PRESS RELEASE

NO.112/2023

SIAHA, 25 Thlazoh, 2023, Chutynoh - Atanoh my dawh 11:00 Am kha ta District Institute of Education & Training (DIET) Siaha zy ta DIET Hall, Siaha Tlâhpi liata Graduation Day cum Fresher’s Social Programme pachhuapanoh ei ta, he liata Puhpa N. Viakhu, Hon’ble Chairman, MADC cha khichhai laipa châta hruapa a châna hawhta chhaih khana programme a hmâkhei ei.

He programme he chhai 2 lâta pachhaihpa châ ta, chhaih khana liata Graduation Day programme ahmâpa châ ta, chhaih nona liata Fresher’s Social programme a hmâ awpa a châ. 

Chhaih khana liata Puhpa C. Laitha, Lecturer ta chhihtha ta, Pihnô Vanlalchami Hnialum, Lecturer ta devotion a hmâh. Puhpa H. Lalfakzuala, Principal ta welcome speech reih ta, Brenda Lalthasangi, Outgoing Student nata Puhpa Jeffrey Khara, Editor, Moonlight zy ta short speech ama reih. V. Lalruatpuii, 3rd Semester, Debori Vanlalhriati nata Beirahlo Hlychho, Outgoing Student zy ta mo pakha hlasapa ta, zawpi ama palôpahawh.

Puhpa N. Viakhu, Chief Guest chata biereina chyupa hnei ta, atanoh liata Chief Guest châta hruapa a châ vâta a khokheituhpa DIET Principal nata a hrialâhpazy hnoh ta alynabie reih ta, atanoh programme liata a vaw zi tuhpa nata students, ahlaopa zydua hnoh ta alynabie a reih.

“Atakô DIET Siaha result khochhih kawpa vaw pahno pi ta, ahlaotlohpazy châ lykhei ei na ta, ei châ palaikhei kaw ei. Siaha khichhôh tawhta DIET achuna su he ahla kaw hra sala kô 2 chhôh ta riethei taopa ta regular kawpa ta class nama kia hnolona nata nama tiamana nata hriapasana theilâ khochhih kawpa eima hmôpa he aly’pa a châ hmeiseih. Apalâ kawpa ta namâ chunazy patlô theipa ta hnatlâna phapa nama hnei vâta Khazohpa hnoh ta alynabie nama reih awpa châ ta, nama pachutuhpazy hnohta chhao namâ ly kaw awpa a châ.”

“Nâmo Teacher training apatlô thiehpazy chô liata hnabeiseihna lai kawpa ei hnei; Mararâh Education hmahpasiesa tuhpa chhaichhi peimawh chaipa nama châna hawhta nâmo he nama peimawh hmeiseihpa a châ. Nama result mopa ta Mararâh Education he a kaw pha lymâ nahta ei hnabeiseih; a chhâpa cha future pachutuh awpazy, nâmo liata hnabeiseihna ei hnei vâta a châ.”

“Pachutuhpa rai he rai peimawh ngaitapa châ ta, chavâta Pachutuhpazy ta adona nata ngâchhihna nama hnei awpa a châ. Arâh leilô hneirôh kaw hrasala arâh hneituhpa palôh phaozie he apeimawh chaipa a châ. Adona nata ngâchhihna ta riahphana nata zachhihna a sapapua tyh.”

Khichhailaipa chata atanoh liata Teacher Training apatlô hapazy ta he tawhta pachutuhpa ama kaw châ ti ta adona nata ngâchhihna avao lymâ awpa ta pasyuna bie pha kawpa reih ta, zâlâ liata Fresher’s Social ahmâ awpa liata apha kawpa ta amâ hmâ thei nawpa ta khokheina hlâ ta, he tawhta Training akaw pathao awpa zydua hnohta chhao tiamana nata hriapasana hnei awpa ta pasyupa ta hmialâ ama sie lymâ nawpa liata khokheina a hlâ ei.

Atakô DIET Siaha tawhta manôh 47 zy ta final exam ei ta, he liata manôh 45 zy ta hlaotlohna ama to. He a pass-pa zydua hnoh ta Puhpa N. Viakhu, Chief Guest ta Certificate raina a hnei pâ hra.

Chhaih khana daihti chhâna liata Puhpa Dennis C. Ngolai, Lecturer ta vote of thanks reih ta, Graduation Day programme he pachhâsapa a châ.

Puhpa N. Viakhu, Hon’ble Chairman he officials tawhta Puhpa Beirôkhu Beitâ, I & PO, Puhpa Thangvunga, PA to Chairman, Puhpa T. Pabua, Cameraman zy ta zi ei ta, Puhpa NT. Thatlua, President, Minority Morcha, BJP nata Puhpa Jeffrey Khara, Editor, Moonlight zy ta ama zi thei hra.

ISSUED BY:

Information & Publicity Department

Mara Autonomous District Council

Siaha.