PRESS RELEASE

NO.140/2022

TIPA, 7 Phiata, 2022, Chutynoh - Atanoh dawh 1:30 Pm pa ta Puhpa Nahlô Solo, EM i/c Revenue, MADC ta Tipa DAO Office tlypa ta Officers & Staff zy hnoh ta pasyuna bie reina daihti a hmâh.

Puhpa Nahlô Solo, EM zachhihpa he Puhpa K. Thlalô, DAO Tipa nata a hrialâhpazy ta pawpi ri chhao ta vaw dy ei ta, DAO’s Conference Hall liata dyna nata programme chyupa vaw taopa ei ta, Puhpa K. Thlalô ta chhihtha ta, Kmc. S. Chatlua, Secretary, Staff Association ta pavaosana a hnei.

Puhpa Nahlo Solo, Hon’ble EM chata biereina chyupa daihti hmâh ta, “Marasawzy ryureina eihrâhpa hneipa ta sasyh ativy theina chhaichhi peimawh kawpa chhiekhei theina taihta biehneina hnei pi ta, Tipa liata Revenue Officer & staff zy ta chhiekheina kyh liata tiama papua lymâ awpa ta ei châ haw ei” tahpa ta ahawna a tao.

“Eima Missionary  RA. Lorrain nah nôvahzy ta ‘Adona nata ngâchhihpa ta vaw sie teh u’ tahpa bie miah ama tapa hawhta kei chhao adopa nata ngâchhihpa ta sie achhuah na ta, nâmo chhao adona nata ngâchhihpa ta sie achhuah awpa ta châ haw ei na ta, he hawhta eima sie khiah Mararâh he hmah a sie cheingei aw.”

“Eima Missionary Vaili mahpaw byhnâ vaw tlô lymâ ta, motor lâpi pakawh abyuh vâta râh, Ohmo nata O zy compensate vaw y laih ta, atahmâ chhao thlai avaw y heih awpa a y. Âdo leipa ta râh thliepa a y tyh ta, atahmâ tawhta cha âdo kawpa ta râh thlie awpa ta, a eihpachaipa ta Surveyor nahzy ei châ haw ei” tahpa ta pasyunabie pha kawpa a reih.

Puhpa Nahlô Solo chata Tipa DAO office liata Staff adaih leina   a pahnopa cha a theina hawhta mokhei awpa â chhuahzie a reih hra.

Puhpa Pheiki Solo, Sr. R&SO chhao biereina chyupa hnei ta, EM zachhihpa avaw zipazyhmiapahnosana a hnei pâ hra.

Puhpa Nahlo Solo, EM zachhihpa he mylâ târi 8.10.2022, Pachynoh ta Zyhno liata 68th MTP Rising Day ahmâ awpa liata Chief Guest ta hruapa a châ vâta atamy kha Siaha tawhta athao ta, Tipa DAO office he a tly pâpa châ ta, a lahpinô Pihnô C. Thangzuali ta zi ta, MADC Officers & staff zy hleikhô ta party lâ tawhta thokhazy ta ama zi hra.

ISSUED BY:

Information & Publicity Department

Mara Autonomous District Council

Siaha.