PRESS RELEASE 

NO.142/2025

Siaha, 2 Di, 2025(Hriaheinoh); Atanoh 11:00AM khata "SAHRIA KU"  Tipa Beivaih Khihsaw ta ama pachhuahpanohpa cha Puhpa M.Laikaw nata Ahrialâhpazy ta 'Azy Râh' Tipa Beivaih Lyupih liata ama hmâkhei.

He Sâhria Ku ahmâna programme he daihti chhaihno (1st & 2nd Session) ta ahmâpa a châ. Puhpa K. Lanunpuia, VCP Tipa 'B' ta chhaih khana he chhihtha ta, Puhpa ST. Lalzarmawia, Chairman, Sâhria Ku Organizing Committee ta daihti chhaih nona he a chhihtha hra. Machâ Thawmmawia Solo ta Biehrai, Puasaina 23:14 - 19 reina hneipa ta Abeipa hnohta daihti pavaosana thlahchhâna a hnei.

Puhpa L. Lalrochama, Secretary, Sâhria Ku Organizing Committee ta Welcome speech reina hneipa ta hmiapahnosana daihti a hmâh. Puhpa H.Lalchhana ta hrua eihpazy hnohta Lyu liata ama kuhria chicheipa hlâna hnei ta,  Puhpa Beihu Nohro, Biatuhpa chhaota Sâhria Ku âvawhlaopazy hryta kô Uthei viapzy hnohta hmopiepa hlâna a hnei hra.

Azipa Puhpa M. Laikaw tah biereina hnei ta, "Sâhria Ku pachhuahpanoh pa a châpa he eina palysa kaw. A su ei za tlô cha ei hawti daihti na patheisa ta. Primary School ei khia daihti ta ei pâ nahta Lyu lia arie tyh pita, my ta na pathyu ta Siku kiah awpa ta na chho ta, zâlâ ta nâ vy hei khaw eina ta tyh. Ei pâ he ku raihria pachâ peimawh kawpa chyhsa a châ."

"He hawhpa Ku eima hmâpa he pha ei tah kaw. Lyuva khutla zy hnei pi ta, anodeikua eima manô nata mapaw zy ta Ku hluhpi vaw hnei ei ta, keimo tala tahmâ he Lyuva Khutla deita eima za hmâh pazao. Zâko viano khata Siata nata Zyhno liazy ta Sahria Ku he hmâh ei ta, a hlao theileipa na ta, pei ei tah kaw. Khâzia ma Sâhria Ku he eima siesai ha tly tahpa he atanoh programme heta pachâna eina za pahneisa kaw?,. Sâhria Ku he Mara nah châta cha daihti peimawh kawpa za châ tyh ta.; History athaipazy ta ama reina liata cha zâkhano eima manô nata mapaw zy Kalay Valley liata ama y no khata ko 3 chhôh chakâna tlô ta, a kô palihna liata thata Sâh hnei ei ta, chatawhta he Sâhria Ku he ama hmâh pathaopa hawhta reipa a châ. Manô nata mapaw daihti no tawhta eima tao tyhpa he Krizyhpa eima châ tawhta siesaipa hnei hluh kaw pita, atlia via tawhna khata a pabohsana lâ he hmah la pathaopa châta, ly âchhih hmeiseih."

"Kô 2000 rachhôh tawhna khata Lyuva Khutla he regular kawpa ta ahmâpa châta, kha daihti no kha CEM duasu daihti reilei patu na ta, Art and Culture Department a vao na ta, cha nona chata Lyuva Khutla he MADC Calendar lia pachoh hra ei si tah pita, cha tawhta kô chareih ta ahmâpa a vaw châ. Eima Sawhkha heta yzie hnei kawpa ta Mara chi nata pho a sie thei n'awpa ta dâh nata phôh, Mara zydua ta eima zyh thei awpa pachhuahpanoh pita, New Maraland Vision ry liata hmah thata lapa a châ hra.

"Tipa 'B' khih ta Sâhria Ku nama hmâpa he vaw pazao lyma ula, khi hro ta châ vaw mopâ ei ta, Council chhaota he hawpa he pachhuahpanoh thei awpa ta hmah eima la hra aw. He Ku ahmâ awpa âvypa zydua aly kawpa ta a hmah awpa ta khokheina ei cha hlâ ei," tahpa ta CEM ta a biereipa a pachhâsa.

Puhpa J. Beikiasa, EM(Agri) chhaota biereina hneita,   "He hawpa Ku he zâko kha Zyhno liata hneipa châta. He hawpa ku nama pachhuhpanoh theipa he Khitlâh lôhraona vâta a châ, tah leithei na. Nama palôh âraozie apalâsa hmeseih. Atanoh Sâhria Ku eimâ hmâpa phavei ei tahna châ leipa ta, Sâh hria lichih nona khata hmâ theipa vaw châ ha sala, apha via awpa tlai. EM(Agri) ei châ chhôhta Sâhria Ku he eino ei hlaona châta, vâhnei ei tah hmeiseih.Kô heihpa liana chhaota Ku he hmâh pazao lymâ awpa ta khokheina ei cha hlâ ei," tahpa ta a biereipa a pachhâsa sa

Puhpa R. Lalrinawma, DAO Siaha nata Puhpa C. Vahlo, Ex.EM, MADC zy ta biereina hnei hra ei ta, Puhpa Beihu Nohro, Dyeputy Chief Whip, MADC ta alynabie reina a hnei.

Sâhria Ku Organizing Committee ta report ama pienazie ta; atakô liata Tipa 'B' khih tawhta Lyu ahneipa cha Ody 115 ama châ. Ama chichei-bialopa tawhta Sôh hmô awpa ta amâ hnabeiseihpa cha Lo 124 (1.24Crore) rachhôh a châ. Sâh ahneihluhchaipazy; 1st Puhpa H.Lalramchhuanngaia, 2nd Puhpa Az.Lalrammawia , 3rd Puhpa H.Rokima nata Chhâmei ahneihluhchaipa Puhpa Z.Khumtira hnohta lymâ piepa ama châ. Ama lymâ he Puhpa M.Laikaw,CEM, Puhpa L.Precila, EM (PWD) Puhpa N.Lalrosanga, Vice Chairman Planning nata Sâhria Ku organizing Committee zy ta ama pachâpa.

Ku ahmâna liata Laihsa Teresa Ngiano Hlychho, Laihsa Jessica Hlychho, Laihsa Rovina khaimeichhô, Satlia John Banyan nata Satlia Adrew ST.Lalherliana zy ta hla sapa ta Zawpi Ku âhlaopazy ama palô pahawh.

Ku âhlaopa Zawpi ta Ku kyhchhina(sa nata lao) pybie kawpa ta nie khohpa ta Tipa 'B' liata Sâhria Ku ahmâna daihti cha pachhâpa a châ.

ISSUED BY 

Information & Publicity Department 

Mara Autonomous District Council 

Siaha.