PRESS RELEASE

NO.81/2024

SIAHA, 25 Thlarâh, 2024, Pakhynoh – Puhpa MH. Tiabi, Hon’ble EM i/c School Education (Middle School), MADC ta noh 2 chhôh ryupa ta No-aotlâh, Lobo nata Chhaolo khihzy liata Middle School, Upper Primary School (UPS) nata Primary School zy tlypa ta Students nata Teachers zy hnoh ta pasyuna bie reina daihti a hmâ laih.

EM zachhihpa ta School a tly laihna maih liata School hawti nata Teacher zy ta a vaw ly-ua thai kaw ei ta, Pawpi ri vaw pa-aopa ta ama vaw ydy lymâ. He School a tlyna lia heta Teacher zy hnoh ta pasyuna hnei laih ta, “Classroom he nama za kaw awpa châ ta, Awnano chhithatuhpazy ta a Smart kawpa ta Maisa kiapa ta Awnano zawpi hnohta Khazohpa bie a pachupa hawhta nâmo chhao Class namâ ngia ti ta a Smart kawpa ta namâ tobi hra awpa a châ. Paripangapa nata chhorupa ta a ypa Teacher zy he hriena eima pie lymâ aw” tahpa reih ta. Chahleikhô ta ngâchhih kawpa ta School adaihtita lia kiah tyh awpa nata adaihtita lia bâh tyh awpa ta teacher zy hnohta pasyuna a hnei laih. Teacher zy chhao ta ama peimawhpazy EM hnohta tlôkhei ei ta, EM chhao ta a theina hawhta ta hmah lakhei awpa ta a chhô ei.

School thokha liata School hawtizy chhao apakyhna ahneina liata biereina chyupa hnei laih ta, "Sei châ hmia pasah ta, Abei châ hnoh pa-y" tahpa biepipa hmâpa ta School hawtizy hnohta pasyuna hnei ta, "Learning with Joyful, Learning with fun, aly kawpa nata thapawh kawpa hneina chô ta, Châ namâ chu awpa a châ" tahpa ta a pasyu ei. 

He School ama tly laihna lia he Puhpa MH. Tiabi, EM zachhihpa ta Lôbô khihsawzy ta amâ ngiah kawpa a tlâhleipazy hmâ awpa Oxygen baoh Complete set kha nata Oxygen Cylinder baohkha VC nahzy hnohta a present ei.

Puhpa K. Beingiachhie, Sr. EO (M/S) chhao School ama tly laihna liata Teacher zy hnohta National Education Policy (NEP) 2020 hmâ pathao awpa a châzie a rei hleikhô ta, Teacher rai he rai zachhihpa (Noble Job) a châzie a chho ei. Teacher zy cha Discipline avao pha awpa nata daihti avao pado awpa a peimawh zie zy, Pa-ô-pazypazy he School hawtizy hmiakô liata tao lei awpa ta a pasyu ei. School peimawhpazy he School Managing Committee hnohta nata Khitlâh nôpawzy hnohta tlôkhei tyh awpa ta a chho ei. Khitlâh nôpawpazy chhao School liata ku pathla tyh hra awpa ta pasyuna a hneipâ hra.

He School ama tlyna lia he Puhpa JH. Beihna, EO, Puhpa K. Laitha, AEO nata Puhpa S. Zatha, CEO Chhaolo Circle zy cha Class to lia angiapa ta, School hawhtizy amâ chupa ama thai nata thai lei ama mo pasia laih lymâ. Classroom amâ ngiakhai tawhta School hawtizy thaina duahmo ama hmôpa atlychakapa ta Teacher zy lâ ta pasyuna ama hneipâ hra.

He School zy tly awpa he ta târi 24.9.2024 my dawh 7:00 AM pa ta Siaha tawhta siepa ta Lôbô lia my pati nie ei ta, Chhaolô lia zâ amâ rie. Amy lâ târi 25.9.2024 ta a zâ liepa ta zâ pati No-aotlâh lia ama niekhai tawhta Siaha ama za ngai.

School a tlypazy: -

1. Chhaolô P/S - I

2. Chhaolô M/S

3. Chhaolô P/S II (UPS)

4. Chhaolô II P/S

5. Chhaolô II M/S

6. Lôbô P/S Il

7. Lôbô M/S

8. Lôbô P/S l (UPS)

9. No-aotlâh M/S.

Puhpa MH. Tiabi, EM zachhihpa he MADC official lâ tawhta Puhpa K. Beingiachhie, Sr. EO, M/S, Puhpa JH. Beihnai, EO, M/S, Puhpa K. Laitha, AEO, M/S, Puhpa S. Zatha, CEO Chhaolô Circle, Beikhaingia, Peon zy ta chakaochahlâhpa ta zi ei ta, School ama tlyna daihti liata khitlâh nôpawpa nata VC nahzy chhao ama zi laih lymâ thei hra.

ISSUED BY:

Information & Publicity Department

Mara Autonomous District Council

Siaha.