PRESS RELEASE

NO.147/2023

SIAHA, 15 Di, 2023, Chutynoh - Atanoh dawh 1:00 Pm kha ta MADC Law & Judicial Department ta ama oachhuapanohpa “The Mara Customary Law 2023” châbu cha zawpi reithei awpa ta Puhpa M. Laikaw, Hon’ble CEM, MADC ta E & F Conference Hall, MADC Complex liata a palâhâh.

Palâhâhna programme he Puhpa K. Vanlalliana, Court President & Recorder, MADC ta chhihtha ta, Rev. K. Laichhua Azyu, Moderator Elect, ECM Assembly ta Hmotaopa 17:26 bie reipapuana nata reipakawhna hneipa ta Devotion hmâh ta Puhpa HT. Philip ta book review daihti hmâh ta, Puhpa H. Vabeikhai, ACO ta Technical Report pie ta, Alfina LC. Ngopawsia nata FC. Nipari zy ta hlasana ama hnei. Puhpa C. Siatha, Judicial Officer, District Council Subordinate Court, MADC ta vote of thanks a reih. 

Puhpa M. Laikaw, Hon’ble CEM ta châbu palâhâhna a hnei khai tawhta biereina chyupa hnei ta, palâhâhna liata a vaw hlaopa zydua hnoh ta anaohna nata alynabie reih ta, Mara Customary Law he ano MSO General Headquarters President  vaw châ no tawhta a vaw pachâ peimawh hapa hawhta CEM a vaw châ hmiatua daihti liata hmah vaw la pathao ha ta, atanoh liata a palâhâhtuhpa a vaw châpa cha ngiatlâh châ kawpa hmo a châ tah ta, Marapazy pi he eima Art & Culture laiseih lei, museum, library nata customary law zy hnei leipa ei si la eima Marapa thâtih achu khohpazy châta chhaichhi y aw vei tah ta, atanoh liata release thei awpa ta a hriapasatuhpa zydua hnoh ta alynabie a reih.

Chi nata pho apôhkhana hnei leipa ta cha za a chhih vei; nôpaw daihti liata mâ nata chhao a y leipa tahmâ thyutlia daihti liata taochhyhpa a y pathlei lei nawpa ta dâh sianôpa Written Law eima hneipa he a pha ei tah kaw tahpa reih ta, eima chi nata pho châta chhaichhi eima pachhuapanohpa he Mara zawpi ta zyh chyu awpa ta bie eimâ ta khoh kaw tahpa a reih.

He châbu he Identity pabohsana chhaichhi peimawh kawpa a châ. Maophaohna liata apha kawpa ta taopa he zachhihpa a châna hawhta Marapazy pi, eima châna dopa hawhta y laihpa he zachhihpa a châ.

Atanoh liata eima release pa chhôh liata châbie arohpazy he kho â khi lei thei - a byuhna hawhta baichhi laih awpa a châ – he châbu he Marapazy pi eima zachhina & apôhkhana châta chhaichhi sâkha a châ tahpa pahno si la, zy achhuah chyu awpa ta Mara zawpi, NGO & Awnanopazy hnoh ta Appeal ei tao khohpa a châ tahpa reih ta, atanoh liata programme a vaw hlaopa zydua Christmas & Kôthieh alypa nata thapha kawpa ta hmâ chyu awpa ta anaohna nata khokheina a hlâ chyu ei.

Zisu Krista thlahchhâ pachupa reiparaohpa ta programme he pachhâsapa a châ.

He ‘The Mara Customary Law 2023’ châbu he Mara reih nata Mongyuh (English) ta print pa châ ta, akhopazy châta Law & Judicial Department, MADC liata office hours chhôh ta pado theipa a châ.

ISSUED BY:

Information & Publicity Department

Mara Autonomous District Council

Siaha.