PRESS RELEASE
NO.66/2024
SIAHA, 30 Thlazoh, 2024, Chutynoh – Atanoh dawh 11:00 Am khata District Education Office, Siaha District pachhuahpanohpa District Level Students' Science Seminar Siaha District - 2024 (Topic: Artificial Intelligence : Potentials and Concerns) cha MADC Forest Hall, Siaha liata hneipa châ ta, Puhpa MH. Tiabi, Hon’ble EM i/c Education (Middle School) etc., MADC cha khichhai laipa (chief guest) châpa ta â hmâkhei ei.
Programme he Puhpa T. Chatlua, Addl. DPC, Samagra Shiksha ta chhihtha ta, Rahabi, Class VIII, Lorrain English School liata achuhaipa ta pahnie kawpa ta hlasapa ta zawpi a palôhpahawh.
Puhpa MH. Tiabi, EM, MADC chata, atanoh District Level Science Seminar 2024 liata khichhai laipa châ awpa ta na hrua ei chi ta, nama hnohta bie reih thei awpa ta ei vaw duah theipa he ei ly hmeiseih, tah ta, Siaha District Level Seminar liata a tlohpazy ei chi he, State Level liata District vyuhpa ta compete awpa châ ei chi ta, State Level lia nama tlô khiah National Level lia compete awpa châ ei chi ta, tiama kawpa ta namâ taopasua lymâ awpa ta khokheina ei châ hlâ ei, tahpa ta a reih.
"Eima pahno chyupa hawhta, atahmâ khizaw liata cha Science & Technology heta hmahsiena thata hnei ta, cha no chata, Science centre he khizaw liata Science zawpi lâta hiezawhna nata Science & technology phuazâhna media phahnai kawpa nata hmahsiena hlaotloh kawpa sâkha hawhta pachâpa ta hmâh phahnai he â chhuah chaipa a châ," tahpa ta khichhai laipa ta a reih.
"Chadei châ leipa ta, Science â vaw thaotôna dopa pahnona nata hmotaopazy pahnona dei châ leipa ta, eima sai dâh, pachâ dâh chhao a panano thei. Tahmâ khizaw lia cha Science & technology zawpi lâta a peimawhzie pahnosa ta hmâh phahnai achhuahpa he eima noh to hro liata a za peimawh kawpa a châ," tahpa ta EM tah a reih.
"Science cha universe he khâpa maw a châ tahpa zy, tahmâhlâ ta hmo tlô ngâhaipa nata a vaw tlô awpa pahnopapuana a châ. Scientific pahnona hmâpa heta technology thiehpa hmôpapua thei pi ta, rairuna chhao eima pathlâ thei hra," tahpa ta khichhai laipa ta a reih.
"10th standard patlô tawhta Science stream atlyhpa a phana chhâpa châ career nano nanopa a tao/pie thei ta, engineering, medicine, research nata technology zy chhao a tao thei. Achu patlô daihti liata rai pha kawpa hmôna châ ta, demand chhao â sâh kawpa a châ," tahpa ta EM ta a reih.
Puhpa MH. Tiabi, EM, MADC he Official lâ tawhta Puhpa K. Beingiachhie, Sr. EO (MS), MADC, Puhpa S. Zatha, CEO, MADC, Puhpa John Chozah, CEO, MADC, Puhpa S. Thachha, CEO, MADC, Puhpa Hilei Hlychho, CPEO nata Puhpa Pawsa Lava, AITO, MADC zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
Attachment
