ta tiama papua via lymâ awpa ta ahaw pi ta. Chadei châ leipa ta Lockdown kho lâ ta chakâhna avaw tlô thei awpa tawhta avaih nawpa ta tiama kawpa ta hmah la chyu awpa ta eimâ haw hmeiseih.

CEM zachhihpa Puhpa N. Zakhai ta Ahmypi, Laki, Lôpu, Khaikhy VLTF zy ta apakyhna daihti pha kawpa hleikhô ta niedo nata tlôna pha kawpazy ama vaw patohpatia vâta alynabie reih ta, khitlyna liata avaw daodotuhpa khihsawzy nata apachaipa ta border area liata VLTF zy hnoh ta alynabie a reih.

Issued by:- 

Information & Publicity Department

Mara Autonomous District Council

Siaha.