PRESS RELEASE 

NO.150/2025

Siaha, târi 15 Di, 2025 (Hriatuanoh) - Atanoh dawh 11:45AM khata Puhpa M.Laikaw, Hon'ble Chief Executive Member, MADC nata ahrialapazy; Puhpa S.Lalremthanga,Dy.CEM, Puhpa Tiahlei Syuhlo, EM(Forest), Puhpa M.Chiadung, EM(Soil) nata Pihnô A.Nelly, MDC zy chhaota Hraisua Hills Park, Nagar Van Yojana (Nagar Van Scheme) tawhta EF&CC, MADC ta a taopa cha Pahy pa ta, Hraisua Dipaw (Cherry Blossom Festival ei 3 na) cha Hraisua Hills Park liata ama hmâkhei. 

Hraisua Hills Park Pahyna(inauguration) nata Hraisua Dipaw a hmâna daihti liana heta Puhpa Thaly T Azyu, Conservator of Forest, EF&CC Deptt., MADC Chairman châ ta, Compéres; Laihsa T.Cassidy nata Satlia N.Beichhotha zy ta Programme ama chhihtha. Rev. Phosa Chozah ta Biehrai su thôh; Athaona 2:15, Hlazy 24:1 nata Hlazy 50:10&11 nazy reina hneipa ta daihti pavaona thlâhchhâna a hnei.

Khichhailaipa, Puhpa M. Laikaw, CEM ta biereina hnei ta, " Daihti khachâ rakha tawhta eima mokhâhpa, Zawpi nata Department nanonanopazy ta apalypa-uasana su phapa hnei hr'awpa ta eima saduthlie tyhpa cha atanoh pahy thei pa a vaw  châpa he a rônah tah na ta, ei ly ngaita. He Hraisua Hills Park pahy thei awpa ta tiama ngaita pa a hriatuhpazy; EM,EF&CC, MADC, CF nata a Staffs zy hnoh chhaohta alybie ei reih hra."

"Mara pi he manô mapaw daihti no tawhta apalypa-uasa khoh kawpa châ pita, 7 & 8 Century liana khata Sâhchi ama tu khai tawhta zy, Sâh ama tai khai tawhta zy, sahmah baopa ta apalypa-uasa daihti ama vaw hmâh tyh. Kri eima vaw zyh tawhna heta cha hawhpa zy cha siesai pi ta, anodeikua la, atliata tawhna khata chazy cha pathieh heihpa ta, Kri eima zyhna nahta âkhyhpa ta vaw hmâh pathao heih pi ta, alypah a châ hmeiseih."

"Delhi nata Viarâh Khihpipa lianazy khu mini parks hluh kawta, Zawpi; alai achyh ta apahâna awpa nata apalypa-uasana ta ama hmâ tyh. Phopi viapazy hâ alapa ta, keimo chhao hmahsienazy eima vaw hnei pathao ha bâ hra, aly âchhih ngaita kaw. Eima Râh he za moh sih la, uhtheiviapazy châ ta tlyma, thyutlia viapazy châ ta tlyma apalypa-uasana awpa su phapa he hneileipa pita, he hawhta  a châ nota Central sawkha khokheina ta charei n'awpa su pha kawpa Hraisua Hills Park eima vaw hneipa he aly âchhih ei ta hmeiseih. He hawhpa eima hneipa he Râh ryu a châ tahpa khâ pahnopa ta, Zawpi chhaota pasô thai ta, a mohôh pazina chhao department ku lia ngâlâh pahnieh leipa ta, eima theina kao liata cha a mohôh pazina he eima maophaohna a châ hra tahpa he khâ eima pahno ngâthlâh ha awpa he a peimawh hmeiseih."

"12th Term MADC liana heta Râh châta ryu tlohpa hluhpi hnei pi ta, atahmâ ta Hraisua Hills Park chhao he chahry  liata pahlao thei awpa a vaw châpa chhao he ei ly ngaita. Abeipa eima Khazohpa chhaota Mara Chi nata Pho he byhnâ miah pie via lymâ sala, Zawpi chhaota Râhchhihtuhpazy châ thla kha vaw chhâ via lymâ ula tahpa he ei bietana a châ." tahpata CEM ta a biereipa a pachhâsa.

Puhpa VL.Hruaizela Khiangte, Deputy Commisioner, Siaha chhaota biereina hneita, Hraisua Hills Park pahy theipa a vaw châ vâta âlyzie nata Hraisua Dipaw (cherry Blossom Festival) ei -3 na hmâ theipa a châpa cha ly âchhih zie reih hrata. Siaha district ta Tourist Attraction sites hneipha kaw pita, anodeikuala, a palâhâhna liata kho âkhi leipa ta, he kyh liata thapiphia via awpa abyuh ngaita,' tahpa ta a reih hra.

Hraisua Dipaw ahmâna pachhyhpa ta Photography Competition liata lymâ alapazy:-1) Puhpa Fc. Minela(Benny Photography), - 1th prize, 2) Pihnô Linda Phuto - 2nd prize, 3)Puhpa Ruben Kompa - 3th prize. Consolation prize:-1) C.Khaichhi, 2)Nick Mopathalua Solo , 3)Vt.Beirakhu. zy ama châ.

MTP Branch; College Vaih Satlia nata Laihsa zy ta apahyna hla sa ei ta, MTP Branch; Siaha Satlia nata Laihsa zy ta Khocheinô Lâ ama lâh. Mara Hlasa Py, Maraland Rock Society, Laihsa Marphyna Hlychho zy ta hla nata pyungiapa ta Zawpi ama palôh pahawh. Pyungiapa, hla nata lâpa ta daihti chhaih nona a hmâpa a châ.

ISSUED BY;

Information & Publicity Department 

Mara Autonomous District Council 

Siaha.