PRESS RELEASE

NO.60/2025

CHAKHEI, 15 Patô, 2025, Pobienoh - Atanoh zâlâ dawh 2:00 PM kha ta Puhpa M. Laikaw, Hon’ble CEM, MADC ta Chakhei liata MADC Circle Administrative Office (CAO) a pahy.

He pahyna programme hmâ awpa ta CEM zachhihpa Chakhei a vaw tlô daihti liata dyna gate taopa ta Chakhei khihsaw ta a rônah kawpa ta dypa a châ.

Puhpa M. Laikaw, Hon’ble CEM, MADC ta biereina daihti hmâh ta, atanoh liata palyupalihna vâta alynabie reih ta, “Chakhei liata CAO he Vahia liata eima sopa hawhta sopa a châ; CAO Chakhei ta Chapi, Chakhei & Siata MDC bia ôna chhôh liata administration siekheipa ta mohôh awpa ta ryhraopa a châ.”

“12th Term MADC liata MADC he ryureina dopa, siapa nata pathaihpa ta a sie thei nawpa New Maraland Vision hneipa ta eima siekhei ngâhai. Tahmâ he Golden Jubilee Hall, Siaha, Pala Tipo liata Hydro-electricity, Lôlei liata Mara House pahy hapa châ ta, Delhi liata Mara House sa ngâhaipa a châ - India râh khihpi chaipa liata Marasawzy eima viavi lei nawpa ta kô 1 chhôh ta pahy thei awpa ta hnabeiseihpa a châ. ZMC kiah liata râh hnei ha pi ta, O sa awpa ta project taopa a châ hra” tah ta 12th Term MADC hmahlana tlâhpi viapazy reina a hnei.

“MADC biehneina lai viapa hnei si la, eima Autonomy a boh sa la, hmahsiena lâthlôh a chhih awpa he eima kho chaipa a châ. Marasaw Opi MADC office he maniah atlôh khao leipa ta, pakawh â daih haw. Eima hmialâ chhâ a vaw y awpa châ ta palôh hneipa ta pachâna pasohpa eima hmâ lymâ awpa a châ. Eima Khazohpa ta MADC biehneina he, he rakha liata miah siesai aw vei - Khazohpa ta chhâh miah châ aw ta, biehneina lai viapa miah a pie cheingei aw tahpa eimâ ngiapâ.”

“Sawhkhâ rai hriapazy Paripanga pâna chô ta office kia paryhsa aw ma pi.”

“Marasawzy pi he Khazohpa liata alyna châh pahno ma pi. Siku Hyutuhpazy he management thai ma pi - thy 6, 7 hlao tlôh ta eimâ manage thai vei khiahtala he ti nata râh he a duah papua aw vei; chavâta sôh hmâ dâh thai achhuah ei su u.”

“Nôpaw hmiatuapazy byhnâ tona lâthlôh pavia khah ei suh u.

Khih mopâtlâh, zachhih nata ngiaryh chhihpa châpa ta ti nata râh khochhipa padua suh u” tahpa reih ta, Chakhei khih châta byhnâ awna hnei ta, Sapa nata thlahpa liata byhnâ to awpa ta khokheina bie a reih.

Pahyna Programme he Govt. Chakhei-I PS-I liata ahmâpa châ ta, Puhpa PB. Chôhnai, VCP Chakhei-II ta chhihtha ta, Machâ Ch. Ngoma ta devotion a hmâh. Puhpa Pawkhu T. Azyu, General Secretary, BJP Siaha District ta hmia pahnosana daihti hmâh ta, Puhpa Ch. Lai-u ta Chakhei khitlâh vyuhpa ta biereina hnei ta, Pihnô K. Lyrili, VC Member, Chakhei-I ta vote of thanks a reih. He daihti he laihsa Pricilla Nôtlia nata laihsa J. Vahneisô zy ta hlasapa ta zawpi ama palôpahawh. Daihti chhâna liata Machâ C. Laichhô, Hyutuhpa, ECM Local Church: Nazareth ta daihti khawna thlahchhânah hneipa ta programme he pachhâsapa châ ta, zawpi ta CAO pahypa alyna kyhchhi dôh chyupa a châ.

He Circle Administrative Office pahyna liata Puhpa C. Chehnei, Deputy Chairman, Puhpa M. Chiadung, EM i/c AH & Vety. etc., Puhpa Beihu Nohro, Deputy Chief Whip, Puhpa Albert TT. Sachu, MDC nata Puhpa B. Dawpho, MDC zy ahlao ei ta, officials lâ tawhta Puhpa Beirôkhu Beitâ, I & PO, Puhpa K. Laitha, AEO, Puhpa JS. Beizawzilai, Legal Consultant, MADC, Puhpa NK. Lalnunfela, PSO to CEM, Puhpa FC. Minela, Cameraman, Puhpa K. Nahemiah, Cameraman zy ta CEM he ama chakao chahlâh.

BJP Siaha District tawhta Puhpa C. Lawbei, Ex-MDC & Vice President, Puhpa Pawkhu T. Azyu, General Secretary, Puhpa Thychha Chozah, Secretary, Puhpa K. Beipachharona, Vice President, BJYM nata Ls. Caroline Chhaihlo, Vice President, BJYM zy ta CEM he zi ei ta, Puhpa Jeffrey Khara, Moonlight Editor ta zi thei hra ta, Ls. J. Vahneiso (Mara Idol 2024 Top-5 nata Ls. Pricilla Nôtlia, (Mara Idol 2024 Top-7) Artiste-zy ta ama zi thei hra.

He pahyna programme liata Chapi, Chakhei nata Siata MDC bia ôna chhôh liata khitlâh nôpawzy hrua khaipa ama châ.

ISSUED BY:-

Information & Publicity Department

Mara Autonomous District Council

Siaha.