PRESS RELEASE

NO.20/2022

SIAHA, 24 Hmypi, 2022, Pobienoh – Atanoh nohchhô dawh 12:00 Noon liata Meisatlâh Forest Check Post liata MADC Environment & Forest (E & F) Department ta ama sa thiehpa Building cha Puhpa N. Zakhai, CEM, MADC zachhihpa ta ribbon chakiepa ta a pahy.

Ribbon chakiepa ta pahyna he Lâpi dadyh liata O chhâh liata hnei tuapa châ ta, he khai tawhta O chô lâ liata programme ahmâpa a châ. Programme he Puhpa Thaly T. Azyu, Conservator of Forests ta chhihtha ta, MTP Branch: Meisavaih West ta Pahyna hla ama sa. Rev. Z. Hrohmô, AGS i/c Fellowship, CCI(M) Assembly, Saikao ta devotion daihti hmâh ta, Laihsa Clara K. Melita, Mara Idol 2021 (1st Runner Up) ta hlasana ei 2 a hnei.

Chairman Puhpa Thaly T. Azyu, Conservator of Forests ta he building he Forest Management (State) Revenue Rs.30.00 Lakhs tawhta târi 10.4.2020 tawhta sa pathaopa châ ta,  târi 20.12.2021 pa ta sa patlôpa a châ tahpa reih ta, Technical Report piena daihti hmâh ta, Vote of Thanks reina chhao a hnei pâ hra.

Khichhai laipa Puhpa N. Zakhai, CEM biereina hnei awpa ta hruapa châ ta, a ry liata palâsapazy he a bierei tlâhpi viapazy a châ.

1. Atanoh he su liata Forest Building pahyna function ahlao awpa ta avypa zydua châ naoh ei na ta, alynabie ei cha hlâ ei.

2. COVID-19 ta kô 2 daihmâ miah vaw chahry ta, chahawhta kô a vaw sie chiehpa eima vaw sai nahta sawhkhâ, NGOs nata vâtlâh chhao ta hmialâ daihti liata eima vaw sie tyhpa hawhta vaw siepha thei khao ma pi, quarantine nata positive tahpa zy ta vaw y pi ta, sawhkhâ SOP zy hmâ lymâ byuh ta, 2017 May thlâpâ liata 11th Term MADC he a vaw thao ta, atanoh taihta Khazohpa chhihthana vâta eima vaw sie lymâna liata rairuna nota leipa a tyh pi ta, Council ta arairu hapa a châ khiah Mararâh pôpalôhpa ta eima rairu ta, COVID-19 hleikhô ta ama râh buana vâta nochhi lâ tawhta eima unawh refugee nahzy mohôh byuh ei ta, sawhkhâ, NGOs, khitlâh nata mopakha ta rairuna eimâ tyhpa â vaw pazao lymâpa a châ.

3. He hawhta rairuna eimâ tyh hai no ta eima Council Budget he kô 3 chhôh ta, Mizoram sawhkhâ ta miah papôhpa tlâ leipa ta, ualuapa (same size) ta eima sie vâta zawpi lâ chhao development raihria awpa a chyh ngaita kaw.

4. He hawhta rairuna hluhpi eimâ tyh haino ta Forest Department ta O pha kawpa, Rs.30.00 Lakhs hmâpa nama vaw sa theipa he arônah tah kaw na ta, Puhpa Thaly T. Azyu, CF nata a hrialâhpa officers & staff zydua, alynabie ei cha hlâ ei.

5. Forest Department hriapasana zawhzi ta Kaochao East tawhta Siaha khi kaw tlôna taihta lâpi kiapâh tho nama lopazy vâta Mararâh thâpha to pi ta, MADC ry liata Department ypa tawhta hmahlana a châ vâta MADC chhao ta a nohâh a vaw y ngaitapa châ ta, athiehpa ta nama chô liata alynabie ei cha hlâ chanei ei.

5. Sawhkhâ rai he Khazohpa chakaona raina a châ tahpa eima pahno awpa ei khoh ngaita. MADC ta Department 28 hlei mohôh pi ta, he liata 100% biehneina eima hneipazy cha Revenue Department, Forest Department, Education (Primary & Middle School) Department, LAD zy a châ. He nahzy hry liata Forest Department he apalaikhei tlâh a châ kawpa nama châ; nama raihriana theilâhpa hluhpi hmô pi ta, eimâ ly ngaita.

