PHURA, 1 Di, 2023, Chutynoh - Atanoh dawh 9:15 Am kha ta MADC Agriculture and Farmers’ Welfare Department ta Phura liata Site Office ama sapa cha Puhpa M. Laikaw, Hon’ble CEM, MADC ta hmâ pathao thei awpa ta aly kawpa ta a pahy.

Programme he Puhpa Israel Lapi, VCP, Phura-1 ta chhihtha ta, Rev. Joseph Koma Chozah, ECM Phura biatuhpa ta Puasaina 15:26 nata Hlazy 24 tawhta Khazohpa bietapa a reih.

Puhpa M. Laikaw, Hon’ble CEM nata Puhpa K. Hrahmo, EM i/c Revenue zy ta biereina daihti hmâh ei ta, Artistes Puhpa John Beizachhi Phuto nata Laihsa FC. Nipari zy ta hlasapa ta zawpi a palôpahawh.

He site office he ₹.40.00 lakhs ta sapa a châ tahpa Puhpa S. Chhuakhai, LDC, Agri. & Farmers’ Welfare Department ta technical report a pie.

Ary liata palâsapa he Puhpa M. Laikaw, Hon’ble CEM bierei tlâhpi viapazy a châ:-

“Atanoh site office pahyna liata a vaw hlaopa zydua MADC moh ta a naohna Samaw ei cha hlâ ei.  Khazohpa ngiachhiena vâta site office pahy thei awpa a châpa he aly’pa a châ hmeiseih.”

“12th term Sawhkhâ hmiatuapa liata biatuhpa ta hmah vaw lapa ta, department Officers staff zy ta hmah vaw la pazao lymâ ei ta, Mararâh châta hmo peimawh kawpa a châna hawhta Sawhkhâna thiehpa liata pahy theipa ta Mararâh hmia thiehpa hnei hnei pi ta, zâhnia Pala Tipo liata Mini Hydro pahypa ta atanoh he liata he su liata site office eima pahy heihpa he aly’pa a châ hmeiseih.”

“Department atotuhpa EM Puhpa J. Vabeikiasa tiamana nata department hmahlana zawhzi ta  notla bialâ Mararâh Rice Bowl eima hneipa he hmahsiena lâ pangai lymâ ta, mopazina kyh liata MLA eima kaw hnei awpa zy lia chhao hnabeiseihna lai kawpa eima hnei.”

“Nôpaw hmiatuapazy ta Naw hmâpa ta leipalie ei ta, Thyutlia chhâ liata machanise laih ta, Naw zydua he tractor ta thla thei awpa ta eimâ patohpatia â daih haw.”

“Maisa nata Lomasu lâ tawhta lâpi phapa a vaw tlô hai. A chheipâh zawpizy ta pathipalôh apahy si la; pakapaleih ta nie tlua athei leipa ta, population eima chyh vâta eima râh liata business tao athôh hmeiseih vei; land base - râh leilô hneirôna ta aduahpapua awpa eima châ tahpa he pahno suh u.”

“Delhi tawhta special assistant eima hmô thei khiah kô 1 liata ei 2 lei palie thei awpa a châ ha aw - cha daihti liata châhvâ chichei nata âhnalasi Siaha supply thei awpa ta lâthlôh vaw pha bâ aw ta, hnabeiseihna noh khaihpa a vaw chhi aw - ativy awpa ta he lâ liata zawpi ta palôhpasohpa eima hmâ awpa a châ.”

“Delhi tawhta sôh akhypa cha su hro lâ a sie awpa châ leipa ta, keimo Marasawzy liata â hlaihlâ awpa a châ.”

“Mararâh â pahniena lai kawpa cha western belt he a châ aw.

Electric current pha viapa nata facility pha viapa a vaw tlô aw.”

“Phura he ku raihriapazy châta eima Opi a châ tahpa pahno si la, he site office pahypa he aduapapuapa eimâ thaona noh a châ thei nawpa ta tiama papua chyu suh u.”

“NGO nata khitlâh ryureina liata Ryureina pathaihpa nata siapa siekhei suh u. Hmahsiena a vaw y hai no ta Pari theipa nata drugs ta miah â ngiahnao ngâhai; NGOs, VC nata Awnanozy ta hriaparaohpa ta he eima râh hmiahaopa Drugs he adyuh lymâ si la, Drugs Free land ta tao achhuah suh u. Chata leipa ta la chhâ a vaw y awpa liata eima râh leilô phapazy he Khichhaipazy ta a theilâpa ama vaw nie pathlei aw. MADC office Department to liata Paritheipa apathleih thei leipazy cha eimâ pathai lymâ aw tahpa châ ta, kôthiehpa lâ tawhta hmahla pazao lymâ chhuah hra.”

“He site office he ta chhâ a vaw y awpa châta ryutlohpa siesai awpa nata Phura khihsaw nata Mararâh châta byhnâ a lohpapuana su vaw châ sala,

Zawpi ta staff zy hriaparaohna su phapa vaw châ mawh sy.”

Daihti chhâna liata Puhpa J. Vabeikiasa, EM i/c Agri. ta vote of thanks reih ta, zawpi ta Zisu thlahchhâ pachupa reiparaohpa ta programme chhâ tawhta site office alyna kyhchhi dôh chyupa a châ.

He site office pahyna programme liata Puhpa K. Hrahmo, EM i/c LR&S nata a lahpinô Pihnô B. Ngiaso, Puhpa MH. Tiabi, EM i/c Edu (MS) nata a lahpinô P. Nancy, Puhpa L. Prisila, EM i/c PWD, Puhpa Tiahlei Syuhlô, EM i/c E & F, Puhpa J. Vabeikiasa, EM i/c Agri., Puhpa N. Beihu, Dy, Chief Whip nata a lahpinô Zahawmi, Puhpa M. Chiadung, Chairman, Town Committee nata a lahpinó K. Sangi zy ta zi ei ta, BJP District HQ Siaha tawhta Puhpa N. Beikhai, Vice President nata HC. Hmingtinthanga, Executive Member zy ahlao ei ta.

MADC Officials tawhta Puhpa Beirokhu Beita, I & PO, Pihnô Jennifer K. Siazi, AE,  Puhpa, K. Samuel, Sr. G/S, Puhpa FC. Minela, Cameraman, Puhpa T. Pabua, Cameraman zy nata MJA tawhta President Puhpa M. Baithai, Editor, Chhim Aw zy amâ hlao.