PRESS RELEASE

NO.95/2022

TIPA, 15 Thlazoh, 2022, Hriatuanoh - Atanoh dawh 10:00 Am pa ta Tipa ‘V’ Tlyliah liata India Independence Day 2022 alyna châta Programme taopa liata Puhpa Nahlô Solo, EM i/c Revenue etc. MADC cha Chief Guest châpa ta National Flag a parai.

Puhpa Nahlô Solo chata atakô India khotalaina atyheihna noh liata Tipa zawpi hmiakô liata â dua theipa cha â lyzie reih ta, Khazohpa hnoh nata zawpi avypa zydua hnoh ta alynabie a reih. Ary liata palâsapazy he atanoh India Independence Day alyna liata a bierei tlâhpi viapazy a châ:-

1. Chief Minister zachhihpa Puhpa Zoramthanga nata ahrialâhpazy tawhta khokheina topa ta atakô India Independence Day alyna Tipa Sub-Division liata eima MADC nôpawpazy ta Khichhai laipa na pachâsa ei ta, eina khokheina ei he aphuh lei atah na ta, ei ly hmeiseih. Mizoram sawhkhâ ta India Independence Day alyna programme a patohpatiana liata MADC chhihthatuhpazy hry tawhta khichhai laipa hmiatua chaipa ei vaw châ thlâhpa he keima châta cha noh ngiatlâh kawpa a châ.

2. Atanoh he British biehneina nata ryureina tawhta khotalaina eima hmô tawhta kô 75 a tlohna châ ta, khotalaina a vaw hmôpapua tuhpa (freedom fighters) zydua chô liata zana chibai a bu pi ta, âmo vâta atanoh khotalaina a hnei theipa eima châ; ama chô liata eimâ ly hmeiseih.

3. India ta khotalaina a hmôpa he keimo maw nochhi lâta chi chynawhpa ypazy pi châta a sôh via pachai heihpa a châ; Marapazy pi he India dâhpipa (Constitition) Sixth Schedule liata miah pahlao ei ta, Khazohpa ta kyh maniah pachâ ngaita ta, eima Missionary Rev. RA. Lorrain nata Mara beizy siepahliepa ta India dâhpipa ataotuhpa Dr. Ambedkar, Dr. Rajendra Prasad, Pandit Jawaharlal Nehru nata Bordaloi Sub-Committee Chairman Gopinath Bordaloi nata JJM Nichols Roy zy hmâpa ta “Sixth Schedule”, mini Constitution tahpa ta ama rei tyhpa cha eima vaw hnei thei haw. He biehneina he pasô si la, adona nata ngâchhihna zy hneina chô ta ryureina eima siekhei awpa he apeimawh hmeiseihpa a châ. Sixth Schedule ta â chhuahna dopa he pipatlohsa awpa ta MADC area liata apahrâpa zawpizy maophaohna a châ tahpa pahno heih suh u.

4. Mizoram chhôh liata a ypa eima châna hawhta State sawhkhâ hrialâh phapa châ awpa he peimawh kaw ta, eima palôhrupa liata khichhai leipa sa la, Tipa Sub-Division lia chhao eima peimawhpazy cha State vyuhpa ta SDO(Civil) miah ama sopa pa liata tlôkhei lymâ suh u. 

5. Atahmâ liata Independence Day he keimo District Council ôna chhôh liata apahrâpazy châta alychhih kawpa achâpa ta ei pahno; eima CM zachhihpa Puhpa Zoramthanga khokheina zawhzi ta eima CEM zy chhao State liata Minister of State nahta duahmo akhopa ta “Order of Precedence” miah taopa ta, Chairman nata EM zy chhao duahmo sâh kawpa liata miah soh ei ta, arônah hmeiseih. He he ta CM ta chi chynawh viapazy kyh miah a pachâzie a palâsa kawpa a châ. Sixth Schedule Paragraph 6 ta biehneina miah a piepa hawhta eima hyutuh chaipa he ta District Council zy he biehneina sâh viapa miah a pie baichhi via awpa ta eima hnabeiseih. Mizoram sawhkhâ ta District Council zy miah a mohôhna dâh he palôtlâh â chhih kawpa a châ.

6. Atanoh, he liata avypakhypazy hnoh ta bietana ei hnei khoh kawpa cha - “India ti nata râh chyhsapa phapa châ achhuah lymâ si la, adona nata ngâchhihpa pachâ peimawh si la, India dâhpipa ta maophaohna miah a piepazy he apha kawpa ta zyh achhuah chyu awpa nata palôhraoh kawpa ta keih chakâ khoh lymâ suh u” tahpa he a châ.

7. India sawhkhâ ta hmah eima sie thei nawpa ta baokhâna programme hro hropa miah taopa ta, baona eima daopazy he apeimawh leipa liata hmâ chakhyh thlâh leipa ta aphahnai thei chaina hawhta programme zy hlao patloh nawpa ta hmâh suh u.

8. Eima Khazohpa Châbu Pathaihpa ta “Khotalaipa châ eichi ta, chârasala nama khotalaina cha molei khu nawpata hmâh leipata, Khazohpa chakaopata y nawpata tlao hmâh teh u.” (1 Pity 2:16) tahpa ta a reipa hawhta eima khotalaina he mo pakha, khitlâh nata eima râh châta â thôh thei chaina hawhta hmâ eimâ chhuah chyu awpa apeimawh hmeiseih.

9. Atanoh India Independence Day 2022 he eima khotalaina atyh heihna noh a châ vâta alypa nata thapha kawpa ta daihti hmâ chyu awpa ta khokheina sâh chaipa ei cha hlâ chyu ei. Ei châ ly kaw ei; JAI HIND.

Puhpa Nahlo Solo, EM zachhihpa he Siaha tawhta MADC Officials thokha nata Party lâ tawhta nôpawpa thokhazy ta ama za zi hra.

ISSUED BY:

Information & Publicity Department

Mara Autonomous District Council

Siaha.