PRESS RELEASE

NO.103/2022

SIAHA, 29 Thlazoh, 2022, Hriatuanoh - Atanoh dawh 1:00 Pm pa ta MYA Multipurpose hall, New Siaha liata Khichhai laipa (Chief Guest) Puhpa N. Viakhu, Chairman, MADC ta Family Oriented SEDP Programme a hmâkhei ei.

Puhpa Donny Lalruatsanga, Addl. Deputy Commissioner, Siaha ta programme he chhihtha ta, Rev. Dr. FC. Beichô ta devotion hmâh ta, Puhpa Abraham Beirazi Khithie, Member Secretary, District SEDP Committee & Project Director, DRDA, Siaha ta technical report a pie. Maraland Octave ta opening song ângia kawpa ta paryh ei ta, laihsa Clara K. Melita, Mara Idol Season 6 ta hlasapa ta zawpi a palôhpahawh.

Puhpa N. Viakhu, Chairman, MADC he Puhpa S. Lalremthanga, EM (PWD)   MADC nata Puhpa J. Vabeikiasa, EM (SW), MADC zy ta ama zi hra.

Puhpa N. Viakhu, Chairman, MADC bie a reipa tlâhpi viapazy:-

Puhpa Chairman nata Siaha District  liata Department  nano nanopa Officers eimâ palaikhei kawpazy, Awnano lâ tawhta devotion daihti miah hmâpatuhpa Rev. Dr. FC. Beichô, NGOs liata chhituh peimawh kawpazy ama rai paruapa ta he Family Oriented SEDP pahyna programme pachâ peimawh ta, a vaw hlaopa zydua - nama zydua chô liata Mawrâh (Mizoram) sawhkhâ nata MADC mohta alynabie ei châ hlâ ei.

Mawrâh (Mizoram) sawhkhâ  chata he Socio-Economic Development (SEDP) hmâpa ta rai hluhpi vaw hria ha ta.

Eg.: Infrastructure lâchhâh : Khichhôh lâthlôh peimawh viapa tao nawpa zy, Râhri lâta lâthlôh chhiah para byuhpa châta zy, PAHOSS lâchhâh châta zy, Pachutuhpa amâ daih leina su liata Pachutuhpa la nawpa châta zy, Social Rehabilitation châta zy, COVID-19 adyuh nawpa châta zy, a hluh kaw, reih khai tiahpa chhao châ vei.

Chana chô chata Puhpa Zoramthanga, Chief Minister zachhihpa sawhkhâna siekheipa chata FAMILY ORIENTED SEDP he pachâ peimawh kaw ta, rai patoh/pie patoh a châ leipa chhao he pei a tah hmeiseihpa a châ.

Kô 2018 December tawhta sawhkhâna vaw tao pathao ei ta, 2019 vaw châ palâh pâ ha ta, MP atlyna y awpa vaw phuah pâ heih ei ta, atlyhna a y khai tawhta Budget Session a vaw zao pâ ta, saopi a vaw ngia pâ lâlao heih pi ta, sawhkhâ ta cha 2020 kô a vaw thieh pataw nahta he Family Oriented SEDP he raih/pie awpa khopa vâta 2019 September thla tawhta Line of Department nano nanopa liata SEDP Board Chairman awpazy rao khai ha ta, Office chhao ama pahrâ pathao ha hra, hmah ama la pathaopata nahta Krismass nata Kô thiehpa ziza a vaw pahieh ta, kô 2020 cha angia pathao ha pi ta. Kô vaw thieh ta, March thlâpâ tawhta khizaw ta a buakheipa COVID-19 hripipa cha Mawrâh (Mizoram) chhao miah a vaw ngiahnao hra ta. Lockdown sai ta kô (eima noh nata daihti) cha eima  vaw hmâh khai hapa kha a vaw châ. 

Kô 2021 a vaw ngia pita, hripipa diapathlah leipa ta bua pazao lymâ pi ta, India râh nata khizaw Economics chhao tlahpahnai ta, kô 2020-2021 liata Mawrâh (Mizoram) Central tawhta sôh hmô cheingei awpa Rs.2632.58 Crores a dao khao leipa cha sawhkhâ ta tao ta, a bua kawpa a vaw châ. "Kheihtazie ta ma eima nohtochhieh peimawhpa zawpi nie awpa Saphâ, Gas hleikhô ta ti eima doh awpa zy Electric liatazy nôpopa ta miah tao leipa ta miah pachâpa thei thlâhpa he noâh â vaw chhih kaw tahpa ta reithai hialia awpa eima vaw châ he maw" ei vaw tah tyhpa a vaw châ. Châhrasala, SEDP angiatiah leituhpa vâta "Rai/pie hmeiseih bao vei" tahpa cha Mawrâh (Mizoram) liata reih hluh chaipa a vaw châ haw.

