PRESS RELEASE

NO.23/2022

SIAHA, 8 Pamih, 2022, Hriaheihnoh – Atanoh nohchhô dawh 12:00 Noon khata Vahia liata MADC Circle Administrative Office Building sa thiehpa cha Puhpa N. Zakhai, CEM, MADC zachhihpa ta a pahy.

Building thiehpa pahyna hnei khai tawhta Programme ahmâhpa châ ta. Programme  he Puhpa P. Tluasa, SE, PWD, MADC ta chhihtha ta, Joint KTP Vahia ta pahyna hla (opening song) ama sa. Machâ V. Pawpaw, Awnano hyutuhpa, ECM Local Church, Vahia ta devotion daihti hmâh ta, Jessica Ngody Hlychho, Mara Idol ta hlasana ei no a hnei. CAO, Vahia building sana liata work supervisor puhpa C. Beichhua, AE, PWD, MADC ta technical report piena daihti  hmâh ta, târi 24.04.2021 pa ta building he sa pathaopa châ ta, târi 14.02.2022 liata sa patlôpa a châ. GIA Non-salary sôh tawhta Rs.34.60 lakhs hmâpa ta sapa a châ tahpa a reih.

Building duahmo:-

1. Type of building : RCC building

2. Area of building : 1836 Sq ft.

3. Number of room : 5 

4. Officer room = 3

5. Staff room = 1

6. Computer room = 1

7. Toilet = 4

Khichhai laipa Puhpa N. Zakhai, CEM bierei tlâhpi viapazy:

Atanoh he su liata MADC Circle Administrative Office Building pahyna function ahlao awpa ta avypa zydua samaw ei cha hlâ ei.

Vahia khih he Khazohpa ta châ heihsai leipa ei ta, byhnâ cha pie ei ta, CAO building thiehpa pha kawpa a cha pie ei.

Biatuhpa pha kawpa Puhpa K. Chhuabei, EM, MADC nama hneipa he nama vâhnei ngâsâ. A bia kyh a pachâ hmeiseih. 

Sôh nah thih rairuna eimâ tyhna chôta, Vahia khih liata CAO building thiehpa eima hnei thei thlâhpa he Vahia biatuhpa Puhpa K. Chhuabei, EM, MADC nata PWD Department, MADC tiamana nata hriapasana vâ chyu chyuh  ta he building thiehpa a hnei theipa nama châ. Aly â chhih hmeiseih.

Biatuhpa pha kawpa Khazohpa ta cha pie ei ta, nama vâhnei hmeiseih. Russia nata Ukraine adyuh ngâhai ei ta, ahy vâ maw eima tah khiahta la Russian President Vladimir Putin vâ a châ. Chahnaihta, râh chhihthatuhpa phapa hnei a peimawh hmeiseihpa a châ. Biatuhpa pha kawpa hnei chhao he a peimawh hmeiseihpa a châ.

Mararâh ta chhihthatuhpa pha  kawpa eima hneipa Puhpa Hiphei miah â pahâsai thlâhpa he a pei hmeiseih, i â chhih hmeiseih.

Rei leipa liata MADC Golden Jubilee celebration hnei awpa châ pi ta, Khazohpa ta Golden Jubilee hmâh thei awpa ta byhnâ miah a piepa he eima vâhnei hmeiseih.

Vahia biatuhpa Puhpa K. Chhuabei, EM, MADC chhao biereina hnei hra ta, a bierei tlâhpi viapazy:

Atanoh Vahia khih liata CAO building thiehpa pahyna programme liata Puhpa N. Zakhai, CEM, MADC, Puhpa Prisila, EM (Social welfare) MADC, Puhpa K. Siakhai, Adviser to CEM, Puhpa T. Seidô, Deputy Chief Whip, Puhpa LC. Apaw, Ex-MDC nata Puhpa P. Tluasa, SE, PWD MADC zy ta ama daihti sôh kawpa paruapa ta daihti miah amâ hmâkhei theipa he aly â chhih hmeiseih. Ama chô lia ei ly hmeiseih.

Sôh nah thih rairuna eimâ tyh lichih no nata, COVID-19 hri-iah charei lichih no ta Khazohpa ta Puhpa N. Zakhai, CEM, MADC chô liata biereih ta Vahia khih liata CAO building thiehpa eima hnei theipa he aly â chhih hmeiseih.

Vahia CAO building thiehpa eima pahy theipa he aly'pa a châ hmeiseih. A pahchaipa ta, Vahia khih zawpi chhochhi cha eimâ ly pahchai awpa a byuh.

Puhpa L. Prisila, EM (Social welfare) MADC, Puhpa T. Seidô, Deputy Chief Whip nata Puhpa K. Siakhai, Adviser to CEM zy chhao pasyunabie pha kawpa reina ama hnei hra.

Chairman ta vote of thanks reina a hnei khai tawhta Bei Zisu thlahchhâna pachupa reih pazipa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.