Mararâh zawpi zydua eima Beipa Zisu Krista mohta Christmas nata Kôthiehpa anaohna ei chahlâ ei.

Eima Beipa Zisu Krista khizaw lâ pachhana raihria awpata a vaw pina daihti rôhna ngaitapa he Krizyhpazy châta daihti rôhnapa nata a lychhih ngaitapa châ ta, keimo Marasawzy châta chhochhi cha aly via pachai awpa eima châpa ta ei pahno. Thâtihpha khaihna vâta eima pahno beih leipa nata hmô beih leipa, sapa nata thlahpa byhnâ hluhpi a topa eima châ.

Marasaw eima vâhneizie nata Abeipa ta kyh maniah a pachâzie he pahno thaipa ta, eimâ ly ngaita awpa a châ.

“Khizaw liata a pahrâpa zydua ta Ano cha palyupalih ei se” tahpa Hlazy 33:8 liata maniah a chhopa hawhta he daihti rôhnapa he Chyhsa hluhpi ta eimâ ly dâh alyu tlâ hra vei sala, eimâ lyna cha Abeipa Khazohpa liata y mawh sy.

Marasaw eima râh khôtho lâta a ypa zydua chhao ta, he daihti he aly kawpa ta hmâh chyu awpata khokheina chahlâ ei na ta, paritheipa nata moleina hluhpi tawhtapa asohsipa ta, Khazohpa khozie hawhta he daihti phapa he hmâah chyu awpata ei cha hrua ei.

Kô 2024 Christmas nata Kô 2025 Kôthiehpa he Abeipa khozie nata aly tlâh châpa ta hmâh chyu awpata Krista liata ei chakaolâhpa zydua cha hlâ ei na ta, he daihti rôhna ngaitapa maniah hmâlâh hmâ khao leipa ta, thina lytlâh maniah khôsai hapazy nata mâchhiesapazy palôh hmeiseihpa ta ei taokhei ei.

Abeipa ta mâchhiesapa zydua thlalôhna rie pie sala, atakô Christmas nata Kôthiepa heta moto châta byhnâ hluhpi vaw tlôkhei sala, eima zydua hnohta adyhna nata aryhna vaw tlôkhei mawh sy.

Sd/- M. Laikaw

Chief Executive Member

Mara Autonomous District Council

Siaha