PRESS RELEASE

NO.04/2025

SIAHA, 16 Nawh, 2025, Pobienoh - Atanoh dawh 11:00 AM kha ta Mara Autonomous District Council (MADC) Forest Hall liata St. K. Vabeihmôsa châbu ropa sâ 6-na “Kô 70 chhôh noh khaihpa angia thei leipa râh” cha Puhpa MH. Tiabi, Hon’ble EM (MS) & Chairman, Board of Mara Literature (BML), MADC ta zawpi rei thei awpa ta a palâhâh.

Puhpa MH. Tiabi, Hon’ble EM chata biereina chyupa daihti hmâh ta, “Atanoh liata Châbu palâhâhpa he, a rohtuhpa Delhi liata a y haino châ ta, a rohtuhpa y leipa ta palâhâhpa he taozie a châ taraw leipa ta ano duasu nata a châbu ropa mopa ta special kawpa ta pasaina eima vaw piepa a châ” tahpa reih ta, author St. Vabeihmôsâ he Pawhmôtu tahpa ta eima aw thlâh tyhpa châ ta, he hawhta Burma Mararâh rairuna eima pahno thei hra awpa ta Mara reih cheingei ta a vaw rohpa he aly â chhih tah na ta, author hnoh ta alynabie a reih.

“Chi nata pho a boh nawpa ta reih he peimawh ngâsâ ta, reih he ta eima chipho chei-o nata eima mahnô mahpaw taozie pabohsana chhaichhi a châ” tah ta, “Vârâh kia daihti liata Bei dyuchhai hmiakô liata eima reih chyu ta pachiapa eimâ châ awpazie pahno pi ta, ‘Chi to Pho to Reih to’ tahpa liata Mara Chi, Pho nata Reih he â hlao cheingei hra aw - eima reih he keimo Marasawzy ta pabohsa ta a laiseih lymâ nawpa liata maophaohna eima hnei chyu tahpa pahno thieh heih suh u” tahpa a reih.

Puhpa MH. Tiabi chata biereina a hneipa liata Mara reih he Class-12 taihta achu thei awpa ta hmah la achhuahna ama hnei ngâhaipa tahpa reih hra ta, atanoh liata BML hruana zy pachâ peimawhpa ta a vaw hlaopa zydua hnoh ta alynabie a reih.

Programme he Puhpa K. Beingiachhie, Sr. EO (MS) & Secretary, Board of Mara Literature (BML), MADC ta chhihtha ta, Rev. H.B. Samuel ta Hlazy 137:1, Isai 62:4 reina reipakawhna hneipa ta thlahchhâna a hnei.

HC. Teresa Ngianô, Mara Idol ta hlasapa ta zawpi palôhpahawh ta, daihti chhâna lâ liata Dr. Khaivâthâ ta chhôhkha lâ tawhta alynabie a reih.

Atanoh liata châbu palâhâhna programme, MADC BML ta a pachhuapanohpa he Zisu thlahchhâ pachupa reiparaohpa ta pachhâsapa a châ.

He châbu he tho 368 hnei ta, bo 23 lâta pachhaih pachhuahpa  châ ta, Rs.500/- ta zuapa a châ aw. 

ISSUED BY:

Information & Publicity Department

Mara Autonomous District Council

Siaha.