SIATA, 24 Phiapi, 2023, Chutynoh - Noh 2 chhôh ô awpa Langnechhe Cha-ypi, Siata khihsawzy pachhuapanohpa cha atanoh my dawh 11:00 Am kha ta a noh 1 nawpa ta Siata tlyliah liata ahmâ pathaopa châ ta, he liata Puhpa MH. Tiabi, Hon’ble EM i/c School Education (MS), MADC cha Khichhai laipa châpa ta programme a hmâkhei ei.

Programme he session sâ 2 lâta pachhaihpa châ ta, 1st session liata Puhpa Malsawm ta chhihtha ta, Puhpa CH. Hrangkha, Langnechhe Paw ta welcome speech a reih. 

Evan. L. Khailawng ta devotion hmâh ta, Hlasathaipa John Beizachhi Phuto, Wilkinson B. Khuhly, Rovina Khaimeichho, K. Eunice nata Felina Lianchhing zy ta hlasapa ta zawpi palôpahawh ei ta, Chief Guest Puhpa MH. Tiabi, Hon’ble EM, MADC, Puhpa S. Vabeihasa, Sr. Vice President, MTP Gen. HQ, Puhpa Z. Beingiachhie, GS, MTP Sub HQ: Chhaolo zy ta biereina daihti ama hmâh.

Second session liata FC. Lalrinawma nata M. Lalremsangi zy ta pahnie kawpa ta chhihtha ei ta, he daihti liata MCHP nata MTP Section tozy tawhta Cultural item nano nanopazy palâsapa châ ta, ataopasuanazy chhao hnei pâpa a châ. Zawpi puapha kaw ei ta, noh-y ta ziza pha kawpa ry liata aly kawpa ta programme ahmâpa a châ. 

Puhpa MH. Tiabi, Hon’ble EM biereina a hneipa liata a bierei tlâhpi viapazy:-

1.Zawpi zydua Langnechhe 2023 anaohna Samaw cha hlâ ei na ta, aly kawpa ta ahmâ chyu awpa ta khokheina ei cha hlâ ei. Atanoh liata Khichhai laipa châta nâ hruatuhpa organising board zy hnoh ta alynabie ei reih.

2.Hlâno mahnô mahpaw zy ta he cha-ypi he aly kawpa ta vaw hmâh tyh ei ta, sanawh chhôhkha amâ ryhna noh, palôhru hmaohkha ama phaona noh a châ hleikhô ta apalypauasana chi nanopazy nata hla nata lâ zy ataopasuana ama vaw hneina noh a châ. He hlâno taozie apahro lymâtuhpa Siata khihsawzy hnoh ta alynabie ei cha reih ei.

3.Khazohpa ngiachhiena topa ta atanoh aly kawpa ta Langnechhe a tlô theipazy eima y no ta thokha deika rairuna nano nanopa vaw siethlu pi ta, chhôhkha achhaihnazy y hra sala, Khazohpa ta chahawhpazy tawhta thlalôhna miah pie sa la, Langnechhe 2023 deikua aly kawpa ta ahmâ chyu awpa ta eimâ khokhei hmeiseih.

4.Marapazy District Council eima hmô chhâna peimawh chaipa hry liata sâkha cha eima chi nata pho tozie, eima culture & tradition pabohsa tah palaiseihsa awpa he a châ. Langnechhe he Marapa culture peimawh kawpa sâkha a châna hawhta Mararâh zydua ta eima hmâ theina daihti a y nahta ei hnabeiseih.

5.Hlâno eima mahnô mahpaw zy ta adyryh kawpa ta Hmochao khih (Siata khih hmiatuapa) liata Langnechhe ama vaw hmâ tyhpazy pachâ na ta, atahmâ daihti hawhta sound system pha kawpazy za hnei v’ei hra ei sa la, ama daihti liata aly kawpa ta za hmâh ei ta, he taozie phapa hawhna he ta atanoh daihti lia chhao aly kawpa nata adyryh kawpa ta - nâma keima tahpa ta hmâ awpa he apeimawh hmeiseih.

6.He cha-ypi he ta Siata nata Mararâh zydua liata adyryhna vaw tlôkhei sa la, Khazohpa ta phopipa ta miah tao ta, Biephuahpa liata phopizy cha ama rônahna chhao ta Vârâh amâ ngia aw a tahpa liata keimo Marasawzy chhao eimâ hlao hrapa a châ. Eima culture hneirônazy he pasô via lymâpa ta cheichalo via lymâ ei suh u.

7.He noh aly achhih kawpa he nama zydua ta alypa nata thapha kawpa ta vaw hmâh u la, mylâ anoh 2-na chhao palôh tlâh kawpa ta noh patla-khihpadei awpa ta khokheina asâh ngaita kawpa ta ei cha hlâ chyu ei.

Langnechhe Cha-ypi he mylâ târi 25.11.2023, Pachynoh liata ahmâ pazao heihpa a châ aw.