6. Revenue lâ tawhta chhie (tax) eima piepa â sâh khiah State & Central sawhkhâ tawhta sôh eima hmôpa â sâh via awpa a châ; atahmâ he achyh chyhta cha eima chhie piepa chhao â sâh via ngâ kaw hrapa a châ no ta zawpi he ta chhie pie eima pachâ peimawh awpa he apeimawh ngaita. India râh chhao ta â pahniena lai kawpa cha zawpi tawhta chhie (tax) he a châ. He hawhta a châ no ta thokha cha eima pahrâna O cheingeipa chhao chhie pie lei pi ta, chahawh pyly ta daoh nata sahdô zy chhao chhie eima pie chhie kaw; eima uasa via awpa apeimawh hmeiseih.

7. Eima MADC chhôh liata Forest Department he chhie a pie pha chaipa Department ama châ. Âmo zawhzi ta eima Revenue Target zy chhao eima tloh ngâ kawpa a châ. Atanoh he thâpa areina daihti a châpa pa ta pahno na ta, Forest Department thâpha he ei vaw rei khoh kawpa a châ. Forest Deparment ta Revenue Target hlâ a hluhvia syulyu vaw pangia tyh ei ta, he hawhta MADC ry liata Department hropa, Revenue ahneipazy chhao ta amopâpa ta tiama eima papua chyu awpa apeimawh ngaita.

8. He building thiehpa he tôkâ akhaihna su châ leipa sa la, ahryu-achhiana su châ leipa sa la, paripangana o châ leipa sa la, carom board chapie chakhyh thlâhna su châ leipa sa la, duty-na su a châna hawhta check gate apha kawpa ta vaina su châ sala, Forest department staff nahzy, apha kawpa ta, dâh hawhta rai nama hriana su a châ lymâ awpa ta khokheina sâh chaipa ei cha hlâ ei.

Puhpa FC. Lawmkima, EM i/c E & F Department chhao ta biereina chyupa hnei ta, 11th Term MADC he daihti rairuna hluhpi hleikhô ta COVID-19 hriiahzy chatôh lymâna daihti vaw châ ta, he hawhta a châ no ta E & F Department ta eima theina rakha hawhta Department châ nata Mararâh châta hmah vaw la ly mâ pi ta, a eih pachaipa ta eima CF Puhpa Thaly T. Azyu tiamana nata hriapasana vâta a châ, a chô liata alynabie ei reih. Atahmâ he Amôbyuh Vaithieh Agape Home kiapâh liata Rest Shed sa patlô hapa châ ta, Tipa ‘V’ liata Guest House sa patlô hapa châ heih hra ta, he sâ 2 pazy he thlai ta pahy heih awpa a châ hra; eimâ ly ngaita. He hawhta Department ta Mararâh châta hmah eima la theipa he Puhpa N. Zakhai, CEM pasopakâna nata a sawhkhâna siekhei haipa byhnâ a châ tah lei thei ma pi; eimâ phana hawhta Department ta hmah la via lymâ awpa he eima khopa nata eimâ chhuahpa a châ tahpa ta a reih.

He pahyna programme liata Elected Office Holder tawhta Puhpa K. Siakhai, Adviser to CEM ahlao ta, Officials tawhta E & F Department Officers and Staff zy hleikhô ta Puhpa Beirôkhu Beitâ, I &PO nata Puhpa Syuhlo Beichakhei Mara, PS to CEM zy ahlao ei ta, Meisatlâh liata Office ahneipa Puhpa Malsawmkima, Assistant Commissioner, Excise & Narcotics, Siaha District chhao a hlao ta, NGO lâ tawhta Puhpa PP. Zalena, President, MTP Gen. HQ nata St. CH. Beikhochhi, President, MSO Gen. HQ zy amâ hlao hra. He nahzy hleikhô ta Meisatlâh liata NGOs MTP, MCHP tawhta vyuhtuapazy amâ hlao thei hra. Atanoh programme liata MTP Branch: Meisatlâh zy ta Seat arrangement zydua ama vaw buakhei.

He Building he chhâh 3 ta sapa châ ta, lâpi ahneihnaohpa chhâh liata Forest Check Point office châta hmâpa châ aw ta, a chô lâ nata a ry lâ chhâh he Department Officers & Staff zy tlô awpa ta taopa a châ.

ISSUED BY:

Information & Publicity Department

Mara Autonomous District Council

Siaha.