PRESS RELEASE

NO.191/2022

SIAHA, 30 Phiapi, 2022, Pakhyhnoh - Atanoh dawh 12:30PM pa ta Sport & Youth Services Department, MADC nata Siaha District Football Association (SDFA) hriaparaohpa ta pachhuahpanohpa MADC Golden Jubilee Celebration Football Tournament, 2022 Opening Ceremony programme cha SDFA Playground, Meisatlâh, Siaha liata Puhpa N. Viakhu, Chairman, MADC cha khichhai laipa (chief guest) châpa ta â hmâkhei ei.

Programme he Puhpa JH. Beihnai, Sport & Youth Officer, MADC ta chhihtha ta, Puhpa T. Vabeichhuakhu, Sr. Vice President, SDFA ta Abeipa lâ pavaosana devotion daihti â hmâh.

Puhpa VT. Martin Vâbeiduakhei ta welcome speech reina hnei ta, T. Cassidy, Treasurer, SDFA ta Football players zy hnohta Oath taking a pahneisa ei.

Jessica B. Khuhly nata FC. Nipari zy ta  pahnie kawpa ta hlasapa ta zawpi ama palôhpahawh.

MTP Branch, Meisavaih East ta pahyna hla sa ei ta, MTP Branch, Siaha (Siaha Vaihpi) zy ta Pho lâ ângia kawpa ama lâh.

Mizoram Inter-District Senior Women's Football Championship 2022 liata khichhai a buakheituhpa MTP branch zy hnohta ryuchâ (citation) hlâpa a châ. Chah nahzy cha:

1. Meisatlâh, MTP Branch 

2. Meisavaih East, MTP Branch

3. Meisavaih West, MTP Branch

4. College Vaih, MTP Branch

5. New Colony, MTP Branch

6. New Siaha, MTP Branch

7. Siaha Branch (Vaihpi), MTP Branch

8. Siahatlâh, MTP Branch.

Puhpa N. Viakhu, Chairman, MADC ta pasyunabie a reipa tlâhpi viapazy:

Sport & Youth Services Department, MADC nata SDFA hriaparaohpa ta thyutliapazy châta Football Tournament nama vaw pachhuahpanoh theipa he aly â chhih hmeiseih.

A pachaipa ta SDFA ta thyutliapazy châta Tournament hluhpi vaw pachhuahpanoh ei chi ta, nama hriapasana he a rônah tah na ta, nama chô lâta alynabie reih na ta, ei châ ly hmeiseih ei.

SDFA hmahlana vâ nata nama hriapasana vâta Sports lâ liata Siaha District tawhta players pha kawpazy vaw hnei ei chi ta, aly'pa a châ hmeiseih.

Thosai khih liata field pha kawpa thlai eima hnei baichhi awpa châ ta aly â chhih hmeiseih.

Paritheipa ta he tlupo ta thyutliapazy hro a parao ngâhaino heta nâmo SDFA heta thapiphiapa ta Sports lâ lia heta hmahla via lymâ u la thyutliapazy hro Sports hmâpa ta nata Sports he chhaichhi pha kawpa a châna hawhta thyutliapazy hro nama papha via lymâ awpa ta ei châ haw ei.

Ei châ ly kaw ei.

Puhpa K. Chhihrau, Executive Secretary (ES), MADC chhaota pasyunabie pha kawpa reina hnei ta, SDFA nata Sport & Youth Services Department, MADC hriaparaohna pha kawpa nama hneina zawhzi ta MADC Golden Jubilee Celebration Football Tournament, 2022 Opening Ceremony programme â hmâh thei awpa ta a vaw châpa he MADC vyuhpa ta alynabie ei cha hlâ ei tahpa ta a reih.

ES, MADC chata manô mapaw daihti liata Khazohpa chhao pahno leipa ta lyurâhripazy achhypa ta vaw y ei ta, atahmâ deikua cha eima Missionary zy vâta he hawhpa duasu liata â vaw dua pi ta, he he Khazohpa ngiachhiena vâ deita a châzie he a thiehpa ta eima pahno chanei heih awpa ta ei vaw reih chanei tahpa ta a reih.

Football player Ronaldo chata a hlaotlohna bieru ama hiahri nahta â chhyna cha "Talent without hard work is nothing" tahpa ta â chhy. Chavâta, thyutliapazy saih u tiamana hneina chôta nata Khazohpa china chô nata pahnona chôta hmialâ nama tôh lymâ awpa ei châ haw ei tahpa ta ES chata atanoh thyutliapazy hnohta pasyunabie pha kawpa a reih.

Puhpa N. Viakhu, Chairman, MADC he Official lâ tawhta Puhpa TT. Kholaw, RTO, Puhpa Pawsa Lava, AITO nata Puhpa K. Nehemia, Cameraman zy ta ama chakaochahlâh.

He football tournament lia heta 26 teams zy ta moh pangia ei ta, December 12, 2022 pa ta final âkhaihpa a châ aw.

Puhpa Abraham Beirazi Khithie, Advisor, SDFA ta vote of thanks reina a hnei khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.