Mara Autonomous District Council (MADC), Siaha, Government of Mizoram, India

PRESS RELEASE

NO.32/2025

SIAHA, 28 Pamih, 2025, Chutynoh - Atanoh my dawh 10:30 AM kha ta Zyhno Bei Vaih Middle School Building sa thiehpa cha Puhpa M. Laikaw, Hon’ble CEM ta a pahy.

Pahyna a hneikhai tawhta Programme taopa liata Puhpa M. Laikaw, Hon’ble CEM chata biereina hnei ta, “School Building thiehpa pahy awpa ta Khichhai Laipa châta nama khokheina ei to vâta alynabie ei reih. Hmialâ Marasawzy achuna liata hmah eima sie thei nawpa pachâpa ta School thiehpa padua awpa ta vision pha kawpa hneipa ta Zyhno Bei Vaih liata Middle School thiehpa pachhuapanohpa a châpa he aly’pa a châ hmeiseih.”

“Mararâh leilô mopa ta Education leipa ta cha adua papua nawpa y vei; chavâta Thyutlia zy achuna lâthlôh liata eimâ chhihtha lymâ awpa a peimawh kawpa a châ. He hawhta a châ vâta MADC Budget session liata Education Department liata sôh eima soh hluh chai; râh nata Awnano chhituhpa, businessman, theihthaipa, NGO Leaders etc. phapa hnei awpa ta achuna he a peimawh kawpa a châ. He School tawhta achupapuapazy, châ ngâlâh pathaisa leipa ta Khazohpa ta talent a piepazy papôhsa tah, Mental nata Physical palaiseihsa ta, chyhsa hmâtlâh châpa papua awpa he Education ta â chhuahna a châna hawhta Teacher nahzy nama theina zydua papua awpa ta eimâ haw.”

“Mararâh liata School thokha he cha sawhkhâ rai angia nawpa châta paduapa hawhta pachâna a y tyh. Zyhno deikua he hawpa châ leipa ta, râh luh phapa ama puana su, Mara Freedom Party â duana su zy a châna hawhta hmialâ daihti eima sawnahzy achuna liata amâ sosâh via lymâ nawpa tahpa ta vision hneipa ta School thiehpa nama paduapa a châ vâta aly’pa a châ kaw - chahawhta kaw châ awpa chhao ta nata eima Leaders a châ haipazy a kaw thla thei awpa taihta eima thyutlia châ achuhaipazy eima cha hnabeiseihpa a châ.”

“Thokha School lâ chhihthapa ama châ hai no ta, thokha deikua home lâ chhihthapa ama châ. 12th Term MADC he ta aruta lâta Marasawzy chi nata pho luh miah la ngâhaipa nata chariah chakeih hawhta tahmâ chhâ liata eima khakhai lai chaipa Drugs nata Paritheipa zy he a dyuh lymâ aw ta, râh zawpizy chhao ta adyuh lymâ awpa ta eimâ pasyu. Awnanopa, NGO, khitlâh nata sawhkhâ rai hriapazy ta mopâtlâh châ awpa a dyuh lymâ si la, MADC ry liata sawhkhâ ahriapa, paritheipa achhaih thei leipa Teacher-zy ama y khiah report lymâ si la, action eimâ la lymâ aw.”

“Sawhkhâna phapa (good governance) nata ryureina siapa nata adona (justice) hneina chô ta sawhkhâna siekhei awpa ta New Maraland Vision eima hnei. NGO, Khitlâh VC nata Awnano lia chhao Ryureina sia leipa nata do leipa a y lei khiatala a bua ha tyh. Chavâta ryureina dopa he District Council tawhta siekhei pi ta, NGO, VC nata Awnano lia chhao siekhei awpa ta eimâ pasyu.”

“MADC liata sawhkhâna siekhei awpa ta miah nama deichhy lymâpa hawhta thlahchhâ chhao miah nama bao pazao lymâ awpa ta a châ haw pi ta, he hawh pyly ta School Teacher nata Student-zy lia ngâlâh maophaohna pahnieh leipa ta, a khih/vaih hneituhpazy pi ta mohpazi si la, ama result a pha ma tahpa hleikhô ta maophaohna la chyu si la, thlahchhâ bao lymâ suh u.”

“He School he achuna su phapa vaw châ lymâ sala, siku hawtizy ta talent ama papôhsa school vaw châ sa la, byhnâ vaw châ awpa ta khokheina sâh chaipa ei chahlâ ei” tahpa ta bietana a reih.

Zyhno Bei Vaih chhôh liata School a y tlakaihpa Zyhno Bei Vaih Middle School he MADC pahnokheipa ta Zyhno Bei Vaih khitlâh ta kô 2023 liata ama paduapa châ ta, Kô 2023-2024 liata Student 68 y ei ta, 2024-2025 liata 64 ypa ta MADC School Education Department ry liata Circle pachhaihpa ‘Chapi Circle’ liata kô 2023-2025 chhôh ta student ama hluh chaina School a châ.

School O he 72 x 16 Ft. laipa, Office o no-eihta sapa 34 x 16 Ft. ta paduapa he Biatuhpa MLA Puhpa K. Hrahmô nata Biatuhpa MDC Puhpa L. Prisila zy tawhta MLALADS Fund nata MDCLADS Fund hleikhô ta khitlâh VC nôpawzy sôh patohpatiana tawhta sapa a châ.

Pahyna Programme he Puhpa L. Vabeichhuakhu, Chairman, School Managing Board (SMB) ta chhihtha ta, Rev. K. Leader, ECM Zyhno Biatuhpa ta Hlazy 126:1-3 reipapuana a hnei khai tawhta pavaosana thlahchhâna a hnei.

Puhpa L. Prisila, EM (i/c PWD) MADC ta biereina chyupa hnei ta. Puhpa KT. Mako, Secretary, SMB ta report pie ta, Machâ VT. Chheitlai ta thlahchhâna hneipa ta Pahyna programme he pachhâsa.

Ary liata palâsapazy he Siaha tawhta CEM chakaochahlâ tah, azi theipazy ama châ:-

1. Puhpa L. Prisila, EM i/c PWD etc.

2. Puhpa Tiahlei Syuhlo, EM i/c EF & CC, etc

3. Puhpa T. Seido, EM i/c Sports, etc.

4. Puhpa M. Chiadung, EM i/c Soil, etc

5. Puhpa Beihu Nohro, Deputy Chief Whip

6. Pihnô A. Nelly, MDC

7. Puhpa LC. Apaw, Ex-MDC & GS, BJP District HQ, Siaha

8. Puhpa B. Luaha, Ex-MDC & Secretary, BJP District HQ, Siaha

9. Puhpa Beirokhu Beita, I&PO, MADC.

10. Puhpa KT. Vabeikhokhei, Asst. Survey Officer

11. Puhpa K. Nahemia, Cameraman