PRESS RELEASE

NO.63/2022

SIAHA, 23 Chhiepa, 2022 – Atanoh dawh 11:00AM pa ta Puhpa M. Laikaw, Opposition leader Office (Room) thiehpa cha Abeipa lâta pavaosana nata hlâna hneipa a châ. 

Hlâna programme chyupa taopa châ ta, Rev. B. Beilua, New Colony, Biatuhpa ta devotion hmâh ta, Bible text Mika 6:8 "Hy chyhsapa, phapa cha a cha pamosa haw; ABEIPA ta a châ hnawpa cha khapa e a châ? A do ngaitapa ta taopa nata ngiachhiena pasôpa nata na Khazohpa nata reisi ngaitapa ta hmaohkha ta chareipa he châ vei ma?" tahpa bie hmâpa ta pasyuna pha kawpa reih ta, a do ngaitapa ta tao ta nôhmei nata hârapa zy, dyhchhie rietheipa zy nata chyhsa molaipa (hneirôhpazy) equal treatment piena chô ta nata Khazohpa pahnona chô ta râh chhihthana rai hria awpa ta khokheina a hlâ.

Rev. B. Beilua ta châbu pha kawpa "The Church Is Bigger Than You Think by Patrick JOHNSTONE" cha Puhpa M. Laikaw a present pâ.

Puhpa H. Malvina, CEM, MADC zachhihpa chhao biereina chyupa hnei ta, ary liata palâsapa he a bierei tlâhpi viapazy a châ:-

"Atahmâ ta sawhkhâna sie ngâhaipa he Mara zawpi sawhkhâna hawhta pachâ pi ta, Party liata eima extreme tu khiatala chih na pho châ heta hmophapa hlâta hmo phaleipa asa papua tyh khia ma i tahpa pachâna ei hnei. Opposition leader chôchâh lia chhao dâh hawhta hmo ama vaw claim na liata dâh hawhta hmo eima tao awpa na a châ e tah pi ta, sôthih rairu kaw hra sala, eima râh nôpaw châ ta, Office, Motor, Quarter, Driver nata PA chhao eima pie awpa a châ tah pi ta, eimâ phana rakha liata facility zydua pie awpa ta eima vaw pathlupa a vaw châ."

"Eima yna Party hmahta anano tyh hra sala eima chi nata pho pha nawpa châ heta cha eima pôhkha awpa he a peimawh. Keima mo pakha pachâ dâh liata la, mylâ hânoh chhao discuss lai pi ta, Sixth Schedule Amendment zy chhao he hmahta eima zydua ta sawhkhâ dua ta, NGO dua ta tlao tei khoh khai lâlao sila, Central nakao atlo via khiama tahpa zy pachâna ei za hnei tyh. Anodeikuacha, eima nôpaw nah ama parysana hawhta chahri sala. Atahmâ tah sawhkhâna a sie ngâhaipa he senior viapazy ta advice chhao miah nama pie lymâ awpa ta ei châ haw khoh kaw ei. Ei châ ly kaw ei."

Puhpa K.Hrahmo, MDC, Chakhei biatuhpa ta biereina chyupa hneipa ta, Puhpa M. Laikaw hleikhô ta 12th Term MADC sawhkhâna a sie lymâ nawpa liata khokheina a hlâ.

Puhpa N. Zachô, President, Mandal Committee BJP, Siaha ta Puhpa M. Laikaw poh ngiatlâh liata baipa (Shawl) a present. Daihti pachhâsa khai tawhta alykheina Refreshment pahâh kawpa niepa a châ.

Puhpa M. Laikaw chata atanoh liata a hruana pachâ peimawhpa ta a vaw hlao theipa Puhpa H. Malvina, CEM, MADC, Puhpa K. Hrahmo, MDC, Puhpa Beirahmo Syhly, MDC, Puhpa L. Prisila, MDC, Puhpa LC. Apaw, Ex-MDC, BJP Party liata a hrialâhpazy, Puhpa K.Chhihrau, Executive Secretary, MADC, Puhpa K. Vanlalliana, Secretary to District Council, MADC, Puhpa Pawsa Lava, AITO, Puhpa K. Nehemia nata MJA tawhta avaw hlao theipazy hnohta alynabie a reih.

ISSUED BY:

Information & Publicity Department

Mara Autonomous District Council

Siaha.