PRESS RELEASE

NO.39/2025

SIAHA, 9 Pamih, 2025, Pakhynoh – Atanoh dawh 8:45 AM kha ta Puhpa Nityanand Rai, Hon’ble Union Minister of State for Home Affairs, Government of India cha Siaha kaw tlypa ta, CEM’s Bungalow liata ano dyna nata programme pachhuapanohpa a châ.

Puhpa Nityanand Rai, Hon’ble Union Minister of State Felicitation Programme he Laihsa Ornella Khithie nata Satlia MC. Beichônôchai zy ta thai kawpa ta chhihtha ei ta, daihti thaona liata Puhpa M. Laikaw ta Welcome Address reina daihti hmâh ta, Shri Delson Nôtlia, MDC & National Secretary, Minority Affairs ta reih a palie.

Puhpa Nityanand Rai, Hon’ble Union Minister he Biereina a hnei hlâta Conference Hall liata All NGOs, All Political Party Leaders nata MADC liata Executive Member zy apakyhna a hnei hleikhô ta Siaha DC nata a staff zy nata Mizoram sawhkhâ ry liata Head of Offices, Siaha zy apakyh ta, MADC ry liata Head of Departments zy apakyhna a hnei hra. He khai tawhta CEM’s Bungalow tlyhmia liata biereina a hnei pazi.

Puhpa Nityanand Rai, Hon’ble Union Minister chata biereina a hneipa liata, “Kei he Bihar State liata khihsa rairu kawpa tawhtahpa châ na ta, Primary tawhta Hindi reih sai ta achupa ei châ. Chavâta, nama hmiakô liata English ta rei awpa ei khoh kaw tarawpa ta Hindi he ei Nô reih (Mother tongue) a châ hleikhô ta ei reih chei pahnia viapa a châ vâta nama hmiakô liata Hindi ta ei vaw rei awpa a châ. Vâhnei chhih kawpa ta Prime Minister (PM) Modi nata Puhpa Amit Shah zy khokheina vâta India pôpalôhpa ta Home Minister of State châta na rao ei ta, ei ly hmeiseih; Home Minister hleikhô ta North East India mohôh awpa ta raopa ei châ” tahpa a reih.

Beireina hnei pazao ta, “Zâhnia kha, keima dy awpa ta avaw puapazy za a chhih kaw ei chi ta, keimo thai leipa châ leipa ta, nohkhih â chu lei vâta zâhnia a tlô awpa eima châpa kha tlô thei lei pi ta, chavâta zâhnia a rônah kawpa ta miah vaw dytuhpa zydua chô liata alynabie ei rei hleikhô ta ngiathaina ei châ ha ei.”

“He liata ei dua hlâta NGOs, Political Parties nata hyutuh peimawhpa zydua chhaota apakyhna pha kawpa hnei pi ta, cha liana chata nama rairuna hluhpi reikhoh pi ta, he nama rairuna zydua he Puhpa Modi nata Puhpa Amit Shah zy hnoh ta tlôkhei aw na ta, nama hiapa zydua hlao patlohpa a châ patoh thei nawpa ta hmah ei vaw la aw.”

“2014 tawhta Puhpa Modi a vaw sawhkhâ rakha tawhta Maw Nochhi lâta a pahrâpazy he cha pachâ peimawh kaw ei ta, India Maw Nochhi hmah a sie lei khiah India he hmahsiena y aw vei tahpa keimo Modi sawhkhâ he ta pahnopasia pi ta, chavâta Prime Minister Modi he ta India Maw Nochhi hmah pasiesa awpa he ta kao hluhpi liata hmahlana hnei lymâ ta, kô 10 a vaw sie hapa liata India râh su nano nanopa liatahpa hawhta hmahsiena he nama vaw hmô laih bâ hrapa a châ.”

“Council ta biehneina sâh viapa nama tahpa he Central sawhkhâ chhao ta pachâ peimawh kaw ta, he kyh he Prime Minister chhihthana ry liata ei hluhpi rei hapa châ ta, he he nâmo ta nama pachâ peimawhpa hawhta keimo chhao pachâ peimawh pi ta, a chatliena lâta pass pa a châ aw.”

