SIAHA, 29 Chhiepa, Chutynoh (MNN) - Atamy dawh 11:30 Am liana kha ta Art & Culture(A & C) Department, MADC ta apachhuahpanohpa “Nature Study & Rafting Expedition 2018” on Beinô River “Documentary Film” cha Puhpa N. Zakhai, CEM, MADC ta MADC Forest Department Hall liata palâhâhna a hnei.
He Programme he Puhpa JB. Chozah, A & C Officer, MADC ta chhihtha ta, Kmc. HC. Beikhai, Sr. Research Officer, A & C Department ta Devotion a hmâh.
Adventure Club(BYAC) tawhta Leader Puhpa Medila Khaila ta ama hmah lana Report pie ta, Puhpa K. Ngiachhie, H.A, A & C Department ta Vote of Thanks reina daihti a hmâh hra.
He Rafting he Kaochao Bridge tawhta pathaopa châ ta, Lômasu khih kiahpâh liata “Azinô Lih” liata pachhâsapa a châ.
He hawhpa Documentary Film he Mizoram pôpalôhpa liata ei khana a châpa ta pahnopa châ ta, eima râh lia chhao ta a ei khana a châ.
Puhpa N. Zakhai biereipa thokhazy:-
1. A & C Department he keima department topa a châna hawh ta he hawh ta eima staff zy ta eima Mararâh châta hmahlana pha kawpa, hmia amâ vaw sahpa he arônah tah na ta, A & C Department liata Officer nata Staff zydua hnoh ta alyna bie ei reih.
2. MADC ta Department hluhpi hnei pi ta, he hry liata Art & Culture Department nata Land Revenue & Settlement Department zy he keimo tlai ta eimâ tyuphâhpa aleilô nata râh châ ta, Marasawzy ta pasôna châ eima pahno awpa apeimawh ngaita kaw.
3. Indian Constitution liata Sixth Scheduled vâta hmahsiena thata hnei pi ya, development zy he Department ngâlâh châta châ leipa ta arâh leilô sawzy ta pasô thai lymâ achhuah suh u.
4. He hawh ta A & C Department ta eima râh liata hmo sôhpazy zawpi lâ liata chaluah papua ta palâsa awpa avaw châ theipa he arônah eitah kaw. He he ta saw tliapazy ta eima râh leilô khochhih kawpa pasôna châh vaw pahno via lymâ aw ei ta, chi hro pho hropazy taihta eima râh vaw tly khohna ama hnei nahta ei hnabeiseih kaw.
5. Eima râh thyutliapazy hry liata he hawhpa lâchhâh apahâhpazy ta Adventure Club paduana châh zy vaw pahno ei ta, ama chô liata alynabie ei reih.
6. Lômasu khih kiah liata Saphao, Khazohpa kuzô a châpa he, atahmâ cha Social Media nata Internet liata sopa a châ vâta chyhsa mo la kaw ta, chyhsa hluhpi ta tly ama byuh kaw tahpa eima pahno; hmialâ daihti liata cha Tourist nahzy eima râh ama vaw tly chhâna awpa avaw châ nahta ei hnabeiseih.
7. Atanoh liata he Video eima palâhâhpa avaw mohtuhpazy ta Mararâh liata chô Khazoh kuhria rônah ngaitapa ama vaw hmo awpa he arônah tah na ta, eima râh leilô hneirônazy khizaw suto tawhta mo thei awpa a châ vâta ei ly ngaita. He video a vaw mohtuhpa zydua hnoh ta Mararâh su ngiatlâhpa eima vaw palâsapazy ei kha chhâ vaw tly hra awpa ta khokheina ei cha hlâ ei.
He palâhâhna Programme liata MJA, Siaha nata NGO nahzy hruapa ama châna hawh ta member thokhazy ahlao hra ei ta, MADC nôpawpazy hry tawhta Puhpa NG. Sila, Vice Chairman(Plg, MADC) chhao â hlao hra.
(Written by BeiRôkhu Beitâ, AITO, MADC).