Central lâ hra cha COVID dyuh nawpa châta Crores 100 zakha chhao tloh âh leipa miah pie ta, eima dao leipazy nata pakhopa ta la a hluh tahpa ta reikhi châ tu vei.

A tlâhleipa mohôh nawpa ta eima Hospital ta miah pahnie leipa ta, COVID Care Centre nano nanopa taopa vaw byuh, Voluntary Workers, NGOs zy baona hiah byuh, Test Kit chaleipa byuh, PPE chaleipa byuh, nie nata baw pachâpa byuh, khizaw suhro lâ liata ypa nata siku hawtizy la papuapa byuh, cha hleikhô ta, Meithei ka papua byuhpa ta Assam râhri buana hnei pâ heih pi, Myanmar bua vâta eima uhta nata nawhtazy ta miah vaw pangaipazy ama y nawpa nata nie awpa pachâ vaw byuh pâ.

Hezy vâ he ta eima Chief Minister zachhihpa Puhpa Zoramthanga sawhkhâ he SEDP raih/pie para thaipa a châ leizie cha nama pahno thai chyu nahta ei pangiasa.

He hleikhô ta CSS sôh release dâh pananopa vaw châ pâ lâlao heih, July 1, 2021 tawhta sôh eima daopa rai rai he Public Financial Management System siepahliepa ta 20 July 2022 hlâta release khai awpa, release hmâ leipa a châ khiahta la Consolidated Fund of India lâta piepalie khai hawpa tahpazy vaw châ heih ta.

Cha tawhta, he phusâ he Implementing Agency nata Single Nodal Agency Account liata paso lymâ awpa tahpazy vaw châ laih heih ta, nohkha hro ta pahieh paryh tyhpa kha panano theipa vaw châ khao vei. He vâ heta Mawrâh (Mizoram) ngâlâh bua leipa pi ta, Manipur/Nagaland/Meghalaya/Assam state zy eima bua khaipa kha a châ. Sikkim chhochhi cha RBI ama pazao leipa vâta ama bua via pachai heih.

Kha buabâna zydua hry lia khata atanoh ta Family Oriented SEDP Launching Programme eimâ hmâh theipa he a rônah tah pi ta, eima Chief Minister zachhihpa Puhpa Zoramthanga nata  a chhihthapa sawhkhâ chô liata alynabie ei reih.

Sawhkhâ hmiatuapa kha term 2 pazao ei ta, term hmiatuapa 3-na liata achyh chyhta ta NLUP kha ama raih/pie ei ta, Khazoh ngiachhiena vâta atahmâ hawhta buana atyh leina chô ta, Term 2 vaw sawhkhâ leipa châ sala NLUP kha ama raih/pie hmâ nahta hnabeiseih achhih vei.

Atahmâ ta Family Oriented SEDP he chhôhkha 60,000 hnohta Rs.50,000 chyu raih/pie tua awpa ta pachhuahpanohpa châ ta, CSS release a vaw byuh hapa vâta Rs.25,000/- ta raih/piepa châ ta, he heta akih chhâna cha 3 Lakhs pyly khana a châ e tahpa ei phuah khohpa a vaw châ.

Atanoh ta eima Launching Programme he aly âchhih tah hmeiseih na ta, atahmâ ta SEDP adao tua awpazy heta, chyhsa hropa a dao awpazy sawhkhâ palôhru nata Policy achhuahna hawhta aduahpapua nawpa ta hmâpa ta nata hlaotlohna hnei cheingei awpa ta khokheina ei châ hlâ ei.

A chhâ chaina liata cha atanoh ta SEDP raih/pie thei awpa ta rai miah hriapatuhpa eima Dy. Commissioner/Addl. DC/PD, DRDA nata ama staff zy ama hriapasana nata tiamana, amâ piepasana a rônah tah na ta, ama chô liata alynabie ei reih.

Ei châ ly kaw ei.

Pihnô Rochuangkimi Khenglawt, SDO (S) ta vote of thanks reina a hnei khai tawhta daihti pachhasapa a châ.

ISSUED BY:

Information & Publicity Department

Mara Autonomous District Council

Siaha.