PRESS RELEASE

NO.143/2022

SIAHA, 8 Phiata, 2022, Pachyhnoh - Atamy dawh 11:00 Am pa ta Zyhno Tlyliah liata MTP Branch: Zyhno pachhuahpanohpa ta 68th MTP Rising Day programme ahmâpa châ ta, MADC CEM i/c maophaohna a chaba haipa Puhpa Nahlô Solo, Hon’ble EM i/c Revenue, MADC cha Khichhai laipa châpa ta programme a hmâkhei ei. 

Puhpa Nahlo Solo, Hon’ble EM he Zyhno Tlytliah â ngia nawpa liata vaw dypa ta MTP Zyhno ta avaw sy ei ta, ano nata ano azi tuhpa zydua hnoh ta pawpi ri nata Hlichhy Muffler ama vaw pa-ao chyu hleikhô ta, avâ lâ meithei kapa ta Sawlakia kiapa ta arônah kawpa ta vaw dypa a châ. 

Programme he chhaih 2 lâta ahmâpa châ ta, chhaihkhana liata Puhpa M. Kahlei, President ta chhihtha ta, Rev. HT. Beingachhi, ECM Biatuh pastor ta daihti pavaonaa hnei. Laihsa VT. Anita ta Khichhai laipa hnoh ta ‘Citation hlâna hnei ta, Puhpa HT. Vanlalvena, Adviser ta kô 2021-2022 chhôh ta MTP manôh apahâpasy taokheina daihti a hmâh. Puhpa K. Chhihrau, ES, MADC ta hmiapahnosana nata biereina chyupa daihti hmâh ta, Combined Zyhno Hawti Py (ZHP) group sâ 5 apahkypazy ta Pholâ (Hlichhy lâ) ama pamosa. 

Puhpa Nahlô Solo, EM zachhihpa biereina chyupa hnei ta, daihti phapa a pie tuhpa Khazohpa nata MTP nôpawpazy hnoh ta alynabie reih ta, Zyhno MTP ta MTP Rising Day ei 68-na programme a taopa liata avaw hlaopazy hnoh ta anaohna Samaw a hlâ. Ary liata palâsapazy he a bierei tlâhpipa a châ:-

1. ‘Dyhchhiepa vâhnei’ tahpa hawhta eima CEM zachhihpa khitlyna vâta anoh vyuhpa ta atanoh he, he su liata aduah theipa châ na ta, ei ly hmeiseih.

2. Eima Hrosopa Vatia zy, Hrosopa Dania Paw zy, Hrosopa Sado zy ta Khazohpa bie tlâh ama vaw awh kheituana râh a châ. Hrosopazy apabuna su liata cha byhnâ a y ngiathiah tyh.  MADC kô 50 khô lâ he cha Abei Khazohpa ta byhnâ miah a pie aw tahpa he ei vision a châ. Chavâta thyutliapa zydua eimâ mâ awpa nata cha hmahsiena liata chakâ thai hra awpa ta, ahmiatua chai ta bie ei cha ta khoh ei.

3. Nietluana nata râh chakaona vâta Zyhno khih puasai hra ei si la, ei liahri tlona a châ vâta ei vâ kaw tyh; Zyhno liata ei nô & paw zy apabuna nawpa ta thlâ pha ngaitapa apatohpatia tuhpa Zyhno MTP zy hnoh ta, atanoh MTP Rising Day noh liata alynabie ei reih hmeiseih.

4. 12th Term MADC he ta Mararâh Ti nata râh châta eima theina hawhta rai hria achhuah lymâ pi ta, Zyhno lia chhao Revenue Department Site office sa nawpa su, zâhnia Zyhno eima za tlô tawhta mo hapa châ ta, Tagore Cultural Project sa nawpa châta Zyhno Typical Village su cha project tao hapa châ ta, eima Art & Culture Promotion Officer Puhpa JB. Chozah nata a hrialâhpazy tiamana zawhzi ta Foundation Stone chhao atamy kha asu liata eima bô pâ haw. Hmahsiena hropazy chhao a vaw y thei nawpa ta eima MADC nôpawpazy ta hmah la lymâ amâ chhuah.

5. Hlâno cha eima nô & paw nahzy ta lyutaopa ta sâh ta châ eimâ chupa miah chyh ei ta, tahmâ deikua Zyhno ti nata râh liata Âhiah nata Iasoh vaw pha kaw ta, he nahzy nata Diahzy chheipazy hmâpa ta achuna liata hmahsiena nata Economy liata eimâ vaw sosâh via laih heih nahta ei hnabeiseih. 

6. MADC liata Biehneina lai viapa Subject sâ 19, Mizoram sawhkhâ ta miah a pie khai mâh leipazy chhao eima nôpawzy ta hmah la via laih aw ei ta, miah ama vaw pie tita cha eima râh liata châthaipa hluhpi, rai ahnei mâh leipazy châta lâpi â vaw pahy laih awpa a châ.

7. Atanoh liata Zyhno ta District Council miah nama palyupalihna he rônah kaw ta, khati ta ma cha MADC ta Zyhno he palyupalihna eima hneina daihti a y hra nahta ei hnabeiseih kaw. 

8. Ahia zuapa ta châ eimâ chupazy Khazohpa byhnâ miah a piena daihti a vaw tlô hra aw. Chyhsapazy pi ta Chô lâ Khazohpa my lei awpa achâ.

9. Zawpi baona nata deichhyna leipa ta keih a chakâ khai thai leipa ta, chavâta MADC ryureina dyuchhai liata atyuh ngâhaipazy châta Mararâh zawpi ta thlah miah chhâkheipa ta Abeipa lâ byhnâ miah awpa u la tahpa he ei châ haw ei.

10. Atanoh MTP adua ei 68-na eimâ lyna noh liata eima mahnô mahpaw nahzy taozie phapa my leipa ta taopazi lymâ awpa ta Mara Thyutliazy châ haw ei na ta, aly kawpa ta MTP Day ahmâ chyu awpa ta khokheina sâh chaipa ei cha hlâ ei.

Chhaih no (2)-na he ataopasuana ta siekheipa châ ta, Puhpa S. Kheli, Auditor ta chhihtha ta, Puhpa B. Vabeibaoly ta palyupalihna nata alynabie reina daihti hmâh ta, Puhpa A. Chhualai nata Ls. Ruthi Solo zy ta mo pakha hlasana hneipa ta zawpi ama palysa kaw.

Daihti chhâna liata Machâ TT. Pawla, Former President ta thlahchhâna ta, programme pachhâsapa a châ. 

EM zachhihpa he a lapihnô Pihnô C. Thangzuali nata a chhôhkha thokhazy ta zi ei ta, MADC Officials nata Party nôpawpazy chhao ta ama zydua ta manôh 23 zy ta ama zi.

Atakô MTP Day 9.10.2022 he Abeipanoh a châ hapa ta atanoh târi 8.10.2022, Pachynoh liata ahmâpa a châ.

ISSUED BY:

Information & Publicity Department

Mara Autonomous District Council

Siaha.