PRESS RELEASE

No.117/2020

SIAHA, 3 Thlazoh, 2020 – Atakô HSSLC Exam, Mizoram pôpalôhpa liata Top 7 (Arts) Laihsa M. Beihniarili cha Puhpa N. Zakhai, CEM, MADC ta palôh hmeiseihpa ta â lykheizie pamosana châ ta atamy dawh 11:00 Am liata CEM’s Office room liata Programme chyupa taopa ta thopi dokheina nata hmosai piepa hlâna a hnei.

CEM zachhihpa Puhpa N. Zakhai chata kô hro lâ ta tao beih leipa hawhta atahmâ liata Class-12, Mizoram pôpalôhpa liata Top 7, Marasawzy ta eima vaw châ theipa cha arônah a tah zie reih ta, pakah ta alykheina bie hlâpa dei châ leipa ta LAPTOP chhao, alykheina châta a hlâ pâ hra.

Puhpa N. Zakhai chata M. Beihnairili hnoh ta pasyupalina bie reina nata Marasaw achu haipazy châta pasyuna bie pha kawpa hnei ta, ary liata palâsapazy he a bierei tlâhpi viapazy a châ:-

1. Atanoh liata hlaotlohna he Marasawzy ta eimâ lykhei hmeiseih tahpa pamosana nata hmialâ a sie lymâ nawpa liata khokheina eima hlâpa pamosana châta atanoh, he hawhta programme nawraih kawpa taopa ta pasyupalina bie nata alykheina hmosai piepa eimâ hlâpa a châ.

2. Marasawzy pi he, hmialâ daihti liata cha chapawzy ta kao totie liata hmia asah tyh pi ta, atahmâ deikua chanô nahzy ta hmia amâ kaw sah pathao laih haw tahpa, atlia via tawhta eima pahno thei; Marasawzy châ ta hmahsiena rônah kawpa a châ.

3. Atanoh liata M. Beihniarili hlaotohna he arâh pôhpalôhpa ta eimâ lykhei hleikhô ta, ano liata ngâna lai kawpa nata hnabeiseihna lai kawpa chhao eima hnei hrapa ta ei pahno. Atahmâ liata hlaotlohna he âthaona hawhta pachâpa ta tiama a papua via lymâ awpa eima khokhei hmeiseih.

4. Chyhsa ta miah aly ei ta, ngâna miah ama piepa he apeimawh kaw. Cha ngâna cha sasyh angâna (confidence) miah pie tuhpa a châ awpa a châ; chachata hmo phapa asa papua cheingei nahta hnabeiseihna ei hnei.

5. Marasawzy he chi chynawh kawpa châ hra ei si la, chi lai viapa nata asâh viapa ta eima pachâpazy ta miah ama zana awpa a ypa hrapa cha châ thaina liata a châ. Atahmâ tawhta Delhi nata Aizawl tlâh lia zy ta Head of Department rai patu thei awpa ta achuna liata eima tiama via lymâ awpa apeimawh hmeiseih; chahawhpa duahmo liata eimâ dua khiah Marapa he chi hropazy ta miah ama za aw.

7. Châ thai, hlaotloh, châna sâh kawpa patupa nata nata chhôhkha châta ativyna ngâlâh pachâ leipa ta, Marapazy pi he chi chynawh kawpa eima châ vâta chi lai viapazy ta miah ama disao thei tahpa eima pahno chyu; chavâta châ athaipazy ei chi ta Chi nata pho châta ahria tuhpa nata,  eima râh liata apha leipazy atao pathi tuhpa châ achhuah chyu awpa he apeimawh hmeiseih.

8. Châ thai awpa he ta Chapaw châ cheingei byuh lei ta, chanô châ cheingei byuh hlei hra vei – Education liata chanô chapaw pathluana y leipa ta, atiama viapazy nata ahriapasa viapazy eih a châ; atanoh liata eimâ lykhei haipa M. Beihniarili he châ rei atiama kawpa, ahriapasa kawpa a châ tahpa, a result tawhta eima pahno thei; Marasaw châ achu ngâhaipazy ta eimâ mopâ lymâ awpa a châ.

