PRESS RELEASE

NO.152/2023

SIAHA, 18 Di, 2023, Hriatuanoh – Atanoh dawh 2:00 Pm kha ta MADC Complex main gate tlô chy chachâh liata sapa MADC Golden Jubilee Building cha Puhpa M. Laikaw, Hon’ble CEM, MADC ta hmâ thei awpa ta a pahy.

Programme he Puhpa K. Chhihrau, Executive Secretary, MADC ta chhihtha ta, Rev. Phosa Chozah, Moderator, ECM Assembly ta pavaosana daihti a hmâh. Puhpa John Beizachhi Phuto nata Laihsa B. Priskili zy ta hlasapa ta zawpi palôpahawh ei ta, Puhpa C. Rahre, AE, PWD, MADC ta technical report a pie.

He daihti liata Puhpa M. Laikaw, Hon’ble CEM ta 12th term MADC ta New Maraland’s Vision ama hneipa palâhna hnei pâ ta, Puhpa MH. Tiabi, EM i/c School Education (MS) ta MADC Golden Jubilee Sash a palâhâh pâ hra.

He programme liata hrua-eihpa Political Parties nôpawpazy tawhta ahlao ei ta, MADC nata Mizoram Government ry liata HoD thokhazy amâ hlao hleikhô ta, MTP Gen. HQ tawhta Puhpa Pakhaw Chozah, President a hlao ta, MCHP Gen. HQ tawhta Pihnô P. Chaki, President â hlao thei hra.

Puhpa M. Laikaw, Hon’ble CEM ta biereina chyupa daihti a hmâpa liata atanoh daihti pha kawpa a pie tuhpa Khazohpa liata alynabie reih ta, ano CEM a châna daihti liata ryutloh ngiatlâh châpa pahytuhpa a châpa cha â lyzie reih ta, nôpaw hmiatuapazy hriapasana vâta MADC Golden Jubilee eima tlô khô lâ liata MADC ta kô 50 eima tloh hapa athei thlâhna building eima pahy theipa he ei ly hmeiseih tah ta, apathaopatôtuhpa 11th Term CEM Puhpa N. Zakhai hnoh ta alynabie reih ta, O sa chhâchabâhpa pazao awpa ta hmahla lymâ tuhpa 12th Term MADC liata a hrialâhpazy hriaparaohna phapa vâ nata official zy tiamana vâta a châ tah ta, ama zydua hriaparaohna theilâpa a châ tah ta, ama zydua chô liata alynabie a reih.

Puhpa M. Laikaw, Hon’ble CEM chata Mararâh hmahsie via nawpa ta 12th MADC ta â phana rakha ta hmah la lymâ ta, Pala Tipo liata Mini Hydro-Electric Power Plant nata Phura liata Agriculture Department site office pahy hapa châ ta, atanoh liata Lunglei Mara Girls’ Hostel chhao MADC ku liata hlâpa châ heih ta, cha hawhta Delhi nata India râh su peimawh viapazy liata Marapazy Opi awpa hmahlana siekhei haipa a châ tahpa a reih. Chahleikhô ta MADC ta Mara thyutlialazy IT lâ hmah pasiesa tah, asaipa ta computer amâ chu thei nawpa tahpa ta MADC NIELIT Study Centre pahy hapa châ ta, atahmâhe First Batch nah achu patlô daihmâ ha ei ta, January 2024 tawhta Second Batch pathao heih awpa hmah la ngâhaipa a châ tahpa a reih. Atliata liata MLA election liata 12th Term MADC tha patlô thei awpazy atlypatlohpa châ ei ta, âmo pa 2 zawhzi ta 12th Term MADC he Mararâh châta rai phapa eima hria lymâ thei nahta eima hnabeiseih tah ta, Mararâh zawpi lâ nata atanoh liata nôpaw avy pakhypazy hnoh chhao ta Moral support pie lymâ awpa ta ahawna a tao pâ hra.

MADC Golden Jubilee Building he Rs.160.34 Lakhs ta sa patlôpa châ ta, Ground Floor nata basement liata motor parking taopa châ ta, 2nd Floor Hall liata chyhsa 100 hlei â tlôh ta, Gathering Hall chhao ano-eihta 1st Floor liata taopa a châ.

ISSUED BY:

Information & Publicity Department

Mara Autonomous District Council

Siaha.