PRESS RELEASE

NO.32/2022

 

SIAHA, 29 Pamih, 2022 – Atanoh dawh 12:00 PM liata MADC Golden Jubilee pahyna programme ahmâna Chief Guest Puhpa N. Zakhai, Hon'ble CEM, MADC biereipa ary liata palâsapa a châ:-

 

Mara Autonomous District Council  Kô 50 a tlohna Golden Jubilee hmâh thei awpa ta byhnâ maniah pietuhpa eima Beipa Zisu Krista moh ta nama zydua ta ei châ naoh ei.

  

Chairman zachhihpa, ei hrialâhpa Executive Members nata Member of District Council zy,  MADC Staff zy nata Mara zawpi zydua MADC Golden Jubilee moh ta Samaw ei chahlâ ei.

  

Atanoh he Marasawzy ta eima râh tah thei awpa ta ryureina no eihpa eima hnei tawhta kô 50 na châ ta, eima lyna noh peimawh ngaitapa a châ. Apachaihpa ta Mara râh châta ei hrialâhpa MDC zy, NGO zy, Awnanopazy,  Mara zawpi nata Sawhkhâ rai hriapa zydua hnoh ta he MADC Golden Jubilee pahyna daihti rôhnapa liana heta Mara Autonomous District Council vyuhpa ta châ vaw ly ei na ta, he Golden Jubilee he aly kawpa ta hmâh chyu awpa ta khokheina ei chahlâ ei.

 

Atanoh ta daihti rôhna ngaitapa eima hmȃh theina chhȃpazy he eima pachȃ pasia awpa apha kawpa ta ei pahno; eima my thei lei awpa hluhpi a y.

 

 Abeipa ta Missionary Rev.R.A Lorrain nata a chhôhkhazy maniah kaw tuapa ta thâtih pha ta maniah pakhaihsa ta, byhnâ hluhpi a daopa eima châ. Khazohpa baona ta Mara râh nôpaw hmiatuapazy hmahlana nata hria pasana zydua chhao my thei rimâ awpa châ ma pi. Arôhna ngaita. Eima Missionary nahzy deichhyna nata paso pakâna vâta Mara Beizy sie pahliepa ta ryureina eih hrâhpa hnei awpa ta vaw hiah ei ta, cha zawhzi ta atanoh, he duahmo liata avaw duahpa eima châ. 

 

Chavâta atanoh he Ryureina eih hrâhpa eima hmô thei n’awpa ta thaby maniah pathaopatuhpa zydua nata Autonomous District Council eima hnei thei n’awpa ta P.L Regional Council daihti no ta ama Sawhkhâ rai chhao bâhsai ngȃhpa ta Boycott pa nah zydua thokha vaw y tlâ khao hravei ei sala, Zana nata palyupalihna ei hlâ ei.

 

Hlâno Marapa hro:

 

Mara râh he chi nata pho chyh kawpa ahmaoh pakhyna râh châ ta, reih chi nano nanopa cheih chyupa châ pi ta, eima reih cheihpazy deikua a thei khai theipa eima châ. Uhthei nohrâhpa nata pawhrâh viapazy chiza thai kawpa,   saiheina nata kyhpachâna a hnei kawpa chi nata pho eima châ. 

 

Khahlâ no tawhta Mara râh  he ahy ryureina ry lia hmâh ta y bei leipa pi ta; Mara Beizy ta amâ Beina khih no châ liata ryureih ei ta, bie ama hnei tyh. Kô 1924 rachhôh liana khata British sawhkhâ ryureina ry liata a y khai chyu chyuhpa eima châ.

Marasawzy cha chyhsa veihseih palôhâhpa, saiheina ahnei kawpa, ngâchhihpa nata riahphapa, ti nata râh kyhpachâ kaw tyhpa eima châ.

 

MADC lâthlôh: 

  

Atanoh he MADC eima vaw hnei thei dâh lâthlôh a pachhoh ta vaw rei awpa ei khoh; India ta British ryureina puasai awpa ta aphora lichih Kô 1945 rachhôh liana kha ta Mara Beizy ta Mara râh he ryureina no-eihpa hnei hr’awpa ta hmah vaw la pathao hra ei ta, Târi 1st April 1945 khata Mara Bei 25 zy ta Saikao khih liata ama tlô pakhy. He daihti liata ryureina no-eihpa hnei n’awpa kyh Bie peimawh kawpa ama pathlupa cha Puhpa Bowman, Additional Superintendent of South Lushei Hill, Lolei hnohta hiana pangia ei ta, achhyna ama hmô leipa vȃta Târi 3rd November 1945 liata tlô pakhy heih ei ta, he liana deikua cha a eino n’awpa ta Puhpa L.L Peters Superintendent of Lushei Hills, Aizawl liata ama pangia ha bâ.

 

Ei thoh (3) n’awpa ta Târi 1st April 1947 liana khata hiana pangia heihpa châ ta, he lia chhochi cha Chin Hills, Lushei Hills, Arakan Hills Tracts liata Marasaw ypa zydua Crown Colony ta y awpa ta ama vaw hiah.

 

He ryureina no eihhrâhpa eima hnei thei n’awpa ta Puhpa  Chhohmo Hlychho, Puhpa Vako nata ama hrialâhpazy ta Mara râh châta ama hriapasanazy he my thei rimâ awpa châ vei.

 

Adyuhpina ei 2 na (World War – II) vaw chhâ ta, India cha British ryueina tawhta Independence thlai a vaw hmô ha hra. India Dâhpipa (Constitution) phora awpa ta Constituent Assembly thlai paduapa châ ta, Dr.BR. Ambedkar cha Chairman a châ. Chatana chata India sawhkhâ ta Constitution (Schedule Tribes) Order 1950 ry liata Lakher (Mara) cha Tribal Pho khata sopa eima vaw châ haw. India sawhkhâ ta Lushei phozy nata â raoh hâh kawpa ta maniah mohôh ta; Clerical post chhao Lakher Clerk nata Lushei Clerk tahpa ta piepa eima vaw châ.

