PRESS RELEASE

NO.133/2024

SIAHA, 5 Di, 2024, Pobienoh - Atanoh dawh 1:00 PM kha ta MADC E & F Conference Hall, Siaha liata Puhpa Laicho Notlia châbu ropa “Kei nata ei lônahzy” cha Puhpa MH. Tiabi, Hon’ble EM i/c Middle School & Chairman, Board of Mara Literature (BML), MADC ta zawpi rei thei awpa ta a palâhâh.

He daihti liata Puhpa MH. Tiabi, Hon’ble EM chata biereina daihti hmâh ta, “Puhpa Laicho Nôtlia hla phipa ‘Pasaipha laih-na Mararâh’ tahpa he sa hluh kaw na ta, ei hla kho kawpa a châ; keima hlâta a sa hluh viapa ama y nahta chhao pangiasa va na, khitly no nata keima deita ta ei y no zy ta sa laih tyh na ta, atanoh a châbu ropa palâhâhtuhpa ei châpa he vâhnei a tah na ta, ei ly kaw.”

“Kei he châbu a rei khoh kawpa châ hra na ta, châbu he viasa pha kawpa, miah a paphasai beih leipa a châ. Châbu rei hluhpa he ta pahnona, patuapaluana nata pahnothaina miah pietuhpa châ ta, chavâta eima author nahzy ta châbu ama ropa he a pahleituhpa châ leipa ta a hmâh phahnaituhpa châ eima chhuah chyu awpa a châ. Mopakha liata rairuna nata palôh rietheina eima hnei daihti liata châbu phapa reipa he ta tlâhna nata alyna miah a pie theipa a châ.”

“Châbu a reih hluhpa mai chyhsa hrupa y vei ei. Atanoh liata eima sapa thatlônazy he cha kô uhthei ti ta miah siesai aw ta, pahnona (knowledge) deikua eima machâ daihti chhao ta miah siesai aw vei; chavâta châbu he reih hluh suh u.” tahpa a reih.

EM zachhihpa chata “Châbu a reih beih leipa nata a roh beih leipazy cha châbu sona pahno vei ei. Châbu rei hluhpa he memory/pahnotlâhna miah pietuhpa a châ” tah ta, atanoh liata palâhâhpa châbu chhao reihpapua chyu awpa ta pahruana pahaona a tao.

Palâhâhna programme he Puhpa K. Beingiachhie, Sr. EO (MS), & Secertary, BML, MADC ta chhihtha ta, Rev. B. Beilua ta pavaosana a hnei. Puhpa N. Solomon Beihlôthâ ta pahnie kawpa ta châbu chhôh thâtih reina nata saichhieliena hnei ta, laihsa Pricilla Nôtlia, Mara Idol 2024 Top 7 ta hlasapa ta zawpi a palôpahawh. 

Atanoh palâhâhna liata châbu zuapa a tlohpakhypa sôh zydua he Puhpa Laicho Nôtlia, author ta Agape Home châ ta a hlâ aw tahpa reih ta, he sôh he Machâ S. Laihlei he Khazohpa pavaosana nata hlânana hnei.

Daihti chhâna liata Puhpa Laicho Nôtlia, Author ta alynabie reina a hnei khai tawhta zawpi ta Abeipa thlahchhâna reiparaohpa ta programme he pachhâsapa a châ.

He châbu he tho 275 y ta, Rs.250/- ta zua awpa a châ.

ISSUED BY:-

Information & Publicity Department

Mara Autonomous District Council

Siaha.