PRESS RELEASE

NO.146/2023

SIAHA, 15 Di, 2023, Chutynoh - Atanoh my dawh 11:30 Am kha ta Meisavaih Community Hall, Siaha liata Meisavaih â vaw dua tawhta kô 50 a tlohna Golden Jubilee (1973-2023) alyna programme pachhuapanohpa châ ta, he liata Puhpa M. Laikaw, Hon’ble CEM, MADC cha Chief Guest châpa ta programme a hmâkhei.

Host Satlia K. Beibiepatha nata laihsa Eurica Litho zy ta pahnie kawpa ta programme chhihtha ei ta, Rev. N. Beihrokhai, ECM Meisavaih biatuh Pastor ta devotion n hmâh ta, Puhpa L. Khuly, Chief Editor ta Meisavaih Golden Jubilee Souvenir Technical Report pie ta, Meisavaih chhôh liata hlasathaipa T. Samari, A, Chhualai, Evelyn Beingiazi Azyu, T. Nuzi, Beihropawngia Khaila, BP. Shebby Hlychho, A. Beilaipha zy ta hlasapa ta zawpi ama palôpahawh.

Machâ H. Sahlo ta Meisavaih thâtih reina hnei ta, Raymond Azyu, Golden Jubilee Secretary ta report pie ta, Machâ Pachi Hlychho, Local Secretary, ECM Meisavaih nata Machâ JH. Chohmo, Awnano Hyutuhpa, ECM Bethesda zy ta biereina chyupa daihti ama hmâh.

Puhpa M. Laikaw, Hon’ble CEM ta Golden Jubilee Souvenir palâhâhna a hnei khai tawhta biereina a hneipa liata a bierei tlâhpi viapazy:-

1. Atanoh liata programme avaw hlaopa zydua MADC moh ta Samaw ei châ hlâ ei. Mara History liata ngiatlâh châpa Meisavaih Golden Jubilee alyna liata Chief Guest châta araotuhpa Board nahzy hnoh ta alynabie ei reih.

2. Nama y na parohpa liata DC office sa awpa nôpawpazy ama khoh vâta Meisavaih lâ he a zâ pasiepa châ ei chi ta, nôpaw hmiatuapazy ta ti nata râh châta tahpa ta ama O nata lyu zy ama siesai vâta, a rônah tah na ta, zana ei hlâ hmeiseih ei.

3. Meisavaih he Marasaw â sua viapa ta eima yna su châ ta, Mara identity a chabatuhpa nama châ; areisina, hriapasana nata achhuahna hneipa ta kô 50 nama vaw sie haw - NGO nata Awnano achalih kaw tlôh ta a pata kawpa vaih tahpa ta eima cha pahnopa châ ei chi ta, âhnalasi, theilâ nata ku raihria tah aduapapuapa hluhpi nama y; amopâtlâh nama châ ngaita. Chahawhta MADC liata ES, Chairman, HoD zy a kaw châ paphapa vaih nama châ hleikhô ta hlasa thaipa puana su, châthaipa tawhta Revival Speaker phapa nama kaw hnei laih heih, nôpaw hmiatuapa hriapasana pabohsa tah, kô 50 khô lâ he cha a vaih chhôh liata adyryh leina ypazy siesai u la, Abei Khazohpa byhnâ pie tlâh châ awpa ta patohpatia u la, vaih hropazy amopâtlâh nama châpa apahnona chô ta keih chakâ pazao awpa ta eimâ pasyu.

4. 12th term MADC ta New Maraland vision eima hnei. IT chhâ liata Computer achu nawpa a hnei leipazy châta MADC ta IT Department tha patlôpa ta atahmâ he Computer achuna MADC NIELIT Study Centre padua ta, atahmâ he asaipa ta amâ chu hai. Chahleikhô ta eima râh he râh khochhihpa, zawpi châta nata hmohrohneipazy châta thlalôhpa ta ama pahrâ nawpa su achâ thei nawpa ta hmah eima la ngâhai.

5. Eima râh liata chi chhih chaipa nata chhâ a vaw y awpa châta eima charoh miah chhawhtuhpa cha Drugs he a châ. Chavâta 12th Term MADC ta MADC, Awnano nata NGO zydua pahlypa ta Maraland Anti-Drugs Committee padua ta, he he eima theina kao maih liata tha patlô chyu awpa ta châhaw ei na ta, eima râh hmiahao laichaipa he VC, Awnano & NGO ta he vaih he drugs free vaih châta awpa ta hmah la awpa ta ei châhaw ei.

6. 12th Term MADC ta good governance siekhei eima khoh - ryureina dopa ry liata justice, corruption, tovyuh dopa to awpazy he â tlôh awpa a châ.  Vaih nata tlâh phapa hmahsiepa châ awpa ta la a vaih chhôh liata ryureina siapa nata pathaihpa siekhei a byuh. Chavâta Awnano, VC nata NGO zy ta ryureina dopa, siapa nata pathaihpa ta eima vai nata tlâh chhihtha achhuah chyu awpa ta eimâ pasyu hmeiseih.

7. Atanoh Golden Jubilee eimâ lyna noh tawhta a heihpa chhâ a vaw y awpa next generation châta foundation pathaona noh ta hmâh u la, hmophapa zydua pabohsa lymâ tah, sapa nata thlahpa liata aryh u la, vaih apôhkhapa, zachhihpa, amopâtlâh a châpa châ pazao lymâ u la, Khazohpa ta sapa nata thlahpa liata byhnâ chapie mawh ei sy.

ISSUED BY:

Information & Publicity Department

Mara Autonomous District Council

Siaha.