PRESS RELEASE

NO.105/2023

SIAHA, 18 Thlazoh, 2023, Chutynoh - Atanoh zâlâ dawh 2:00 Pm kha ta Siaha Meisatlâh liata MADC AH & Vety. Farm Staff Quarter, dyh 2 ta tlô thei awpa cha Puhpa M. Laikaw, Hon’ble CEM, MADC ta a pahy.

Pahyna programme chyupa daihti ahmâpa châ ta, Dr. Beizakaw Vytu, Sr. VO ta chhihtha ta, Machâ K. Ralua, Superintendent ta Devotion a hmâh. Puhpa K. Beirahmo ta mo pakha hlasana hnei ta, Puhpa Beitu Solo, VFA ta Technical Report a pie.

Staff Quarter pahytuhpa Puhpa M. Laikaw, Hon’ble CEM chata biereina chyupa daihti hmâh ta, MADC AH & Vety. Department he Department chynawh kawpa a châ tarawpa ta atanoh liata ama achievement hmô thei awpa a châpa cha aly’pa a châzie reih ta, MADC ry liata Department zy ta amopâ awpa a châ tah ta, kô khachâ rakha ma Department liata hmahsiena a y thai khao lei khiah taozie panano laih ta, hmahsiena a y cheingei awpa hmo lâta pahiepasâh laih awpa a peimawh zie a reih.

“MADC AH & Vety. Department he Mizoram sawhkhâ ry liata a vaw y tua vâta MADC ry liata a vaw y tawhta Farm tao nawpa ta râh phapa hnei lei pi ta, he hawhta a châ no ta râh eima hnei tlakaihpa su liata sôh chyh kawpa tawhta asset/ryu pitlohpa eima hneipa he aly’pa a châ kaw.

Sawhkhâ thiehpa liata building pahy tua chaipa vaw châ pâ ta, aly’pa a châ hmeiseih.”

“Eima râh leilô mopa ta Vety. nata Agri. leipa ta ativyna hropa a y awpa lyu vei - he Department sâ 2-pazy liata eima tiama lymâ awpa a peimawh. MADC Agri. Department ta a tliata liata Backhoe Loader (JCB Company) nata Tiller (cultivator) zy chaleipa châ ta, he he hmahsiena a châ hleikhô ta eima leipalie zy cha sao daihti liata sâh zy chheipa ta chhiah daihti liata chichei hropazy eima chei laih awpa a châ.” 

“Eima râh ativy nawpa ta eima palôh eima pie via awpa byuh ta, PM Modi he noh kha liata dawh 17 chhôh râh châta rai a hria hai tahpa vaw thei pi ta; keimo chhao eima râh hmah pasiesa awpa ta eima tiama awpa apeimawh kaw; Khazohpa ta maophaohna miah a piepa liata palôh hmâh hluh via tah, râh hmahsiena châta patuapaluana daihti hmâ tyh awpa a châ.”

“Vety. Department nahzy nama achievement he châ lykhei ei na ta, Mararâh châta Department phahnai hmeiseihpa châ awpa ta khokheina ei cha hlâ ei” tahpa ta pasyuna bie pha kawpa a reih.

Daihti chhâna liata AH & Vety. Department avaotuhpa Puhpa S. Lalremthanga, Hon’ble EM ta biereina chyupa nata alynabie reina daihti hmâh ta, zawpi ta Bei Zisu thlahchhâ pachupa reiparaohpa ta programme he pachhâsapa a châ.

He Staff Quarter pahyna liata MADC nôpawpa tawhta Puhpa K. Chhuabei, EM, Puhpa Beirahmo Syhly, EM, Puhpa T. Seido, EM, Puhpa N. Beihu, Dy. Chief Whip, Puhpa M. Chiadung, Town Committee Chairman zy ahlao ei ta, Officials tawhta Puhpa K. Vanlalliana, Secretary to D/C, Puhpa K. Beingiachhie, Sr. EO (P/S), Puhpa JB. Chozah, Sr. EO (M/S), Pihnô S. Lalmuanpuii, Sr. LAO, Puhpa Beirôkhu Beitâ, I & PO, Puhpa John M. Beilaisei, PS to CEM zy hleikhô ta Staff thokha ahlao ei ta, MJA Siaha tawhta Puhpa B. Dawpho, Editor (ToM) nata Puhpa Jeffrey Khara, Editor (Moonlight) zy amâ hlao thei hra.

Atanoh liata pahypa Staff Quarter O he adoh lâ Feet 50, a hâ lâ Feet 22 a kawpa châ ta, staff dyh 2 tlô thei awpa ta ₹.4.00 Lakh hlei hryuhpa ta sapa a châ. Programme chhâ tawhta Staff Quarter pahypa alyna kyhchhi AH & Vety. Department ta amâ chhuanohpa cha programme avaw hlaopa zydua ta dôh chyupa a châ. 

ISSUED BY:-

Information & Publicity Department

Mara Autonomous District Council

Siaha.