PRESS RELEASE

NO.111/2023

SIAHA, 24 Thlazoh, 2023, Pobienoh - Atanoh dawh 1:00 Pm kha ta MADC ta a tuapa “Commission on Upgradation of MADC Sub HQ: Tipa” official zy ta Commission Chairman Puhpa MH. Tiabi, EM i/c Middle School etc. chhihthana ry liata MADC Sub HQ: Tipa DAO office liata hriapa employee zydua DAO Conference Hall liata meeting hneikheipa ta Briefing hneipa a châ.

Tipa DAO office ry liata hriapa Puhpa S. Chatlua, Surveyor-III ta he meeting he chhihtha ta, Puhpa J. Hneiro, Sirdar ta meeting pavaosana thlahchhâna a hnei. 

Commission officials tawhta Commission Chairman Puhpa MH. Tiabi, Commission member Puhpa T. Seido, EM i/c Sports & Youth Services etc.nata Puhpa C. Chehnei, Dy. Chairman zy ta Tipa DAO office liata hriapazy hnoh ta Briefing hnei ei ta, Member Secretary Puhpa BeiRôkhu Beitâ, I & PO ta meeting minute a roh.

Atanoh Commission nôpawzy bierei tlâhpi viapazy ary liata palâsapa a châ:-

1. Rai liata achy chaipa nata alai chaipa y leipa ta, eima rai chyu liata ngâchhihpa nata tiamapa ta hria awpa he eima maophaohna châ ta, rai liata ngâchhihpazy cha chyhsazy ta za ei ta, byhnâ ama to tyh.

2. Eima râh liata khichhai department zy cha keimo hawhta eima râh kyh ama pachâ lei thei; keimo he azipa châ pi ta, azipa palôh phaona chô ta eima MADC Opi he eima mohôh awpa nata a rai eima hria awpa a châ.

3. State sawhkhâ nata Central sawhkhâ ry liata ahriapa eima level heihpazy hlâta eimâ mopahnai via awpa châ vei; sasyh amohnaona eima hnei awpa châ vei.

4. Office sâkha liata ahriapazy pi cha nâma-keima atahpa ta kyh apachâ raihrie tah, eimâ daodo awpa châ ta, kyhchhie eimâ rei awpa châ vei. Forest Department liata ahriapa nahzy he uniform amâ tao vâta keimo DAO staff zy pi ta eima mopanano awpa châ vei; eimâ chhothai veichâh awpa nata chhôhkha hawhta eimâ hmô chyu awpa a châ.

5. Chyhsa hluhpi sawhkhâ rai hria awpa ama khoh kaw no ta ahmô thei leipa hluhpi ama y; keimo Khazoh ngiachhiena nata eima nôpaw nawhzy khokheina vâta MADC ry liata rai hmôpa ta eima hria theipa he chyhsa vâhnei patluapazy châ pi ta, Khazohpa liata aly kawna chô ta office rai eima hria lymâ awpa a châ.

6. Office kia daihti nata adi daihti avao pado lymâ awpa. Nâmo ku liata Mararâh hmahsiena hluhpi â pahnieh; office avaw daohpazy pahawhsi pahawsâh leipa ei si la, ama khopazy thlai eima taopa awpa a châ. Office miah adaohpazy he chyhsa nano nanopa ama châ; mohnao viapa nata papeimawhsa viapa eima hnei awpa châ vei; â khokhâh kawpa ta eima vaw uasa awpa nata ama khopazy eima pasiapanô para lymâ awpa a châ.

7. Hâtachareih Pakhynoh maih liata Mara Cultural Dress atao tyh awpa tahpa MADC Executive Secretary tawhta châ puapa zyh lymâ awpa a châ. Dress code pachâ peimawhpa ta T. Shirt rao hlôpazy ta office kia lei awpa; kameez eimâ ky lei no chhao T. Shirt rao hneipa a châ awpa a châ.

8. Office eima kialâhpazy mychareih good morning Sir/Madam tahpa hmâ lymâ awpa. He he ta zachhina achakaih ta, maophaohna chhao â chakaihpa a châ. 

9. Nohto ta hmahsiena nata adôkhawna y awpa patuapaluana hmâna chô ta office kyh pachâ tah, hmialâ pangai lylia a chhuah si la, Mylâ nata hânoh rai eima hria awpazy cha atanoh tawhta eima pachâ chhielie tyh awpa a châ.

10. Arâh leilô hneituhpa azipa eima châ; District Council maoh paphyuhna zie ta râh leilô kyh liata rai eima hria awpa châ vei.

11. Eima nôpaw nawhzy ta eima rai Transfer-Posting kyh ama raopa liata apyh thai ei si la, rei angiah ei suh u. Eima hyutuhpazy cha chi awpa a châ taraw leipa ta eima za(respect) awpa a châ. 

12. Commission ei hluhpi padua ngâkaw hra ei si la, ahriatuhpazy eimâ chu leipa ta a châ khiatala yzie y aw vei. Chavâta Commission hlao patloh awpa ta   sasyh ataopathi byuhna liata ataopathi ei si la, achhiena lâ ta comment y lei awpa ta ngâchhih kawpa ta hriapa ta MADC nata Mararâh zawpi apahnieh tlâh châ awpa ta rai phapa hria lymâ awpa ta apachhuah chyu suh u.

Tipa MADC office liata hriapazy tawhta ama khopa reina daihti pahypa châ hra ta, kho akhi leina nata peimawh ama tahpazy reih ei ta, MADC Tipa DAO ry liata officers nata staff post y chiehpa, pabie leipazy pabie awpa ta ahawna taopa ta châ chhao Commission zy hnoh ta pangia pâpa a châ.

Daihti chhâna liata zawpi ta Bei Zisu Krista Thlahchhâ pachupa reiparaohpa ta meeting he pachhâsapa a châ.

MADC Tipa DAO office liata hriapa officers and staff zydua manôh 74 châ ei ta, he liata 24 zy cha E&F Department ry liata hriapazy ama châ. 

He meeting liata Vahia MADC Circle Administration Office (CAO) tawhta Puhpa N. Abela, RO nata Puhpa Vabeipathai Hlychho, Surveyor zy ahlao awpa ahawpa ama châna hawhta ahlao thei hra ei ta, MADC I&P Department tawhta Puhpa T. Pabua, Cameraman â hlao hra.

ISSUED BY:

Information & Publicity Department

Mara Autonomous District Council

Siaha.