“Nama pahrâna su he, su pha kawpa a châ khô lâ ta Myanmar nata Bangladesh râh-ri lâ zy liata ypa châ ei chi ta, India râh hmahsie nawpa liata nâmo he peimawh kaw ei chi ta, chatho ta India râh pabohsana kyh liata eima Force nata Police nahzy he nâmo zawpi ta nama bao lymâ awpa a peimawh kaw.”

“Puhpa Modi a vaw sawhkhâ tawhta pikheipa reih - Mother Tongue he pachâ peimawh kaw pi ta, chavâta National Education Policy thiehpa liata eima pikheipa reih ta châ a chu thei awpa ta hmahla pi ta, atahmâ tawhta cha Primary tawhta a chuna sâh viapazy taihta eima pikheipa reih ta achu thei bâ awpa ta hmahla ngâhaipa a châ.”

“India râh pôpalôhpa ta Citizenship Amendment Bill buakhei pi ta, eima râh chheipâh liata râh ypa zy liata minority zy ta rairuna thata atyh ei ta, Krizyhpazy chhochhi cha taolana thata atyh ei ta, cha nah râhzy liata khihsa thei leina taihta y ei ta, chacha India sawhkhâ he ta a pachâ peimawh kaw vâta, he ngiachhie achhih kawpa, zyna kyh vâta rairuna atyhpazy India râh liata khotalai kawpa ta ama y thei nawpa ta Citizenship Amendment Bill he Parliament House liata angiakheipa a châ. Kha daihti liata India râh pôpalôhpa ta, a eihpachaipa ta Party thokhazy ta miah reipachhie ei ta, anodeikua, atahmâ cha chi â chhih leizie ahmôtuhpa nata apadituhpazy châ pi ta, atanoh lia cha India he, Khizaw râh zydua liata minority nata zyna kyh liata chynawh viapa, rairuna atyhpazy ta India râh he ama châta râh pha chaipa ta tao pi ta, chahawhta rairuna atyhpa hluhpizy cha, India râh liata yna phapa ama paryh haipa a châ.”

“Rairuna namâ tyhpazy cha, athiapawh, nama hyutuhpazy nahta eimâ pakyhna liata pahno khai ha bâ na ta, Delhi ei tlô tawhta hmah ei vaw la pâ lymâ aw. Atanoh, he liata avaw hlaopazy hnohta ei haw khohpa cha, atanoh he PM Modi he ta India râh châta rai thata hria ta, dâh pha kawpa ry liata India râh he khizaw liata râh rônah chaipa tao a chhuah ta, chavâta he liata avypakhypazy, Prime Minister Modi raihria phapazy he vaw reihpachhuah lymâ awpa ta châ haw ei na ta, atanoh, he meeting liata a vaw hlaopa zydua hnoh ta anaohna ei cha hlâ chanei ei” tahpa ta biereina a hnei.

Puhpa Nityanand Rai, Hon’ble Union Minister of State for Home Affairs, Government of India he zâhnia târi 9.4.2025, dawh 3:30 PM kha ta Siaha kaw tlô awpa ta hnabeiseihpa châ ta, nohkhih â chu lei vâta Helicopter a kaw kiapa cha palie pathi ha ta, atamy liata a kaw sie pathi heihpa  châ.

He Puhpa Nityanand Rai, Hon’ble Union Minister of State Felicitation Programme liata All MDCs (MADC), All Ex-MLAs & Ex-MDCs, All Leaders of Political Parties, Siaha, All Office Bearers of General Headquarters: MTP, MCHP, MSO & MHP, All Office Bearers of MJA Siaha District zy hleikhô ta MADC ry liata Officers nata Staff zydua hrua khaipa ama châna hawhta amâ hlaopha kawpa ta pahnopa a châ.

Puhpa Nityanand Rai, Hon’ble Union Minister of State he atanoh zâlâ liata Chakma Autonomous District Council tly aw ta, atanoh pyly ta Delhi pangaipa ta a sie awpa a châ.

ISSUED BY:

Information & Publicity Department

Mara Autonomous District Council

Siaha.