PRESS RELEASE

NO.140/2023

SIAHA, 5 Phiata, 2023, Pobienoh – Atano zâlâ dawh 3:00 Pm kha ta MADC NIELIT (National Institute of Electronics and Information Technology) Study Centre cha achuna pathao thei awpa ta Puhpa M. Laikaw, Hon’ble CEM, MADC ta a pahy.

Pahyna Programme he Puhpa K. Chhihrau, Executive Secretary, MADC ta chhihtha ta, Puhpa HC. Beikhai, Dy. Secretary(GAD), MADC ta pavaonasa daihti a hmâh. 

Puhpa M. Laikaw, Hon’ble CEM chata biereina chyupa daihti hmâh ta, “he MADC NIELIT Study Centre he eima râh châta hmo ngiatlâh châpa châ ta, 12th Term MADC liata New Maraland vision sâkha hlaopatlohtuhpa a châ vâta ei ly hmeiseih. Sôh hluhpi pahryuhpa ta supi viapa pangai byuh leipa ta eima râhta liata asaipa tlai ta Computer achuna eima hnei thei awpa he khopasana ei hnei vâta Aizawl ei tly no ta thata hmah la na ta, atanoh cha pahy theipa vaw châ ta, a hmeiseihna râh eima tlô thei hapa vâta keima nata ei hrialâhpa, Executive Secretary nata Department official nahzy hriaparaohna phapa theilâpa a châ tah lei thei leipa na ta, he Computer Study Centre â vaw dua thei nawpa ta hmalatuhpa zydua hnoh ta alynabie ei reih.”

“Khizaw âsosâh lymâna hawhta atahmâ cha Computer knowledge a hneileipa châta cha rai angia thei awpa châ khao vei. He hawhta a châ no ta khihsa rairu viapazy châta cha computer achu nawpa liata sôthih rairuna y tyh ta, MADC ta he hawhta asaipa ta achuna eima vaw hneipa he ta khihsa rairu viapazy pachhâ aw ta, eima râh thyutliazy ta kao nano nanopa liata athôhkheina ama hnei cheingei nahta ei hnabeiseih.”

“MADC NIELIT Study Centre pahy awpa ta budget liata sôh eima so chhieliepa a y lei no ta khopasana eima hnei vâta kaoto tawhta sôh paraipa ta atanoh eima patohpatiapa a châ.”

“MADC NIELIT Study Centre he Siaha College Campus lia tly ma, su hro lâ tly ma vaw y ha sala, thokha ta cha achu nawpa su hawhta eima vaw pachâ tlamaw lei thei vâta MADC Complex chhôh cheingei ta so awpa he eima khopa a châ.”

“Atahmâ liata MADC NIELIT Study Centre he district hro lâ so awpa amâ chhuah tuapa a châ no ta keima ta thata tei na ta, biehneituhpazy thata ei daopa a châ. Achuna Centre hleikhô ta Internet Connection taihta asaipa ta miah ama pie thei nawpa ta NIC Aizawl liata hiah na ta, atahmâ cha asaipa ta miah ama pie pâ haw, aly’pa a châ hmeiseih; he hawhta miah khokheituhpa Puhpa H. Lalthathanga, Technical Director, NIC Aizawl nata Puhpa F. Lalrinawma, Addl. Director, NIELIT Study Centre, Aizawl zy hnoh ta alynabie ei reih.”

“MLA Election ama phuah khiata cha he MADC NIELIT Study Centre he pahy patoh thei awpa a châ lei awpa vâta ama phuah hlâta daihti acha-ie kawpa hry liata, programme nawh kawpa taopa ta vaw pahy pi ta, pahyna miah pahnokhei awpa ta eima hruana nawh kawpa hlao apatlotuhpa NGO leaders, MJA nata hrua-eihpazy, eima hruana pachâ peimawhpa ta miah amâ hlao vâta ama chô liata alynabie ei reih.”

“Atanoh liata eima pahypa he a programme nawh kaw hra sala, eima ti nata râh, chhâ a vaw sie lymâ awpa châta phahnai awpa, computer thaina ahnei leipazy châta Certificate pie thei awpa, niebaw tluana liata abaokhâ thei awpa a châ vâta ei ly hmeiseih.”

“MADC NIELIT Study Centre he Marasaw nata Mararâh châta byhnâ vaw tlôkhei sala, he centre liata avaw chu awpa zydua, hmialâ ama sie lymâ nawpa liata khokheina ei hlâ ei” tahpa ta, Puhpa M. Laikaw, Hon’ble CEM chata biereina nata pasyuna bie pha kawpa reih ta, MADC NIELIT Study Centre mohôtuh awpa châta raopa nata ato zydua abuakhei via tuhpa Puhpa Colin C. Ngohai, ITO, MADC chô liata alynabie reih ta, thaina eihrâhpa ahneipa, NIC liata Scientist ‘C’ a châ paphapa ta MADC NIELIT Study Centre a mohôh awpa a châ zie chhao a reih hra.

He daihti liata Guest of Honour Puhpa F. Lalrinawma, Addl. Director, Scientist ‘E’, NIELIT Study Centre, Aizawl chhao a viasanô nahta Aizawl tawhta akhypa ta pahyna programme liata â hlao hleikhô ta biereina hnei hra ta, MADC NIELIT Study Centre liata asaipa ta Computer eima vaw sopa he sâkha ta Rs.70,000/- mâpa châ ta, Aizawl NIELIT Centre lia hmahta he hawhpa Configuration asâhpa he hnei mâh ma pi, nama vâhnei ngâsâ tahpa ta reih ta, Puhpa M. Laikaw, CEM ahawna cha pachâ peimawh pi ta, atanoh liata pahy theipa a châpa he ei châlykhei kaw ei tah ta, a viasanô nahta MADC tawhta Mara phothyu hmosaipiepa ama daopa vâta alynabie a reih.

He programme liata MADC Officers Association tawhta Puhpa JB. Chozah, President nata Puhpa JH. Beihnai, Secretary zy ta ahlao ei ta,  MCHP Gen. HQ tawhta Pihnô P. Chaki, President nata Pihnô K. Sangi, Sr. Vice President zy ahlao ei ta, MSO Gen. HQ tawhta NT. Beichhisa, Secy. i/c Property nata S. Beikhochhua, Secy. i/c Games & Sports zy ahlao ei ta, MJA Siaha tawhta Puhpa B. Dawpho, Editor, The Times of Maraland nata Puhpa Jeffrey Khara, Editor, Moonlight zy hleikhô ta, NIELIT Study Centre pahypa a châ thei nawpa ta building mohôhtuhpa Puhpa C. Beichhua, AE (PWD) nata hrua-eihpazy ta amâ hlao.

MADC NIELIT Study Centre he MADC Golden Jubilee Hall yna, Road Transport Department ta Vehicle Parking châta building ama pathaopatô tuapa, basement chhâh 2-na, Vehicle Parking ry liata taopa châ ta. Achuna su liata Desktop Computer chhao 30 patyu hapa châ ta, achu awpazy cha Phiata thlâpâ hâta ei 2-na tawhta pathao thei awpa ta apatohpatiapa a châ.

ISSUED BY:

Information & Publicity Department

Mara Autonomous District Council

Siaha.