PRESS RELEASE

NO.86/2023

 

SIAHA, 30 Chhiepa, 2023, Chutynoh – Atanoh dawh 1:00 Pm pa ta Siaha College Seminar Hall liata 37th Remna Ni alyna programme hmâpa liata Puhpa M. Laikaw, Hon’ble CEM, MADC cha khichhai laipa châpa ta programme a hmâkhei.

 

Puhpa M. Laikaw, CEM zachhihpa chata atanoh liata khichhai laipa châta apahawhpa Puhpa Robert Romawia Royte, Hon’ble Minister of State i/c S&YS, DC&MA etc. a kaw tlô awpa hnabeiseihpa ta MADC nôpawpazy ta Circuit House liata alyna Pawpiri chhao ta ama mokhâh hleikhô ta ano châta zâpati chhao CEM’s Bungalow liata pachhuapanohpa châ ta, vâlei chhie vâta a kaw sie nawpa Helicopter cancelled pa châ ta, a kaw tlô thei khao leipa cha pei ei tah zie a reih.

 

“Puhpa Laldenga, Mizo Nationalism a vaw pathao patôtuhpa zawhzi ta Mizo Nationalism he chhâ a vaw y lymâ awpa liata diah khao aw vei; he he Mizo nationalism movement result a châ. He movement a sie lymâpa liata Puhpa Laldenga nata a hrialâhpazy ta pachâna pasoh kawpa hneipa ta Mizo National Front (MNF) nata India sawhkhâ ta Peace Accord amâ vaw sign theipa he aly achhih hmeiseih ta, Mizoram chhôh liata a pahrâpa zydua châta hmo phapa a châ hleikhô ta keimo Minority zy châta thlalôh achhih kaw awpa ta Minority zy pabohsa awpa kyh liata he Peace Accord amâ sign pa liata asia kawpa ta ama vaw palâsapa he vâhnei achhih ta, aly âchhih pachaipa ta ei pahno.”

 

“Aryhna he Khazohpa bie liata a khozie hawh tlai châ ta, aryhna bie y chiehpa chakhiana zie ta hmah la awpa he Krizyhpazy tao awpa chi châ vei.”

 

“Atanoh liata bie eimâ ta khoh kawpa cha, aryhna ta â vaw chakaihpazy cha alyna, apôhkhana zy, hriaparaohna phapa zy, chipho nata râh hmahsienazy a châ. Aryhna a vaw y hlâta kô 20 a siepa liata cha school kiapa nata nietluana lâ dei châ leipa ta hmahsiena zydua y thei khao leipa ta, Mizoram headquarters – Aizawl liata zawtheina hmâpa ta chhopa châ ta, su to liata pheisaih zy riahchipa ta eima y; tahmâ deikua Peace Accord chata khotalaina miah pie pathi ha ta, chavâta tahmâ eima tao bâ awpa cha eima ti nata râh châta hmahsiena châta hriaparaoh awpa he apeimawh chaipa a châ.”

 

“District Council noeihpa hnei pi ta, District Council eima hmô tawhta kô 50 tloh ha ta, Golden Jubilee eima hmâh ha; kô 50 khô lâ liata Arise & Shine tahpa biepipa hmâpa ta sie pi ta, tahmâ he sawhkhâna thiehpa siekhei pi ta, good governance siekheipa ta New Maraland eima padua awpa eima tahpa a châ.”

 

“Good governance lia chata dâh nata phôh abie chai aw ta, Justice ta su hnei aw ta, corruption y leipa aw ta, sawhkhâ raihriapa ma, zawpi ta ma, eima tovyuh dopa eima to thei nawpa good governance padua eimâ chhuahpa a châ. Cha New Maraland padua awpa chata hmah la lymâ pi ta, cha liata eima hmiahao laichaipa ta eima pahnopa cha pari theipa Drugs he a châ. New Maraland liata Sawhkhâ, NGOs nata Awnanopazy apha kawpa ta hrialâh eimâ chhuah. Cha py 3 zy chata ahmiatua chai liata Maraland Anti-Drugs Committee padua pi ta, supply chain vâro tlai parao pi ta, Drugs hluhpi patu ei ta, Village level lia chhao padua lymâ achhuah pi ta, eima SP nata DC zachhihpazy chhao ta rei khoh lymâ ta, eima theina hawhta zawpizy raihria awpa he eimâ chhuahpa a châ. Râh zawpi hmahsie nawpa tluapa ta hmah eima la lymâ aw.”

 

“Atanoh liata District Council tawhta nata Mizoram sawhkhâ Department vyuhpa ta avypa zydua, atanoh liata eimâ hrua khohpa cha eimâ dady chyu liata eima râh nata zawpi hmahsie nawpa ta hriaparaohna phapa hneipa ta he râh he tao pathi ei suh u. He râh eima taopathi ha khiah Mizoram taopathi rai cha eima pathao haw tah na a châ aw. MADC, Mizoram sawhkhâ, eima Awnanopa nata NGOs zy chhao ta zawpi châta hriaparaohna eima peimawh hmeiseih. Cha liata Education phapa provide aw pi ta, Youth Affairs liata hnabeiseih ypa hmophapa taopa aw pi ta, zawpi ku raihriapazy hmah pasiesa aw pi ta, chatana chata zawpi security nata chi nata pho chata hnabeiseihna phapa eima tlôkhei thei aw.”

 

“Atanoh liata Mizo Hnampa Puhpa Laldenga nata a hrialâhpazy, Chief Minister Puhpa Zoramthanga nata a hrialâhpazy, Awnanopa nata NGO chhihthatuhpazy – âmo zydua hriaparoahna zawhzi ta Khazohpa ta Mizoram châta, Mizo History liata alei khao lei awpa ama taopa he eima Hyutuhpazy hnoh ta alynabie nata zana hlâ chanei heih si la. Atanoh liata programme he eima chipho nata râh chata eimâ hlâpathiehna noh châsala, Aryhna nata Adyhna ry liata ti nata râh châta theina zydua papuapa ta hrialâh lymâ awpa ta eimâ hrua chaneipa a châ” tahpa ta CEM zachhihpa chata bietapa a reih.

 

He Programme liata MADC tawhta nôpawpa EMs, MDCs thokha nata Official thokhazy amâ hlao hra.

 

Progamme chhâ tawhta 37th Remna Ni pachhaipa ta MADC Environment & Forest Department pachhuapanohpa ta raoeihpazy châta Siaha College Compound liata tho lo/bôna hneipâpa a châ.

 

37th Remna Ni programme hmâ khai tawhta Puhpa M. Laikaw, Hon’ble CEM chata hruaeihpazy châta CEM’s Bungalow liata zapati a pachhuapanohpa cha aly kawpa ta dôh chyupa a châ.

 

ISSUED BY:-

Information & Publicity Department

Mara Autonomous District Council

Siaha.