9. M. Beihniarili Nô & Paw reithei tlâh ama châ hmeiseih; Sôhthi nata palôhru saw châta ama hmânazy arônah hmeiseih. Nô nata paw zy ta saw nahzy ama deichaka (support) pha lei khiah he hawh duahmo sâhpa he tlô thei awpa arairu ngaita; nôpawzy ta eima sawnawh zy amâ chuna kyh liata mokhei ama byuh zie âlâ pasia kawpa ta ei pahno.

10. Student châ hai no ta achhuahna a-icha kawpa hnei awpa apeimawh hmeiseih. M. Beihnairili he Civil Service tao awpa a khohpa hawhta vaw pahno na ta, ei ly hmeiseih; a khonazy chhao he Khazohpa liata apahniehna chô ta api patloh cheingei awpa ta ei khokhei hmeiseih hra.

11. Student châ hai no ta, Viasa apakyhna kyh liata asohsi awpa apeimawh kaw; birthday zy alyna liata viasazy ama niedopa maih ahlykhei (adjust) laih hra awpa ta hruana a y thei aw – he he vaw padi pachhi hra tua; vaw doh pachhi hratua rai tah hawhpa kyh liata niedopa ta asie pasi hapazy rei awpa ama hluh kaw. Hmo pha leipa tawhta asohsi awpa byuh ta; achuna pachâ peimawhpa ta he hawh hmo liata a adjust laih byuh hlei vei; châ achu haino cha achuna kyh liata palôh pie khai chy awpa a châ.

12. Achhuahna ahneipazy cha, châ athai thei kawpa ama châ leipa chhao ta, tiama ei ta, hlaotlohna ama hmô thlâh tyh. Keima bawlaw chhao ta châ athai thei kawpa châ leipa na ta, BA pass cheingei eichhuah hapa vâta tlawh 400 aphaopa ta Shillong liata azâ chu na ta, kô 9 tlai ei y thei thlâh hra; BA ngâlâh châ leipa ta, MA taihta ei vaw chu patlô haw hra. Chavâta, Marasaw achu haipa zydua ta achhuahna sianôpa hnei chyu awpa apeimawh tahpa ei reih chanei khoh kaw.

12. Achhâ chaina liata ei reih khohpa deikua - châ achu haino ta apeimawh chaipa cha Khazohpa pahnona he a châ; châ achu thei awpa ta sona lathli phapa miah pie tuhpa nata hnatlâ hri-iah pathaihpa miah pietuhpa cha Khazohpa a châ; chavâta achuna liata Khazohpa hmia pasah lymâ awpa ta khokheina ei cha hlâ. Hmialâ na sie lymâ nawpa liata Khazohpa ta hnatlâna byhnâ chapie sala, Mararâh châta hlaotlohna khochhih kawpa vaw tlôkhei awpa ta khokheina sâh chaipa ei cha hlâ.

Laihsa M. Beihniarili he Lorrain English School, Siaha liata Class-VIII (Py charie) taihta achu ta, Class-IX & X Devine Intervention School, Aizawl liata kiah ta, Class-XI & XII he Home Mission Higher Secondary School, Aizawl liata a kiahpa a châ.

Class-X liata Subject zydua liata Letter Mark hmô khai ta, Top 10 liata a tloh leina Mark 1 ngâlâh a châ.

Pandemic daihti a châ vâta Alykheina Programme akawh kawpa ta tao thai’pa a châ leina hawh ta Programme chyupa taopa châ ta, Puhpa P. Sama, Executive Secretary, MADC ta chhihtha ta, Pihnô S. Lalmuanpuii, Deputy Secretary (Fin. & Accounts) Puhpa Beirokhu Beita, I & PO nata Syuhlô Beichakhei Mara, PS to CEM zy ta atyuduakhei ei ta, Laihsa M. Beihriarili chhôhkha lâ tawhta a nôhnai Ls. L. Khaipaw nata a Nô nata Paw chhao amâ hlao thei hra.

Daihti chhâna lâ liata Rev. M. Beichi, Laihsa M. Beihriarili Paw ta Khazohpa lâ alyna bie reina thlahchhâna a hnei.

ISSUED BY:-

Information & Public Relations Department

Mara Autonomous District Council

Siaha.