Mara Autonomous District Council (MADC), Siaha, Government of Mizoram, India

PRESS RELEASE

NO.33/2025

SIAHA, 28 Pamih, 2025, Chutynoh - Atanoh dawh 12:30 PM kha ta Siatlai khihsawzy ta Siatlai Community Hall pangaina liata Puhpa HT. Vakô (L), First M.D.C., 1952 Mizo District Council nata Puhpa PP. Khaidô (L) First M.R.C., 1953 P-L Regional Council zy Palyupalihna Lôbô ama pachhuapanohpa cha Puhpa M. Laikaw, Hon’ble CEM ta a pahy.

Puhpa M. Laikaw, Hon’ble CEM chata biereina hnei ta, “He hawhta Siatlai khihsawzy ta nôpaw hmiatuapazy palyupalihna châh ama pahnopa he Khazohpa tawhta sona nata pahnosana nama daopa a châ tah leitheipa châ vei; he palyupalihna lôbô he ta Khazohpa ta Marasawzy châta byhnâ hnawh a vaw pachâsa cheingei aw tahpa ei hnabeiseih” tah ta, “Marasawzy ta MDC history zy pachâpapuana hnei tyh lei pi ta, eima nôpaw hmiatuapazy he pasôna châh eima pahno awpa a châ” tahpa reih ta, “Programme pachhuapanohna châh nama pahnopa he Khazohpa ta he vaih nata tlâh byhnâ a pie khoh tahpa ei ngiapâ” tahpa a reih.

“P-L Regional Council a duah leipa châ sa la, MADC a duah aw vei; Khazohpa ta achhuahna hneipa ta Marasawzy châta byhnâ vaw châ awpa ta Siatlai he a pachhuapanoh tahpa ei ngiapâ hra.”

“Eima Nôpaw hmiatuahpazy theilâpa keimo ta tahmâ eima hria. Nôpaw hmiatuapazy hriapasana vâ nata Khazohpa ngiachhiena zawhzi ta chi nata pho khotalaina, ryureina eihrâhpa eima hnei thei nawpa ta MADC hnei pi ta, tahmâ deikua eima Opi he miah a daih khao vei - O lai viapa - ryureina sâh viapa nata ryureina lai viapa eima hnei thei nawpa ta eima hia a byuh. He hawhta a châ no ta, MADC he a olopa ta y ngâthlâh leipa aw ta, nôpaw hmiatuapazy taopa lâthlôh lâlaopa liata Khazohpa ta miah siesai aw vei. Chavâta eima chi nata pho aboh nawpa nata laiseih nawpa ta ryureina lai viapa he, Marasawzy ta eima buakhei awpa nata a hlaotlohna taihta tiama kawpa ta eima hia lymâ awpa a châ.”

“Eima râh liata paritheipa ta nôhmei hârâ dyhchhie dyhpha pathlua leipa ta eima O chhôh miah â ngiahnaoh ngâhai. Eima Nôpaw hmiatuapazy hnôh pazi tah, MADC liata ryu a kaw reih awpa - chhâ a vaw y awpa châta leader su liata akaw pabie heih awpa liata he vaih nata tlâh, eima o chhôh chyu amohpakia si la, eimâ chhuanoh awpa nata chahawhpa chyhsa cha eima khitlâh ta eima hnei khao aw ma tahpa amopakia awpa a peimawh.”

“Marasawzy Hmiahao laichaipa cha paritheipa nata drugs a châ; pari theipa nata drugs tawhta eimâ boh lei khiatala a luh châ tyhpa kha, a chaolahmei eima châ pathleo aw. Chavâta Chhoh to, Khitlâh nata Awnanopazy ta thlahchhâna chô ta Paritheipa he eimâ dyuh awpa a peimawh hmeiseihpa a châ.”

“Atanoh programme eimâ hmâna noh lia he ta Khazohpa china chô ta hmialâ Mararâh châta eimâ chhuanohna noh châ sala, eima lâthlôh amopakiana daihti nata Byhnâ eima tona hnawh vaw châ sala, eima Khazohpa ta sapa nata thlahpa liata byhnâ chapie via lymâ ei sala, Awnanopazy ta Khizaw moleina tawhta aboh u la, vaih-tlâh nata a râh zawpi Khazohpa tawhta byhnâ nama tona châ awpa ta khokheina sâh chaipa ei cha hlâ ei” tahpa ta khokheina bie nata pasyuna bie pha kawpa a reih.

Programme he Chairman Puhpa HC. Chhuasa, VCP Siatlai ta chhihtha ta, Revd. CH. Chhama ta devotion a hmâh. Puhpa M. Laikaw, Chief Guest hleikhô ta Zyhno biatuhpa MDC Puhpa L. Prisila, Hon’ble EM (i/c PWD), Dr. HT. Phosa (Puhpa HT. Vakô chhôhkha tawhta) nata Machâ PP. Pahu (Puhpa PP. Khaidô chhôhkha tawhta) zy ta biereina hnei ei ta, Puhpa C. Beirahnia, Ex-VCP ta biereina chyupa daihti a hmâh hra.

He daihti liata Machâ PP. Thawla, Ex-CEM & MoS ta palyupalihna Lôbô pachhaipa ta taopa Siatlai Souvenir palâhâhna hnei ta, programme a vaw hlao theipa nôpaw viapazy hnoh ta Souvenir he asaipa ta raina hneipa a châ hra.

Atanoh programme he laihsa Rovina Khaimeichho, laihsa K. Estheri (Siatlai) nata laihsa ST. Catherine (Tipa ‘V’) zy ta hlasapa ta ama palôpahawh.

Machâ C. Rasa ta Report & Alynabie reina daihti hmâh ta, Revd. Dr. ST. Zawsi ta byhnâ awna thlahchhâna hneipa ta programme he pachhâsapa a châ. He khai tawhta palyupalihna kyhchhi achhuanohpa cha khisaw zawpi nata palyupalihna programme avaw hlaopa zydua ta aly kawpa ta dôh chyupa a châ hra.

Ary liata palâsapazy he Siaha tawhta CEM chakaochahlâh tah, azi theipazy ama châ: -

1. Puhpa L. Prisila, EM i/c PWD etc.

2. Puhpa Tiahlei Syuhlo, EM i/c EF & CC, etc

3. Puhpa T. Seido, EM i/c Sports, etc.

4. Puhpa M. Chiadung, EM i/c Soil, etc

5. Puhpa Beihu Nohro, Deputy Chief Whip

6. Pihnô A. Nelly, MDC

7. Puhpa C. Lawbei, Ex-MDC & Vice President, BJP District HQ, Siaha

8. Puhpa LC. Apaw, Ex-MDC & GS, BJP District HQ, Siaha

9. Puhpa B. Luaha, Ex-MDC & Secretary, BJP District HQ, Siaha

10. Puhpa TT. Kholaw, Sr. EO (PS)

11. Puhpa Beirokhu Beita, I&PO, MADC.