PRESS RELEASE

NO.33/2023

SIAHA, 13 Hmypi, 2023, Hriatuanoh – Atamy dawh 11:30 Am pata E & F Department Conference Hall, MADC Complex liata Puhpa M. Laikaw, Hon’ble CEM, MADC ta MADC ry liata Heads of Departments (HoDs), Group A & B Officer zy meeting a hnei khei.

Meeting he Puhpa K. Chhihrau, Executive Secretary, MADC ta chhihtha ta, Biehrai reina nata thlahchhâna a hnei pâ khai tawhta Puhpa M. Laikaw, Hon’ble CEM biereina hnei awpa ta a hrua.

Puhpa M. Laikaw, CEM zachhihpa chata Politician nahzy cha MADC liata avy heih vawh heih tahpa châ ei ta, officer nahzy deikua pension hlâ via office liata atyuhpa ama châ vâta ahneituhpa palôh phaopa ta, MADC he keimo Marasaw eih a châna hawhta kyhpachâna chôta rai liata ngâchhih kawpa ta ama hria awpa ta pasyu ta, Maluh liata rei khi achâ leipa Marapazy ta MADC eima hneipa he, eima Missionary RA. Lorrain nah nôvah hriapasana vâ a châ tah ta, âmo kha independent missionary ama châ vâta âmo ama y khao lei ti ta Marasawzy chichimâmâh kawpa ta eima y awpa Khaohzohpa pasaih leipa ei ta, eima Missionary nahzy hmâpa ta Awnanopa miah ama paduapa hleikhô ta District Council taihta eima vaw hnei haw. Chavâta sapa nata thlahpa asie pakaoh lymâpa hawhta ECM HQ office liata ahriapazy nata MADC office liata ahriapazy pi he adona nata ngâchhihna kyh liata eima raihria â lyu lymâ awpa a châ tahpa a reih.

Elected office holders junior kawpazy he senior officer nahzy ta miah nama guide chhei pathlei thei; chahawhpa hma a tlô lei nawpa ta dâh nata phôh liata asiezie awpa hawhta miah pachu u la, Executive biehneina lai chai leipa ta, dâh ta â bei chai awpa a châ; officer zy cha politics liata amâ hniahni awpa châ vei tah ta, office rai hria he mo hropaazy ta miah amâ pyh thai awpa byuh ta, Mararâh he Khazohpa eih châ ta, Khazohpa nahta hrialâh awpa he eima thlâchhâna châ sala, Khazohpa ta miah â hnawpa hawhta areisi kawpa ta raihriana liata hrialâhpazy hrialâh phapa châpa ta Khazohpa khozie hawhta rai hria awpa ta pasyuna bie a reih. Officer zy ama siechhei tlamaw khiah Council ta tao aw ta, a râh ta a tao aw tahpa a reih.

CEM zachhihpa chata punctuality papeimawhsa awpa ta pasyu ta, office he adaihtita liata tlô, adaihtita liata adi awpa châ ta, ahy hmahta athai chiehpa ta apihpa y ma pi; thai achhuahna hnei awpa apeimawh tah ta, rai hlâta hmo hropa papeimawhsa viapazy cha LDC tawhta Officer lai chaipa taihta chyhsa hmâtlâh a châpa y aw vei ei tah ta, ama rai nochâ liata apha kawpa ta hria chyu awpa châ ta, miah adaohtuhpazy cha, ahneituhpa eima châna hawhta polite kawpa ta avaw chhy awpazy, hâta ei kha liata Mara Dress ei 1 atao awpa byuhpazy cha pachâ peimawh awpa ta pasyu ta, ngiapâtuhpa eima châ vâta eimâ do khiah byhnâ eima to aw; eimâ do lei khiah hriena chhao a pasa via aw tah ta, MADC ry liata officer zy cha adona, ngâchhihna nata tiama hneina chô ta office rai hria awpa ta pasyuna bie pha kawpa a reih.

He meeting liata Puhpa N. Viakhu, Chairman, Puhpa N. Zakhai, Adviser to CEM zy ta pasyuna biereina hnei hra ei ta, Puhpa S. Lalremthanga, EM i/c School Education (PS), Puhpa K. Hrahmo, EM i/c Revenue, Puhpa MH. Tiabi, EM i/c School Education (MS), Puhpa K. Chhuabei, EM i/c LAD, Puhpa Tiahlei Syuhlo, EM i/c E & F zy ahlao ei ta, MADC Officers manôh 75 zy amâ hlao.

ISSUED BY:

Information & Publicity Department

Mara Autonomous District Council

Siaha.