PRESS RELEASE

NO.84/2024

SIAHA, 3 Phiata, 2024, Pobienoh - Atanoh dawh 2:00 PM kha ta Environment & Forest (E & F) Department, MADC ta Tisopi khih liata Beat office cum Quarter O ama sapa cha Puhpa M. Laikaw, Hon’ble CEM, MADC ta tlô thei awpa ta a pahy.

Pahyna Programme taopa liata Puhpa Thaly T. Azyu, CF, MADC ta chhihtha ta, Machâ J. Sahlo, Awnano hyutuhpa, ECM Tisopi ta pavaosana daihti a hmâh. Puhpa Beichatlaisa Azyu, FRO(W&P) ta Techinical report pie ta, laihsa J. Teresa nata satlia Labana Azyu zy ta mopakha hlasana ama hnei.

Puhpa M. Laikaw, Hon’ble CEM biereina chyupa a hneipa liata khitlâh nôpaw, VC, NGO leaders nata atanoh programme a vaw hlaopa zydua hnoh ta anaohna nata alynabie reih ta, CF nata a hrialâhpazy hriapasana vâta MADC ta achievement pha kawpa eima hnei heih vâta alynabie a reih.

“Tisopi he Mararâh ta râhmâh nata râhsa zy a hneipa pabohsana kyh liata khih peimawhpa châ ta, district hropa nahta asiepahliena su a châ vâta a peimawh kaw. Thiahra khih lia chhao Forest Beat post pahy awpa pachhuapanoh ngâhaipa châ ta, eima râh lyuri bâkhâh chhôh he a pha kawpa ta mohôh lymâ achhuah pi ta, concerned department ta hmahlana liata Department nata zawpi a hrialâh phapa a peimawh kaw. E & F Department hrialâh awpa hleikhô ta School Teacher nahzy nahta ahriâlâh pha awpa he khitlâh hmahsiena nata siku hawtizy achuna liata a peimawh kawpa a châ. Forest râh â boh lei khiah a râh liata a pahrâhpa chyhsazy chhao a boh hlei aw ma pi.”

“Forest Department he zawpi chadie chahmytuhpa hawhta pachâ leipa ei si la, atahmâno ta pabohsana rai eima hriapa he ta chhâ a vaw y awpa châ ta nata eima ti nata râh châta râh khochhihpa avaw sa papua awpa châ ta, râhsa nata pazu pavaw zy ta thlalôh kawpa ta ama pahrâ nawpa su châta eima pachhuapanoh awpa a châ.”

“Apabohsatuhpa châ a chhuah chyu awpa ta palôhru thiehpa hnei awpa ta cha hrua ei na ta, E & F Department kutha bâhtha patlôtuh awpa ta VC, Awnano, Khitlâh nata NGOs zy chhao hrialâh phapa nata hriaparaohna phapa hnei awpa ta eimâ hrua hmeiseih.”

“Khazoh ngiachhiena vâta Marasaw a pôh via lymâ pi ta, atahmâ MADC duahmo liata sawhkhâ rai ta miah a daih tiah khao vei. Chavâta tahmâ he ryureina sâh viapa teipa ta hmahlana siekhei ngâhaipa a châ. He kyh liata Marasaw zydua lôraoh kawpa ta hriaparaoh chyu awpa a peimawh kaw.”

“Pari theipa he Mararâh hmiahao chaipa a châ - he he Khitlâh, Awnano & NGOs zy ta adyuh chyu awpa ta eimâ hrua” tahpa ta pasyuna nata pahruana bie pha kawpa a reih.

Puhpa Tiahlei Syuhlo, Hon’ble EM i/c E & F Department, MADC chhao biereina chyupa daihti hmâh ta, Tisopi khih liata sawhkhâ O etc. zy he ahneituhpa nata azipa palôh phaopa ta mohôh awpa ta ahawna tao ta, Khitlâh hmahsie awpa eima khoh khiatala eima khih liata infrastructure zy he khih hmiaphao panano theipa a châna hawhta a pha kawpa ta mohôh awpa a châ tah ta, Department hmahlana tha pazeituhpa châ leipa ta tha patlôtuhpa nata abaokhâtuhpa châ chyu awpa ta Tisopi khihsawzy hnohta pahruana nata ahawna a tao.

Daihti chhâna kiata Tisopi khitlâh vyuhpa ta Puhpa J. Lalrinsanga, VCP, Tisopi ta alynabie reih ta, Puhpa Thaly T. Azyu, CF, MADC ta MADC E & F Department vyuhpa ta vote of thanks reina daihti a hmâh hra.

He Beat office cum Quarter râh he Tisopi VC nahzy ta a saipa ta ama piepa, Nawh (January) 2022 tawhta sa pathaopa châ ta, a O he 36x30 Feet ta akawhpa, chhâh 3 ta sapa a châ. Chhâh 1-na nata chhâ 2-na liata quarters sâ 1 raihrie y awpa ta sapa châ ta, a chô chai liata Beat office a y. A yna su he Siachangkawn, Amôtlâh nata Siaha atyhpakhyna su a châ. ₹.18,23,624/- hryuhpa ta E & F Departmemt mohôhna ry liata Tisôpi khih mozy ta ama sapa châ ta, he Beat office liata Beat Officer châ ta Puhpa N. Vakha, Dy. Ranger nata a hrialâh awpa staff pa 2 sopa a châ.

Puhpa M. Laikaw, Hon’ble CEM he BJP District Headquarters, Siaha tawhta Pihnô A. Nelly, Vice President nata Puhpa Pawkhu T. Azyu, General Secretary (Org.) zy ta kaw zi ei ta,  Officials tawhta Puhpa Beirôkhu Beitâ, I&PO, Puhpa T. Pabua & Puhpa Martin L. Hlychho, Cameraman zy hleikhô ta E & F Department liata officers & staff hluhpi ta he programme he ahlao ei ta, Tisopi tawhta khitlâh nôpaw, VC, Awnanopa nata NGO leader-zy hruapa châ ei ta, programme chhâ tawhta alyna zâpati pachhuapanohpa cha pahyna programme ahlaopa zydua ta dôh chyupa a châ hra.

ISSUED BY:

Information & Publicity Department

Mara Autonomous District Council

Siaha