PRESS RELEASE

NO.25/2025

SIAHA, 5 Pamih, 2025, Pakhynoh – Atanoh dawh 10:00 AM kha ta Puhpa MH. Tiabi, Hon’ble EM i/c School Education Department (Middle School) ta MADC ry liata Mara reih Pachuthpa zy châta Training pachhuapanohpa “Mara Language Teachers’ Training” cha MADC Forest Hall liata Chief Guest châpa ta pahyna a hnei.

He daihti he Puhpa C. Denis Ngôlai, Lecturer, DIET, Siaha ta chhihta ta, Training he District Institute of Education (DIET) Siaha nata Middle School Education Department, MADC zy apakaohpa ta ama pachhuapanohpa a châ.

Puhpa MH. Tiabi, Hon’ble EM chata biereina chyupa daihti hmâh ta, “Mara reih he, khahlâ via cha achuna bu zy a y mâh lei vâta hmahsiena y tu mâh leipa ta, achuna bu liata a vaw y tawhta nata social media zy a vaw y laih tawhta thata laiseih via ngâkawpa châ ta, aly’pa a châ hmeiseih. Atanoh liata he hawhta pachuna (Training) pachhuapanohpa he ta Mara reih liata hmahsiena nata laiseihna a tlôkhei via lymâ nahta hnabeiseih pi ta, Mara reih he Class-12 taihta a chu thei awpa ta hmah lana siekhei haipa a châ.” 

“Mara reih pachutuhpazy he Mara reih hmahsie nawpa liata nama peimawh kaw. Reih he chi nata pho miah taotuhpa a châ tahpa pahno chanei si la, Mara reih pachutuhpazy pi he subject hropa pachutuhpa hlâta a hmô pahnai via awpa châ leipa ta, he Training chhôh he daihti rei leipa a châna hawh ta, training he papeimawhsapa ta zôpha kawpa ta patlô achhuah u la, Khazoh ngiachhiena vâ deita ta atanoh training ahlao theipa nama châna zy apahno u la, pahnopasia leina liata a nawhtaw leipa u la, thai tlôh va, a thai kawpa hawhta apachâ tahpa a y thei, a thai kaw leipazy ta a thai kawpa hawhta ama y tyh. A thai kawpazy cha ‘a chu via awpa eima hnei’ tahpa ama rei tyhpa hawhta, tiama kawpa ta he training he athôhkheina hnei u la, a chhâna taihta patlô awpa khokheina ei cha hlâ ei” tahpa ta Training programme he aly kawpa ta a pahy.

He Training liata Resource person châta Puhpa FC. Chhuasa, Puhpa HC. Malsawmthanga, nata Puhpa Z. Siacho zy hmâpa châ ei ta, noh 2 (atanoh nata mylâ) chhôh ô awpa a châ.

ISSUED BY:

Information & Publicity Department

Mara Autonomous District Council

Siaha.