PRESS RELEASE

NO.141/2023

SIAHA, 6 Phiata, 2023, Chutynoh – Atanoh my dawh 11:30 Am kha ta MADC E & F (Environment & Forest) Department Conference Hall liata Observation of 69th National Wildlife Week programme ahmâpa châ ta, he liata Puhpa M. Laikaw, Hon’ble CEM, MADC cha khichailaipa châpa ta programme a hmâkhei.

Programme he Puhpa Thaly T. Azyu, CF, MADC ta chhihtha ta, Pro. Pastor Lalchhantluanga ta Devotion a hmâh. MTP Branch: Meisavaih West Hlapy zy ta Opening song sa ei ta, Puhpa Beichatlaisa Azyu, FRO (W&P) ta Powerpoint presentation hmâpa ta MADC E & F Department hmahlana report pie ta, Laihsa FC. Nipari ta râh kyhpachâna hla sapa ta zawpi a palôhpahawh.

Khichhailaipa Puhpa M. Laikaw, Hon’ble CEM chata biereina chyupa hnei ta, Mararâh he keimo eih châ ta, he râh deileipa ta râh hropa hnei lei pi ta, chavâta a râh leilô liata apahrâtuhpazy ta azipa palôh phaopa ta eima mohôh awpa a châ tahpa reih ta, râhsa, râhmâhpa nata aleilô pabohsana kyh liata eimâ pachu via lymâ awpa apeimawh tah ta, atahmâno tawhta Meithei nata Air gun eimâ chabapazy he eima padua vei khiata cha eima sawchhâ nawhchhâ liata eima râh liata râhsa hmô awpa y khao leipa aw ta, sawtliapazy ta miah ama maochhie kaw aw tahpa a reih. 

“E & F Department hmahlana cha MADC hmahlana a châ; E & F Department hmahlana he New Maraland vision miakha châ ta, eima pachâ peimawh ngaitapa a châ, adeichhy tah hriaparaoh awpa apeimawh ngaita. Mopakha asohsi lei vâta râh eima pakâ tyhpazy he pei hmeiseih ta, zawpi ta eima tao ha tyh; eimâ sohsi awpa apeimawh hmeiseih.”

“Mararâh he ti nata râh phapa ta tao si la, a chhôh liata a pahrâpa, hmohroh hneipa nata ato huso theipa maih ta ngiaryh kawpa nata thlalôh kawpa ta ama pahrâ thei nawpa ta atao theituhpa cha keimo, azipa, arâh leilô ahneituhpa he eima châ.”

“E & F Department he motlâh achâ kawpa, reithaitlâh achâpa ama châ. Ahriatuhpa officer nata staff zy ta, atahmâ tahpa liata palôh apatlâhsa leipa ta tiama kawpa ta eima râh châta hria lymâ awpa ta cha pasyu ei na ta, atahmâno ta nama hmotaopa he chhâ avaw y lymâ awpazy ta ama vaw reithai thei nawpa ta tiama papua via lymâ awpa ta ei châ haw ei.”

“Atanoh liata eima theme ‘Hmohrohneipa pabohsana kyh liata hriaparaoh’ (Partnership for Wildlife Conservation) he, he programme a vaw hlaopa nata Mararâh zawpi ta eima O chyu liata biepipa ta hnei si la, eima chhôhkha chyu liata E & F Department he hriaparaoh lymâ awpa ta apasyu chyu awpa ta ei châ haw ei” tahpa ta pasyuna bie reih ta, keima nata ei chhôhkhazy ta E & F Department hmahlana he eima hriaparaoh lymâ aw tahpa bietaina châta bâh chaluah chyu awpa ta CEM zachhihpa ta âhawna cha programme avaw hlaopa zawpi ta eima zyh aw tahpa pamosana ta bâh chaluah ei ta, he khai tawhta beireina daihti he alynabie reina ta a pachhâsa.

He daihti liata MADC E & F Department ta Mararâh leilô, râhsa nata râhmâhpazy pabohsa lymâ nawpa liata Department ta hmah ama lapa promotion Music Video ama pachhuapanohpa cha Puhpa M. Laikaw, Hon’ble CEM ta palâhâhna a hnei pâ hra.

Puhpa Tiahlei Syuhlô, EM i/c E & F Department, MADC cha Guest of Honour châpa ta biereina chyupa daihti hmâh ta, MADC E & F Department hmahlana cha MADC hmahlana a châna hawhta MADC Executive zy cha hmahlakhei awpa nata Mararâh zawpi lâ chhao hriaparaoh lymâ awpa ta ahawna a tao.

He programme liata Puhpa S. Lalremthanga, EM i/c School Education (P/S), Puhpa Beirahmo Syhly, EM i/c RD, Puhpa J. Vabeikiasa, EM i/c Agri., Puhpa Beihu Nohro, Dy. Chief Whip zy ahlao ei ta, MADC HoD thokhazy hleikhô ta hruaeihpa ECM Higher Secondary School Students nata ama pachutuhpa Puhpa S. Thakhai, lecturer, Miss T. Lalduhsaki, lecturer zy ahlao ei ta, Mister Hraisi 2022 satlia Francis Bohia nata Miss Hraisua 2022 laihsa Sironi Notlia zy amâ hlao thei hra.

ISSUED BY:

Information & Publicity Department

Mara Autonomous District Council

Siaha.