PRESS RELEASE

No.143/2023

SIAHA, 06 Di, 2023, Pakhynoh – Atanoh my dawh 10:00 Am pata Siaha District Football Association (SDFA) pachhuahpanohpa President Cup Under 12 & 14 Football Tournament 2023 cha SDFA Playground, Meisatlâh, Siaha liata Opening Ceremony programme liata Puhpa MH. Tiabi, EM i/c Edu (MS), MADC cha khichhai laipa (chief guest) châpa ta â hmâkhei ei.

Programme he Puhpa Robertson B. Khithie, Honorary Vice President, SDFA ta chhihtha ta, Puhpa R. Israel Chozah, CEO, MADC ta devotion daihti hmâh ta, Rovina Khaimeichhô ta hlasapa ta zawpi a palôhpahawh.

Puhpa MH. Tiabi, EM, MADC chata, "Atanoh he su liata under 12 nata 14 football tournament akhaih awpa ta avypazy ei chi he, Mararâh ta eima cha mokhâhpa nata eima châ kaw pahnieh n'awpa châ ei chi ta, palôh hnei kawpa nata tiama kawpa ta nama daihti namâ kaw hmâh lymâ awpa a byuh," tahpa ta a reih.

"Under 12 nata 14 football tournament liata akhaih awpazy chi heta exercise nama la hoh vei khiah, Sports nama hoh vei khiah, châ nama chu hoh vei khiah nata nama tiama hoh vei khiah hlaotlohna to leip'aw ei chi ta, Abeipa ta tiamapazy deita hlaotlohna a pie tyh ei. Chavâta, patuapalua hoh ta, nama tiama kaw awpa a byuh," tahpa ta EM ta a pasyu ei.

Khichhai laipa chata, "hmialâ nama kaw sie laih lymâ n'awpa liata rairuna chatôh lymâpa ta, hnabeidy leipa ta tiama lymâpa ta Khazohpa hmiapasah lymâna chôta tiama nama papua lymâ awpa a byuh," tahpa ta a reih.

EM chata, "atanoh football ataopasuana lia heta palôh pie khaipa ta tiama nama papua'pa byuh ta, nama zydua ta hlaotlohna ato khai thai leipa ta, a chhâna liata team kha ngâlâh hlaotlohna to aw ei chi ta, hlaotlohna ato leipa team chhaota hnabeidy leipa ta aheihpa liata hlaotloh namâ chhuah chyu awpa a châ," tahpa ta a reih.

"Team hlaotlohna atopa chhaota Khazohpa lâ liata alynabie reina chôta tlô dâh thai kaw awpa a byuh. Discipline hnei kawna chôta nata palôh pathaih kawpa hneina chôta nata achuna liata chhao tiama papua lymâ namâ chhuah chyu awpa a byuh," tahpa ta EM ta pasyunabie a   reih.

EM chata, hlaotlohna to chyu achhuahpa ta he football tournament akhaih awpa ta khokheina a hlâ chyu ei.

President Cup Football Tournament 2023 lia heta under 12 zy he teams 14 y ei ta, under 14 he teams 16 a ma y.

Puhpa VT. Martin Vabeiduakhei, President, SDFA ta vote of thanks reina a hnei khai tawhta opening ceremony daihti pachhâsapa a châ.

Puhpa MH. Tiabi, EM, MADC he Official lâ tawhta Puhpa R. Israel Chozah, CEO, MADC, Puhpa Pawsa Lava, AITO nata Puhpa T. Pabua, Cameraman zy ta ama chakaochahlâh.

ISSUED BY:-

Information & Publicity Department

Mara Autonomous District Council

Siaha.