 

Bordoloi Commission:

 

1.  North East Tribal zy achu pasiana rai hriatuhpa  Chairman Puhpa Gopinath Bordoloi, achyuna zie ta Bordoloi Commission ta North East Tribal zy he pho lai viapazy ta ama dihsao lei n’awpa ta Autonomous District Council piepa châ sala, pho chynawh via pachhuahpazy cha Regional Council pie awpa ta a vaw Recommend hra. 

 

2.  Kô 1948 liata Pawi – Lakher Convention cha Lytlai (Lawngtlai) liata hneipa châ ta, Târi 25th October 1950 liata Amobyu khih liata a tyhpakhy heihpa a châ. He liata Pawi – Lakher Tribal Union Party paduapa a châ.

 

3.  Târi 20th May 1952 liata Council padua theina Order pua ta, Târi 23rd April 1953 liana khata Pawi – Lakher Regional Council chhao cha Lôlei (Lunglei) liata pahypa a vaw châ haw. Puhpa B.W.Roy, S.D.O Lolei (Lunglei) cha Chief Executive Member ta so chypa  a châ.

 

4.  P.L Regional Council Election hmiatua chaipa cha kô 1953 liata hneipa châ ta, Puhpa C.Zochhuma cha Chief Executive Member ta atlypa a châ.

 

Mara Freedom Party:

  

Kô 1963 December liata Zyhno khih liata Mara Freedom Party paduapa vaw châ ta, he liata Chhithatuhpazy cha;

 

1). President    : Puhpa V.Hlychho 

 

2). Vice President   : Puhpa Hiphei 

 

3). General Secretary  : Puhpa Mylai Hlychho 

 

4). Assistant General Secretary: Puhpa S.Pailei 

 

5). Finance Secretary  : Puhpa Chhobi

 

6) Treasurer    : Puhpa Sialua Hlychho  zy ama cha.

 

Chatana chata kô 1964 liata District Council eihrâhpa hiana cha Assam Chief Minister Puhpa B.P Chaliha hnohta pangiapa châ ta, hlaotlohna chara ta hmôpa a châ leipa vâta Târi 5th February 1965 my Dawh 10 pa ta P.L Regional Council tawhta Boycott na phuahpa a vaw châ. He daihti no ta Marasawzy rei eima raoh zie nata chhithatuhpazy ama pie pasana zie he reithai tlâh châ ta, arôhna ngaita. My thei awpa châ va ei.

 

Ryureina eih hrȃhpa eima hmô haw:

 

1.  Chatana chata Târi 2nd April 1972 liata Mizoram Administrator Puhpa J.C. Das ta Regional Council pachhaihna nata ADC 3 paduana Order hmô ta, Târi 29th April 1972 khata Pawi – Lakher Regional Council cha Pawi District Council, Lakher District Council nata Chakma District Council tahpa eima vaw châ haw.

 

2.  Lakher District Council cha Thla 3 chhôh chhihtha chy awpa châta  hezy he raopa ama châ;

 

1). Puhpa Zakhu Hlychho: Chief Executive Member

 

2). Puhpa K. Khosa  : Chairman

 

3). Puhpa S. Hiato  : Executive Member

 

4). Puhpa S. Pailei  : Executive Member

 

5). Puhpa Zavai  : Nominated Member

 

6). Puhpa NT. Leipo  : Nominated Member  zy ama chȃ.

 

 Lakher District Council Election hmiatua chaipa:

 

1.   Kô 1972 December lia khata General Election hmiatua chaipa cha thlai hneipa châ ta, Constituency 9 a y. Chatana chata Mara zawpi vyuhpa ta eima tly patlohpazy cha Târi 24th January 1973 liana khata Executive paryhpa châ ta;

 

1). Chief Executive Member : Puhpa S.Hiato 

 

2). Chairman    : Puhpa S.Pailei 

 

3). Dy.Chairman   : Puhpa K.Khosa 

 

4). Executive Member  : Puhpa S.Vadyu

 

5). Executive Member  : Puhpa K.Paichho  zy ama châ.

  

Mizoram ta Union Territory tawhta State pitlohpa lȃta amâ kaw khaih nona khata MADC chhao ta duahmo asâh viapa lâta eimâ khai hra awpa ta eimâ hnabeiseih. Châhrasala Lakher District Council tahpa cha Mara Autonomous District Council tahpa ta thlapa deileipa ta cha hlaotlohna hropa y thei khao vei. Chavâta atanoh taihta bie hneina lai viapa hiapa ta Sixth Schedule to the Constitution Amend awpa ta eima teih ngâpa a châ. Abeipa ta a paryhsa khiata cha eima hlaotloh ngiathia hra aw.

 

1. Atahmâ he, MADC cha Kô 50 na Golden Jubilee vaw châ ha ta, he 11th Term MADC liata chhithatuhpa nata Marasawzy, he daihti phapa ahmâh thei awpa ta byhnâ eima topa he vâhnei a chhih ngaita ta, eimâ ly kaw awpa a châ.

 

2. Atanoh ta ei chakaolâhpazy sai u, Mara Autonomous District Council vyuhpa ta nama zydua ta, he Golden Jubilee he aly kawpa ta hma chyu awpa ta cha hrua ei na ta, khokheina sâh chaipa ei chahlâ chanei ei.

 

Ei châ ly kaw ei.

 

ISSUED BY:-

Information & Publicity Department

Mara Autonomous District Council

Siaha.