PRESS RELEASE

NO. 109/2024

SIAHA, 13 Phiapi, 2024, Pakhynoh - Atanoh my dawh 8:00 AM kha ta Puhpa M. Laikaw, Hon’ble CEM, MADC ta Saikao liata Mararâh Missionary Revd. RA. Lorrain pabuna thlâsu tlypa ta Pihnô Vaili (Revd. VLA Mark) thlâ liata Pawpi a soh.

Atanoh 13.11.2024 he Pihnô Vaili miah â pahâsai tawhta kô 1 a tlohna a châ.

Puhpa M. Laikaw, CEM ta thlâsu liata Pawpi a sona liata biereina chyupa hnei ta, “Marasawzy, eima vâhneina he a rônah kaw, eima thlahpa lâ Missionary RA. Lorrain chhôhkha nahzy ta miah a mâ pabupâ hleikhô ta sapa lâ liata, Revd. L. Mark hmâpa ta thisaih ta miah pazao ta, sapa nata thlahpa liata eima leiseih thei nawpa ta miah mohôtuhpa atanoh taihta Revd. L. Mark miah hrolâh ta, eima Missionary pathla nahzy nata he amâ pabuna thlâsu he pasôna châh eima pahno via awpa a peimawh kaw” tahpa reih ta, biereina a hnei khai tawhta thlahchhâ paraohna hneipazipa ta thlâsu liata daihti ahmâpa a châ.

Thlâsu tly khai tawhta Puhpa M. Laikaw, Hon’ble CEM he ta Pihnô Vaili (L) vahpa Revd. L. Mark cha Missionary Bungalow liata tly ta, apakyhna daihti hmâh ta, Puhpa C. Chehnei, Dy. Chairman, MADC ta Khazohpa lâta alynabie reina thlahchhâna a hnei. He daihti liata Puhpa Beihruakhai, MDC, Saikao biatuhpa chhao â hlao thei hra. 

Missionary compound liata programme hmâ khai tawhta Puhpa B. Luaha, ex-MDC ta my pati â chhuanohpa cha aly kawpa ta dôhpa châ ta, he khai tawhta Siaha lâ a kaw liepa a châ. 

Atamy kha Revd. L. Mark ta a lahpinô Pihnô Vaili thlâsu tlypa ta thlahchhâna programme chyupa a hmâh thei hra.

CEM zachhihpa he Puhpa C. Chehnei, Dy. Chairman, MADC, Puhpa Delson Notlia, MDC, Puhpa Beirokhu Beita, I&PO, Puhpa FC. Minela, Cameraman, Puhpa Martin L. Hlychho, Cameraman, Puhpa M. Baithai, Editor (Chhim Aw) zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.